¹ وهذي هي وصيتي لشيوخ اللي بينكم ، بأعتبار اني شيخ ساعكم ، وابسرت اوجاع المسيح ،ومعي نصيب في الجلال اللي عيبان ² انتبهو لقطيع الله اللي بينكم وسكتوة ساعما يشتي الله ، مش مجبورين انما برضى، ومش طمع لربح ، انما رغبة في الخدمة. ³ لا تسيطروش على اللي طرحهم الله امانة بين ايديكم ، انما اقعو قدوة لهم . ⁴ ولما يجي رئيس الرعية ، تكسبو اكليل الجلال اللي مايبدلش . ⁵ وانتو يا كل الشباب ،طيعو الشيوخ . اوقعو كلكم متواضعين مابيناتكم البين . ساعما بيقول الكتاب :((يوقف الله على المتكبرين، لكنة بينعم على المتواضعين )). ⁶ يعني اتواضعو تحت يد الله القدير على ميد يرفعكم في الوقت المناسب . ⁷ ارجمو كل همكم علية ، لان هو اللي بيهتم فيكم . ⁸ اضبطو انفسكم واسهرو ! ابليس بيلوي ساعما اسد بيصيح وبيدور على واحد يفترسة . ⁹ فقاوموة ثابتين في الايمان . وادرو ان اخوتكم المؤمنين في كل العالم بيعانو ساعما هذي الاوجاع . ¹⁰ وبعدما تتوجعو فترة قليلة ، فأن الله اللي بيدي كل نعمة ، واللي دعاكم لا جلالة الابدي بضمكم للمسيح ، هو نفسة يصلح اموركم ويثبتكم ويقويكم ويسندكم . ¹¹ معه القدرة لا ابد الآبدين .

آمين. ¹² كتبت لكم هذي الرسالة المختصرة بيد سيلا اللي بين اعتبرة اخ امين ، وقصدي اني اشجعكم واشهد لكم ان هذي هي نعمة الله الصدقية ، فأثبتو عليها . ¹³ بتسلم عليكم اللي في بابل ، اللي اختارها الله ساعكم . وزد بيسلم عليكم ابني مرقس . ¹⁴ كل واحد منكم يسلم على الثاني بقبلة المحبة . السلام معاكم كلكم انتو اللي بتنتمو للمسيح.