¹ يعني بما ان المسيح اتوجع في جسمة ، اقعو انتو مستعدين ان تتوجعو ساعما هو . لان اللي يتوجع في جسمة ، يوقع قاطع الخطيئة . ² فيعيش باقي عمرة على الارض مش بحسب الشوات اللي بتتحكم في الناس ، انما بحسب مشيئة الله . ³ يكفي الوقت اللي ضاع ، اللي فعلتو فية الاشياء الي بيفعلوها اللي مش مؤمنين . فكنتو بتعيشو في الخلاعة والشهوات والسكر وحلاقات المجون والعربدة وعبادة الاصنام القبيحة . ⁴ وهم ذلحين بيتعجبو انكم مابتشاركوش معاهم في نفس الفجور ، وعلى ميد هذا بيسبوكم . ⁵ لكنهم عيلقو الحساب للي هو مستعد يحاسب الاحياء والاموات . ⁶ وهذا هو السبب ان رسالة الانجيل بلغت حتى للي هم ذلحين اموات ، على ميد يمكن يعيشو ساع الله وهذا بالنسبة لارواحهم ، مع انهم بالنسبة لاجسامهم وقع عليهم الحكم اللي يخطى على كل الناس . ⁷ اقربت نهاية كل شيء . يعني انتبهو واضبطو انفسكم على ميد تقدرو تصلو . ⁸ واهم من كل شيء ، حبو مابيناتكم البين بقوة ، لان المحبة بتستر خطايا خيرات . ⁹ اتعازمو مابيناتكم البين بدون تعصاب ¹⁰ كل واحد منكم لازم يستخدم الموهبة الخاصة اللي وقعة له على ميد يخدم فيها الاخرين . فتوقعو وكلاء وامناء مسؤلين على مواهب الله المتنوعة . ¹¹ من ينصح لازم يدي كلام من عند الله، ومن يخدم لازم يخدم بالقوة اللي بيدهيا الله . وبهذا يتمجد الله في كل شيء بواسطة عيسى المسيح اللي له الجلال والقدرة لا ابد الابدين . آمين . ¹² يا احبابي ، لا تستغربوش من هذي المحنة القاسيه االي بتمرو فيها وكأنة حاجة غريبة وقعت فيكم . ¹³ انما افرحو لانكم بتتوجعو ساعما اتوجع المسيح ، على ميد تفرحو اقوى لما يجي في جلالة . ¹⁴ ان كانو بيسبوكم على ميد المسيح فهنيئا لكم ، لان الروح المجيدة ، يعني روح الله ، يحل عليكم . ¹⁵ فأن كان احد منكم بيتوجع ، لازم ويقع هذا بسبب قتل او سرقة او جريمة ثانية او ادخل في شؤن غيرة . ¹⁶ اما ان كان بيتوجع لان هو مسيحي فلازم انهو ما يستحيش ابداً، انما يسبح الله على ميد هذا الاسم . ¹⁷ جاء وقت الحساب ، وهو عيبدا بشعب الله . فإن كان عيبدأ فينا احنا ، فكيف عتوقع نهاية اللي مابيؤمنوش ببشرى الله ؟ ¹⁸ وإن كان من الصعب ان ينجو الصالح ، فأيش نصيب الكافر والمخطي ؟. ¹⁹ يعني اللي بيتوجعو ساعما يشتي لهم الله ، لازم يسلمو انفسهم للخالق الامين ويواصلو في عمل الخير .