7

¹ ومن شان المسأله اللي كتبتو عنها ، الأحسن للرجال انه ما يتزوجش ² ولكن خوف من الزنى ، يوقع لكل رجال مره ولكل مره رجالها ³ وعلى الرجال انه يدي لمرته حقها كزوجه ، وكمان المره تدي لراجلها حقه كزوج ⁴ لأن الزوجه مابش لها السلطه على جسمها لأنه لزوجها ، وكمان الزوج مابش له سلطه على جسمه لأنه لزوجته ⁵ ولا يمنعش اي واحد منكم نفسه عن الثاني ، إلا لو متفقين ولفتره قليله ، إذا هو علميد الصلاه ، وبعد هاذه ترجعو للعلاقه الزوجيه سوا ، علميد ما يغويكمش الشيطان ⁶ احاكيكم بهاذه مش بحق أمر ولكن بأذن ⁷ وانا اتمنى لو كان كل الناس ساع ما انا ، لكن كل واحد معه موهبه خاصه له من عند الله ، واحد معه هاذه الموهبه والثاني معه موهبه ثانيه

⁸ واقول للعزاب والمرملين انه احسن لهم يبقو ساعي ⁹ لكن لو مايستروش يمسكو نفسهم احسن لهم يتزوجو ، لأن الزواج احسن من يحرق بالشهوة

¹⁰ والمتزوجين وصيتي لهم ، وهي من المسيح مش مني ، انه ماتفارقش المره زوجها ¹¹ واذا فارقته تجلس بغير زوج ولا تصالح زوجها ، والرجال يوبه ومايطلقش مرته

¹² والبقيه اللي ماتحاكاش المسيح عن قضيتهم اقول لهم :(لو كان به واحد مؤمن ومعه زوجه مشي مؤمنه ، وهي راضيه ان تعيش معه لا يطلقهاش ¹³ واذا المره معاها زوج مشو مؤمن ، وهو راضي انه يعيش معاها ، ماتطلقه ¹⁴ لأن الزوج اللي مشو مؤمن يتبارك بمرته المؤمنه ، والمره اللي مشي مؤمنه تتبارك بزوجها المؤمن ، والا يوقع الجال انجاس ، لكنهم في الحقيقه مباركين

¹⁵ واذا كان اللي مش مؤمن مشو راضي بهاذه ، ويشتي ينفصل عادي ينفصل ، في هاذه الحاله يكون المؤمن مشو مربوط بالزواج ، لأن الله دعانا احنا المؤمنين نعيش بسلام ¹⁶ من يدرى يالزوجه المؤمنه انك يمكن تنجي زوجك؟ ومن يدري يالزوج المؤمن يمكن توقع انت السبب علميد تنجي مرتك؟ ¹⁷ وكل واحد لازم انه يتصرف في الحياه على الموهبه اللي اداها له المسيح ، والحاله اللي دعاه فيها الله ، وهاذه اللي افرضه على كل المؤمنين ¹⁸ ومن دعاه الله وهو مختون ، لا عاد يحاول يستر ختانه ، ومن دعاه المسيح وهو مشو مختون ، لا عاد يختتنش ¹⁹ ما يهمش انه مختون ولا مش مختون ، ولكن المهم هو العمل بوصايا الله ²⁰ لازم يبقى كل واحد على الحال اللي كان عليها حين دعاه الله

²¹ لو كنت عبد لوما دعاك الله مش مهم ، ولكن لو كنت قادر انك توقع حر اغتنم الفرصه ²² فمن صيح له المسيح وهو كان عبد يكون للمسيح حر ، وكمان من صيح له المسيح وهو حر كان للمسيح عبد ²³ والله اشتراكم ودفع القيمه ، لا عاد توقعوش عبيد للناس ²⁴ ويوقع كل واحد منكم يا خبره أمام الله ساع ما كانت عليه حاله لوما دعاه ²⁵ والعزاب مابش عندي وصيه لهم من المسيح ، لكن علميد ادا لي حكمه تسترو انكم توثقو بها ²⁶ اقول انه بسبب الضيق في ذيه الوقت الأحسن ان يجلس كل واحد على حالته ²⁷ هل انت مرتبط بمره؟ يعني لا تطلبش انك تنفصل عنها ، هل انت مش مرتبط بمره؟ يعني لا عاد تطلب الزواج بمره ²⁸ لكنك لو تزوجت فأنت مش غلطان ، وإذا تزوجت البنت فهي مش غلطانه ، لكن اللي بيتزوجو بتوقع لهم مشاكل في الحياة ، واشتي ابعد منكم المشاكل تيه

²⁹ يا اخوتي ، انا اقصد ان اقول لكم ان الوقت قصير قوي ، يعني من ذلحينه لازم ان يوقع اللي معاهم زوجات كأنهم مش عزبان ³⁰ واللي بيبكو كأنهم ما بيبكوش ، واللي فارحين كأنهم مش فارحين ، واللي بيشترو كأن مابش معاهم شي ³¹ واللي بيتعاملو في امور تيه الدنيا كأنهم ما بيتعاملوش لأن هاذه الدنيا منتهيه بكل مافيها

³² اشتيكم ان ماتقلقوش ، العزب يوبه لأمور المسيح ، لأنه يشتي يرضيه ³³ اما المتزوج يوبه لأمور الدنيا ، لأنه يشتي يرضي مرته ³⁴ وهو مشتت في جهتين ، وكمان المره العزبه توبه بأمور المسيح ، وتشتي توقع مهتمه به قوي بجسمها وروحها ، ولكن المتزوجه فهي بتهتم بأمور الدنيا لأنها تشتي ترضي زوجها ³⁵ انا اقول ذيه مش علميد اقيد حريتكم ولكن علميد تستفيدو ، وتفعلو اللي يناسب وتخدمو المسيح بدون ربشه

³⁶ واذا بيبسر اي حد منكم انه بيتصرف بوقاحه مع خطيبته وان شهوته قويه ، يعني لازم من الزواج ، عادي يتزوج وهاذه مشو غلط ³⁷ واما من يصمم ويجلس بغير زواج وهو ساتر انه يمسك نفسه ومش مضطر ان يتزوج خطيبته عاده احسن ³⁸ يعني من يتزوج عادي واللي ما يتزوجش عاده احسن

³⁹ الزوجه مربوطه بزوجها مادام وهو حي ، لكن لو مات زوجها توقع حره ويحق لها الزواج بمن تشتي من بين المؤمنين وبس ⁴⁰ لكن في رأيي انها توقع اكثر فرحه لو بقت على حالها ، واظن اني بقول ذيه بروح الله