6

¹ لو كان به واحد منكم معه دعوه على أي احد ثاني ، فكيف يسير يقاضيه عند اللي مشهم مؤمنين بدل ما يسير للقديسيين؟ ² مش انتو دارين ان المؤمنين عيحاكمو العالم؟ ولو كنتو عتحكمو العالم يعني اكيد تسترو تحكمو في القضايا السهله ³ وانتو دارين اننا عنحامن الملايكه ، والأولى ان نحكم في قضايا تيه الحياه ⁴ ولو بينكم مشاكل في امور تيه الحياه ، عتعرضوه على قضاة ما بتفعلهمش امة المسيح اي قيمة؟ ⁵ يا خزوتاه ! مابش احد بينكم فاهم يستر يحكم بين الاخوه؟ ⁶ كيف يقاضي الأخ اخوه عند غير المؤمنين؟

⁷ انتو بتقاضو بعضكم وهاذه عيب ! مش اخير لكم تتحملو الظلم؟ مش اخير لكم تتقبلو يشلو منكم اي شي؟ مش هاذه افضل؟ ⁸ لكن انتو ظلمه وتشلو حق اخوتكم والكل ⁹ انتو دارين ان الظلمه ما يورثوش ملكوت الله؟ لا تخدعوش نفسكم ، لا الزناه ولا عباد الأصنام و الفاسدين ولا اصحاب الشذوذ ¹⁰ ولا السرق ولا الهورين ولا السكارى ولا الملاعنين ، محد من هولا له نصيب في ملكوت الله ¹¹ وكان بعضكم على تيه الحال ولكنكم اعتسلتو واتقدستو واعتبركم صالحين بقوة اسم سيدنا عيسى المسيحوبروح إلهنا ¹² هاناك من يقول :(كل شي حلال لي) ولكن مش كل شي ينفع (كل شي حلال لي) ولكني ما ارضاش يستعبدني أي شي ¹³ اللقمه للبطن والبطن للقمه ، والله عينهي الاثنين سوا ، واما جسم الانسان مشو للزنى ولكن لخدمة المسيح ، والمسيح هو اللي عيشبع حاجات الجسم ¹⁴ والله اللي قيم المسيح من الموت عيقيمنا احنا والكل بقدرته ¹⁵ مش انتو دارين ا اجسامكم هي أعضاء المسيح؟ فهل يجوز انه اشل اعضاء المسيح واخليها مع مره عاهره؟ لا ابداً ¹⁶ وانتو دارين من يتحد مع عاهره يوقع معها واحد ، الكتاب يقول :(يوقع الاثنين واحد) ¹⁷ واما اللي يتحد مع المسيح يوقع معه روح واحده

¹⁸ ابعدو من الزنى ، لأن كل ذنب يفعله الانسان هي خارج جسمه ، أما اللي يزني هو يزني بحق جسمه ¹⁹ مش انتو دارين ان جسمكم هو بيت للروح القدس الساكن بينكم واللي اداه الله لكم؟ وانتو مش ملك نفسكم ولكن لله ²⁰ لأنه اشتراكم بقيمه ، يعني اكرموا الله في جسمكم