¹ ಸಹೋದರರೇ ಆತ್ಮೀಕ ವರನ್ಮತ್ತ ಕುರಿತು ನಿಂಗ ತಿಳಿಜ್ಗ್ದೆಯಿಗ್ ಬಾರ್ದುಯಿಂಡು ನಾನು ಅಪೇಕ್ಷಿಸಿಸರೇ ² ನಿಂಗ ಅನ್ಯರಾಯಿಕ್ರಪೋದು ನಿಂಗುಲ್ನು ಪ್ರೇರಣೆಯಾನ ಹಾಂಗೂ ಮೂಕ ವಿಗ್ರಹತ್ತ ಅಂಚುಗು ಹೊಗತಿಂದಗ್ ಇಗ್ರದು ಗೊತ್ತಿದು ³ ನಾನು ನಿಂಗುಲ್ನು ಸೂಡ್ರತಿಂಡೆಕೆ ದೌರರಾತ್ಮತಿಂಡು ವಾಸತ್ರ ಎದನೇಕು ಯೇಸುನ ಸಾಪಗ್ರಸ್ತಯಿಂಡು ಸೋನುದಿಲ್ಲ ಪವಿತ್ರಾತ್ಮನಿಂಡೇ ಹೊಟ್ಟಿಕೆ ಯೇದು ಮನುಷ್ಯಹಾಗೊಟ್ಟು ಯೇಸುನ ಕರ್ತಯಿಂಡು ಸೋನ್ಸ್ ದಿಲ್ನು. ⁴ ವೆರತ್ಕುರು ಬೇರೆ ಬೇರೆ ವಿಧಯಿದ್ದು ಅನೇಕೆ ಆತ್ಮವಂಡೇ ⁵ ಸೇವೆಕುರು ಬೇರೆ ಬೇರೆ ವಿಧಯಿದು ಅನೇಕೆ ಕರ್ತನು ವ೦ಡೇ ⁶ ಕಾರ್ಯತ್ಕುರು ಬೇರೆ ಬೇರೆ ವಿಧಯಿದು ಅನೇಕೆ ಸರ್ವರತ್ಕುರು ಸರ್ವಕಾರ್ಯನ್ನ ಸಾದಿಸ್ರ ದೌರು ವ೦ಡೇ. ⁷ ಅನೇಕೆ ಪವಿತ್ರಾತ್ಮನ ಪ್ರಕಟನೆಯನ್ನ ಪ್ರತಿಯೊಂಡಲ್ ಪ್ರಯೋಜನಕಾಯಿ ಕೂಡ್ತಿದು ⁸ ವಂಡುಕು ಆತ್ಮನನಿಂಡು ಜ್ಞಾನವಾಕ್ಯ ವಂಡುಕು ಅದೇ ಆತ್ಮನಿಂಡು ತಿಳುವಳಿಕೆ ಆತ್ಮಾ. ⁹ ಇನ್ನೊಂಡುಕು ಅ ಅತ್ಮನಿಂಡೇ ನಂಬಿಕೆ ಇನ್ನೊಂಡುಕ ಆ ಅತ್ಮನಿಂಡೇ ರೋಗನ ವಾಸಸ್ಯರವರ ¹⁰ ವಂಡುಕು ಮಹತ್ವಕಾರ್ಯ ಸೈರವರ ಇನ್ನೊಂಡುಕು ಪ್ರವಾದನೆಯ ವರ ಇನ್ನೊಂಡುಕು ಆತ್ಮನ ವಿವೆಚಿಸ್ರ ವರ ಇನ್ನೊಂಡುಕು ವಿವಿಧ ಒಕ್ನ ವಾಸೆತ್ರ ವರ ಇನ್ನೊ೦ಡುಕು ಒಕ್ನತ್ತ ಅರ್ಧನ್ನ ಸೊನ್ಡ್ರ ವರ ಕೊಡುತಿದ್ದು ¹¹ ಅನೇಕೆ ಈ ಅದಿ ಕಾರ್ಯನ ಸೈರ ವಂಡೇ ಆತ್ಮ ತಾಟ್ಟು ಚಿತ್ತಗನುಸಾರವಾಯಿ ಅದೇರ್ಕು ಪಂಚಿಕುಡ್ತಿದು. ¹² ದೇಹ ವಂಡೇಯಾಯಿಂದೇಕು ಅತ್ಗಿಕ್ರ ಅಂಗಂಗ ಶ್ಯಾನಯಿದು ಹಾಂಗೇ ದೇಹತ ಅಂಗಗ್ಯ ಶ್ಯಾನಯಿದೇಕು ವಂಡೇ ದೇಹವಾಯಿದೋ ಹಾಂಗೇ ಕ್ರಿಸ್ತನು ಇದು. ¹³ ಯೆಹೂದ್ಯರ ಗುಟ್ಟು ಅನ್ಯರಾಗುಟ್ಟು ದಾಸರಾಗೊಟ್ಟು ನಾಂಗದೇರು ವಂಡೇ ದೇಹವಾಗುರ್ಕು ವಂಡೇ ಅತ್ಮನಿಂಡು ದೀಕ್ಷಸ್ತಾನ ಸೇ೦ಚ್ಗೋ೦ಡೋ ವಂಡೇ ಆತ್ಮನ ನಂಗುಲ್ನುದೇರ್ಕು ಪಾನವಾಯಿ ಕೂಡ್ತಿದು. ¹⁴ ದೇಹ ವಂಡೇ ಅಂಗ ಅಲ್ಲ ಅನೇಕೆ ಅದು ಶ್ಯಾನ ಅಂಗವಾಯಿದು ¹⁵ ಕಾಲು- ನಾನು ಕೈಯಲ್ಲಿ ಇತಿಂಡು ನಾನು ದೇಹತ್ಗು ಸೇರುಲ್ಲಯಿಂಡು ಸೋನೇಕೆ ಅದು ದೇಹತ್ಗು ಸೇರ್ದೆಯಿದ? ¹⁶ ಸೋವಿ-ನಾನು ಕ೦ನ್ ಯಲ್ಲಿಯಿಂಡು ದೇಹತ್ಗು ಸೇರ್ದೆಯಿದ? ¹⁷ ವ೦ಡ್ಮದಿ ಕ೦ನ್ ಯಾನೇಕೆ ಕೋಕ್ ರದ್ದು ಹೆಟ್ಟಿ. ¹⁸ ಅನೇಕೆ ದೌರು ಅಂಗತ್ಕುರು ಪ್ರತಿಯೊ೦ಡುನು ತಟ್ಟು ಇಷಾನುಸಾರವಾಯಿ ದೇಹತ್ಕುರು ಇಟ್ಟಿದು ¹⁹ ಅದದಿನ್ನು ವಂಡೇ ಅಂಗವಾಯಿಂದೇಕೆ ದೇಹಹೆಟ್ಟಿ ²⁰ ಅನೇಕೆ ಅಂಗಗಶ್ಯಾನ ಅನೇಕೆ ದೇಹವಂಡೇ. ²¹ ಕಂನುಕಿ ಕೈಕಿ ನೀನು ನಂಕು ಅವಶ್ಯಯಿಲ್ಲ ಇಂಡು ತಲ್ಯಾಯಿ ಕಾಲುಕು ನಿಂಗ ನಂಕು ಅವಶ್ಯಯಿಲ್ಲಯಿಂಡು ಸೋಡ್ರುಕಾಗ್ದಿಲ್ಲ ²² ವಡ್ಮಕು ಇಗ್ರ ಅಂಗಗ ಶ್ಯಾನ ಬಲಹೀನವಾನೇಕು ಅವಶ್ಯವಾಯಿದು ²³ ಅಲ್ಪ ಮಾನಯಿಕ್ರದು ಇಂಡು ಸೋಡ್ರ ದೇಹ್ ಅಂಗತ್ಗು ಹೆಚ್ಚಾನ ಗೌರವ ಕೂಡ್ಕರೋ ಅಪೋದು ನಲ್ಲಗಿಕ್ದೇಯಿಗ್ರ ನಾ೦ಟ್ಟು ಅಂಗತ್ಗು ಶ್ಯಾನ ಅಂದವಾರಕೂ ²⁴ ಅಂದಯಿಗ್ರ ನಾಗ್ಟು ಅಂಗತ್ಗು ಯೇದು ಅವಶ್ಯಕತೆನ್ನು ಇಕ್ದಿಲ್ಲ ಅನೇಕೆ ದೌರು ಕೊರತೆಯಿಗ್ರ ಅಂಗನ ಶ್ಯಾನ ಗೌರವಿಸಿ ದೇಹನ ನಲ್ಲು ಜೋಡಿಸಿದು ²⁵ ದೇಹತ್ಗುರು ಬೇಡಯಿಗ್ದೇ ಅಂಗತ್ಕುರು ವಂಡುಕು ವಂಡು ಚಿಂತನೆ ಸೈಯಾಕು ²⁶ ವಂಡು ಅಂಗತ್ಗು ನೋಪ್ಪಿಯನೇಕೆ ಅದಿ ಅಂಗತ್ಗು ನೋಪಿ ಹಾಗ್ಗ್ ದು ವಂಡು ಅಂಗತ್ಗು ಮರ್ಯಾದೆ ವಂದೇಕೆ ಅದಿ ಅಂಗತ್ಗು ಸಂತೋಷವಾಗ್ದು ²⁷ ಇಪೋದು ನಿಂಗ ಕ್ರಿಸ್ತನ ದೇಹವಾಯಿದು ವಿಶೇಷ ಅಂಗವಾಯಿರಂಗ ²⁸ ದೌರು ಸ್ವಲ್ಪ ಜನನ್ನ ಸಭೆಕುರು ಮೊದಲು ಅಪೋಸ್ತಲರನ್ನ ರಂಡ್ನೆದಾಯಿ ಪ್ರಾವಾದಿನ್ನ ಮೂಡ್ ನೆವಾಯಿ ಉಪದೇಶಕರನ್ನ ಅಂಚಿದು ಅಂಬೇಸಲ್ಲಿ ಮಹಾತ್ಕಾರ್ಯನ ವಾಸಿಸೈರ ವರನ್ನ ಸಹಾಯ ಸೈರ ಕಾರ್ಯತ್ನ ನಿರ್ವಯಿಸ್ರತ ವಿವಿಧ ಭಾಷೆತ್ಕುರು ²⁹ ಅದಿ ಅಪೋಸ್ತಲರೋ? ಅದೇರು ಪ್ರವಾದಿನ? ಅದೇರು ಉಪದೇಶಕರ ಅದೇರು ಮಹತ್ಕಾರ್ಯನ್ನ ಸೈರಾಂಗ್ಲ? ³⁰ ವಾಸಿಸೈರಾ ವರ ಅದೇರ್ಕು ಈದ? ಅದೇನು ವಾಸೆತಕ್ಕ ಒಕ್ತ ಅರ್ಥನ ಅದೇರು ಸೋನಕ್ಕ ³¹ ಅನೇಕೆ ಶ್ರೇಷ್ಠ ವರನ ಅಸ್ತತಿಯಿಂಡು ಅಸೆಪಡ೦ಗೋ ನಾನು ನಿಂಗುಲ್ನು ಉತ್ಕ್ರುಷ್ಟವಾನ ಮಾರ್ಗನ ಕಾಟ್ಟಿರೇ