¹ ನಾನು ಕ್ರಿಸ್ತನನ್ನ ಅನುಸಸ್ರಕಾನಿ ನಿಂಗ್ಲು ನನ್ನ ಅನುಸಸ್ರರಾಯಿ ರೊಂಗೋ ² ಸಹೋದರರೇ ನಿಂಗ ಅದಿವಿಷಯತ್ಕುರು ನನ್ನ ಜ್ಞಾಪಕಸೇದೂ೦ಡು ನಾನು ನಿಂಗುಲ್ನು ಒಪ್ಪಿಸಿಕೊಂಡ ಕಟ್ಟಳೆನ ಅನುಸರಿಸಿ ನಡ್ಗರಂಗಯಿಂಡು ನಿಂಗುಲ್ನ ಹೊಗಳರೇ ³ ಅನೇಕೆ ವಂಡು ಸಂಗತಿನ್ನ ನಿಂಗ ತೆಲ್ಜಿಗುರ್ದುಯಿಂಡು ನಾಟ್ಟು ಇಷ್ಟ ⁴ ಪ್ರತಿಯೊಂಡು ಅಮ್ಲತ್ಗು ಕ್ರಿಸ್ತನು ತಲ್ಯಯಾಯಿದು ಪಂಮ್ಲತ್ಗು ಅಮ್ಲದು ತಲ್ಯಯಿ ಕ್ರಿಸ್ತನು ದೌರು ತಲ್ಯಯಾಯಿದು ಇಂಡು ನಿಂಗ ತಿಳಿಗುರ್ದುಯಿಂಡು ನಾಟ್ಟುಅಪೇಕ್ಷೆಯಾಯಿದು. ⁵ ತಲ್ಯಯಿನ್ನ ಮುಚ್ಚಿಕೊಂಡು ಪ್ರಾರ್ಥನೆಹಾಗೋಟ್ಟು ಸೈರ ಪ್ರತಿಯೊಂದು ಅಮ್ಲದು ತಟ್ಟು ತಲ್ಯಯಿನ್ನ ಅವಮಾನಪಡ್ಸ್ ಕಾನಿ ⁶ ಅನೇಕೆ ತಲ್ಯಯೇ ಮೇನಿ ಬಟ್ಟಿ ಹೊಟ್ಟುಗ್ದೆ ಪ್ರಾರ್ಥನೆ ಹಾಗೋಟ್ಟು ಪ್ರವಾಧನೆಹಾಗೋಟ್ಟು ಸೈರ ಪ್ರತಿಯೊಂಡು ಪಮ್ ಲಾದು ತಟ್ಟು ತಲ್ಯಯಿನ್ನ ಅವಮಾನ ಪಡ್ಸುನ್ನ ಕಾನಿ ಎತ್ಗಿಂಡೇಕೆ ಪಮ್ಲಾದು ಬಟ್ಟಿಯಿಲ್ಲದಿಂದೆಕೆ ತಲ್ಯಾಯಿ ಬೋಳಿಸಿಕೊಂಡಿಕ್ರದು ವ೦ಡೇಯಾಯಿದು. ⁷ ಅನೇಕೆ ಅಮ್ಲದು ದೌರು ಪ್ರತಿರೂಪವಾಯಿದು ಪ್ರಭಾವಯಿಗ್ರದಿಂಡು ತಲ್ಯಾಯಿನ ಪ್ರಭಾವವಾಯಿದ್ದು ⁸ ಅಮ್ಲದು ಪ೦ಮ್ ಲಾದಿ೦ಡಗೂಟ್ಟು ಪಂಮ್ ಲಾದು ಅ೦ಮ್ಲತ್ ತ್ರಿಂಡು ನಿರ್ಮಾವಾಸು. ⁹ ಇದಲ್ಲದೇ ಅ೦ಮ್ಲದು ಅ೦ಮ್ಲತ್ರಿ೦ಡು ನಿರ್ಮಾಣವಾಗುಲ್ಲ ಅನೇಕೆ ಪ೦ಮ್ ಲಾದು ಅ೦ಮ್ಲತ್ರಿಂಡು ನಿರ್ಮಾಣವಾಗುಲ್ಲ ಅನೇಕೆ ಪ೦ಮ್ಲಾದು ಅ೦ಮ್ಲತ್ರಿ೦ಡು ನಿರ್ಮಾಣವಾಯಿದು ¹⁰ ದುಂತರ ನಿಮಿತ್ತವಾಯಿ ಸ್ತ್ರಿಕಿ ತಟ್ಟು ತಲ್ಯಾಯಿ ಮೇನಿ ಅಧಿಕಾರಯಿಕ್ರರ್ದು. ¹¹ ಅನೇಕೆ ಕರ್ತನ್ಕುರು ಪ೦ಮ್ ಲಾದಿಲ್ಲದೆ ಅ೦ಮ್ಲದಾಗೊಟ್ಟು ಅ೦ಮ್ಲದಿಲ್ಲದೇ ಪ೦ಮ್ಲಾದು ಇಲ್ಲ ¹² ಪ೦ಮ್ ಲಾದು ಆಮ್ಲತಿಂಡು ಹೆಂಗೊ ಉತ್ಪತ್ತಿಯಾಸೋ ಹಾಂಗೇ ಅಮ್ಲದು ಪಂಮ್ ಲಾತಿಂಡು ಉತ್ಪತ್ತಿಯಾಸು ಸಮಸ್ತತ್ಗು ದೌರೇ ಕಾರಣ. ¹³ ನಿಂಗುಲ್ಕುರು ನಿಂಗೇ ತೀರ್ಮಾನ ಸೇದ್ಗೊಂಗೋ ಪಂಲಾದು ಬಟ್ಟಿಯಿಲ್ಲದೇ ಪ್ರಾರ್ಥನೆ ಸೈರಾದು ನಾಲ್ಲದ? ¹⁴ ಅನೇಕೆ ಅಮ್ಲತ್ಗು ಮಗ್ರು ವಲಿಚ್ಕೋ೦ಡಿ೦ಡೇಕೆ ಅದು ಅತ್ಗು ಅವಮಾನಯಿಂಡು ನಿಂಗುಲ್ನು ಗೊತ್ತಿಲ್ಯ? ¹⁵ ಅನೇಕೆ ಪ೦ಮ್ ಲಾತ್ಗು ಮಗ್ರು ವಲಿಚ್ಕೋ೦ಡಿದೇಕೆ ಮುಸುಕೀ ಬದಲಾಯಿ ಕೂಡ್ತಿಗ್ರತಿಂಡು ಅದು ಅತ್ಗು ಗೌರವವಾಯಿದು ¹⁶ ವಂಡು ವಾಗ್ದಾದ ಪ್ರಿಯನಾಯಿಂದೇಕೆ ಇಂದ ಪದ್ಧತಿ ನಿಂಗುಲ್ನುರು ಇಲ್ಲ ದೌರು ಸಭೆಕುರುಯಿಲ್ಲ ಇಂಡು ತಿಳಿಜ್ಗೊಟ್ಟು. ¹⁷ ನಾನು ಹಿಂಗೂ ಸೋದ್ರತ್ಕುರು ನಿಂಗುಲ್ನ ಹೋಗುಳ್ಮಟ್ಟಿ ನಿಂಗ ಕೂಡಿವರತಿಂಡು ಕೋಟ್ಯದಗ್ದೋ ಹೊಟ್ಟಿಕೇಮೇಲಾಗ್ದಿಲ್ಲ ¹⁸ ಎತ್ಗಿಂಡೇಕೆ ನಿಂಗ ಮೊದಲು ಸಭೇರೆ ಕೂಡಿವರಪೋದು ನಿಂಗುಲ್ಕುರ ಬೇಧಹಾಗ್ದು ಇಂಡು ಸೋನರೇ ಇದು ನಿಜಯಿಂಡು ಸ್ವಲ್ಪ ಮಟ್ಟಿಕಿ ನಂಬರೇ ¹⁹ ನಿಂಗುಲ್ಕುರು ಇಂದಿ೦ದಗ್ಯ ಯೋಗ್ಯಯಿಂಡು ಬಿನ್ನಾಭಿಪ್ರಾಯ ಇಗ್ರದು ಅವಶ್ಯ. ²⁰ ಅನೇಕೆ ನಿಂಗ ವಂಡು ಸೈತ್ಗುರು ಕೂಡಿವರಪೋದು ಸೈರ ಭೋಜನ ಕರ್ತನೆ ಭೋಜನ ಅಲ್ಲ ²¹ ಭೋಜನನ ಪ್ರತಿಯೊಂಡು ತಟ್ಟತ್ತೆ ಇನ್ಮೊಂಡ್ರೆತ ಮುನ್ನಿಯಿ ಸೈಯಾಕು? ಹಿಂಗೂ ವಂಡು ಪೇಸಿಯಿಂಡುಯಿಕಕು ಇನ್ನೊಂಡು ಕಡ್ಸು ಮತ್ತನಾಯಿಕಕು ²² ನಿಂಗ ತಿಂಗುರ್ಕು ಕುಡ್ನಿರ್ಕು ಹೂಡಿಲ್ದೇ ಇದಿರ೦ಗ್ಲ? ಇಲ್ಗುಟ್ಟಿ೦ದೇಕೆ ದೌರ್ ಸಭೆನ ಅಸಡ್ಡೆ ಸೈಯಿರ್ಕು ಎಂದೋ ಇಕ್ದೇಯಿಗ್ರಲನ್ನ ನಾಚಿಕೆಪಡ್ಸರಂಗ? ನಾನು ನಿಂಗುಲ್ನು ಎತ್ತತ್ತೆಯ ಸೋನೊಟ್ಟು? ಈ ವಿಷಯತ್ಕುರು ನಾನು ನಿಂಗುಲ್ನು ಹೋಗಳನ್ನ? ಹೊಗಳ್ಮಟ್ಟೆ. ²³ ನಾನು ನಿಂಗುಲ್ನು ಒಪ್ಪಿಸಿಕೊಡ್ತ ಉಪದೇಶನ ಕರ್ತನಿಂಡು ಹೊಂದಿಕೊಂಡೇ ಅದೆಂದಿಡೇಕೆ ಕರ್ತನನ ಯೇಸು ತಾನು ಪೋ ರೊಟ್ಟಿನ ಅತ್ಗೂಂಡು ²⁴ ಸ್ತೋತ್ರ ಸೇದು ಅತ್ತ ಮುರ್ಜು ನಾಮರ್ಲಿ ಅತ್ಗೂ೦ಗೂ ತಿನ್ನಂಗೂ ಇದು ನಿಂಗುಲ್ನು ಮುರಿಜಿಗ್ರ ನಾಟ್ಟು ದೇಹ ನನ್ನ ನೆಸ್ಸಗುಕ್ಕೋಸ್ಕರ ಇತ್ತಾತ್ತೆಯ ಸೈಯಾಗೋ. ²⁵ ಹಾಂಗೇ ಕಲ್ಲಿ ತಿನ್ನದ್ರಾನ್ ಬೇಸಲ್ಲಿ ಆ ಪಾತ್ರೆನ್ನ ಅತ್ಗುಂಡು ಈ ಪಾತ್ರೆಯರುನಟ್ಟು ರಕ್ತತ್ಕುರು ಇಗ್ರಪ್ರದಿ ಒಡಂಬಡಿಕೆಯಾಯಿದು ನಿಂಗ ಇತ್ಗುರು ಪಾನಸೈರ ಪೊದದಿ ನನನ್ನ ನೆನ್ಗ್ರಕಾಯಿ ಇತ್ತಾತೇಯ ಸೈಯಂಗೂ ²⁶ ನಿಂಗ ಈ ರೊಟ್ಟಿನ ತಿಂಡ್ರೆ ಈ ಪಾತ್ರೆಕುರು ಪಾನಸೆದಷ್ಟು ಸಲ ಕರ್ತನ ಮರಣನ ಅದುವರ್ರ್ ತಂಕ ಪ್ರಸಿದ್ಧಪಡ್ಸ್ಗೋ. ²⁷ ಎದಾನ ಅಯೋಗ್ಯವಾಯಿ ಈ ರೊಟ್ಟಿನ ತಿಂಡ್ರು ಪಾತ್ರೆಕುರು ಪಾನ ಸೇವೆಕೆ ಕರ್ತನ ದೇಹತ್ಗೂ ರಕ್ತಗೂ ದ್ರೋಹ ಸೇದಿಗ್ರದಯಿದು ²⁸ ಅನೇಕೆ ವಂಡು ತನನ್ನ ತಾನು ಪರೀಕ್ಷಿಸಿ ಕೊಂಡು ಈ ಈ ರೊಟ್ಟಿನ ತಿ೦ಗೊಟ್ಟು ಈ ಪಾತ್ರೆಕುರು ಪಾನಸೈಯೊಟ್ಟು ²⁹ ಕರ್ತನ ದೇಹನ ವಿವೇಚಿಸ್ದೆ ಅಯಾಂಗ್ಯವಾಯಿ ತಿಗ್ರದು ಕುಡ್ಕಿರದು ಹಾಂಗೂ ಕುಡ್ಕಿರತಿಂಡು ನ್ಯಾಯತೀರ್ಪಿರ್ಗೊಳಗಾಗ್ದು 30 ³⁰ ಈ ಕಾರಣತಿಂಡೆ ನಿಂಗುಲ್ಕುರು ಶ್ಯಾನಲ್ಲು ಬಲಹೀನರು ರೋಗಿಗ್ಯರಾಯಿನ್ನು ಶ್ಯಾನಲ್ಲು ಸಕ್ನು. ³¹ ನಂಗುಲ್ನ ನಾ೦ಗೇ ವಿಚಾರಿಸಕ್ಯೂಡೇಕೆ ನ್ಯಾಯವಿಚಾರಣೆಕೆ ಒಳಗಾಗುದಿಲ್ಲ ³² ನಾಂಗ ನಂಗುಲ್ನ ವಿಚಾರಿಸ್ ಗೊಂಡ ಪೋದು ಲೋಕತ್ತ್ ಲೆಂಟ್ಟಿಕಿ ನಂಗುಲ್ನು ಅಪರಾದಿಗ್ಯ ಇಗ್ರ ನಿರ್ಣಯ ಹಾಗ್ ಬಾರ್ದಿಂಡು ದೌರು ನಂಗುಲ್ನು ಶಿಕ್ಷಿಸಕು. ³³ ನಟ್ಟು ಸಹೋದರರೇ ನಿಂಗ ಭೋಜನ ಸೈಯಿರ್ಕುವರ ಪೋದು ವಂಡಲ್ನ ವ೦ಡಲ್ಲು ಕಾದು ಕಣ್ಯಗೋ ³⁴ ವಂಡು ಪೇಸ್ಗೋಡಿ೦ದೇಕೆ ಹೊಟ್ಕುರು ಕಲ್ಲಿ ತಿಂಗೋಟ್ಟು ನಿಂಗ ಕೂಡಿವಂದಿಗ್ರದು ನ್ಯಾಯತೀರ್ಪಿಕಿ ಒಳಗಾಗ್ಬಾರ್ದು ಮಿಕ್ಕಾಂತ ವಿಷಯನ್ನ ನಾನು ವಂದಪೋದು ಕ್ರಮಪಡ್ಸರೇ.