¹ Jangkah Yesus nga ngangkabas saratn-saratn diah, Ini' barangkat umpatn Galilea ge' utukng ka rappo Yudea, ka sabarang sungi Yordan. ² Ge', Kumpur ahyo sok karah nganang-A, ge' Ini' ngangkauhatn ayoa' ka teetn. ³ Nyamani sok Farisi utukng wa' Yesus ya' nguji Ini' ge' mansikatn, "Anita gatnngadu bagi are ya' mancare sautn a' nige' bamacam alasan?"

⁴ Lalu, Yesus naham ge' nyansana, "Kati'ah imu' maca bahwa Ini', da nyipta ayoa' umpatn mulea', umas ayoa' are ge' mahu, ⁵ ge' Ini' berfirman, "Karna dakoh, arus ngagatn sama'a' ge' sino'a' ge' nyatu nige' sautna', ge' kadua a' dakoh ao' jadi nyiteng ungan? ⁶ Jadi ayoa' inya agi' dua, tapi nyiteng ungan. Karna dakoh, jai da nga gatn Jabata nyatu, kati' buleh talino misah a'."

⁷ Ayoa' nyansana wa' Yesus, "Lalu, jailah Musa mangkatn perintah ya' mangkatn surat care ge' mancare sautn?"

⁸ Yesus nyansana wa' ayoa', "Karna kakarasan atemu', Musa mangkatn ijin kimu' mancare sautnmu'. Tapi, wa' pamulea ti'ta samu dakoh. ⁹ Ge', Iko' muji' kimu' bahwaasi da mancare sautn a', kacuali karna babayu, lalu bainyha' nige' mahu da laitn, ini' babayu."

¹⁰ Ayo murid muji' wa'-Ini', "Sa' ulah diah hal a' banun nige' sautn a', labih bait kati' bainyha'."

¹¹ Namun, Yesus nyansana wa' ayoa', "Kati' smaan sok kaatn narima sarat diah, kacuali ayoa' gatn mangkatn karunia. ¹² Sabab, ani sok da kati' bainyha' karna memang umpatn gatnbaranak ladakoh umpatn putukng sino'a', ge' ani sok da kati' bainyha' karna sok lain ngadu, ge' ani uga da umas adup a' ladakoh umpatn adup a' sendiri demi Karajaan Surga. Barang asi da kaatn narima hal diah, teaklah ini' manarimaa'."

Yesus ge' Ayo Kangot Innek

¹³ Lakadakoh, nyamani kangot innek gatnminsakng wa'-Ini' supaya Ini' kaatn mana' barekng-A ka tumukng ayo kangot dakoh ge' ngadoa ayoa'. Tapi, ayo murid mingat ayo sok dakoh.

¹⁴ Namun, Yesus nyansana, "Iya'mingat ayo kangot innek dakoh. Iya' manghalang-halangi ayoa' utukng wa'-Iko' sabab Karajaan Surga ao' gatn umpu' ayo kangot innek da ulah ayoa.' ¹⁵ Ngalaka Yesus mana' barekng-A ka tumukng ayo kangot dakoh, Ini' boho umpatn dakoh.

Langkina Kaatn Idup Kekal?

¹⁶ Lakadakoh, utukngtalah sook wa' Yesus ge' mansikatn, "Guru, hal bait jai da arus ko' umas supaya kaatn idup da kekal?"

¹⁷ Ge', Yesus nyansana wa' sok dakoh, "Jailah imu' mansikatn wa'-Iko' manganai jai da bait? Duhutn Nyiteng ta da bait. Namun, sa' imu' ittuh maruh ka sadatn idup, taati ja' parintah-parintah dakoh." ¹⁸ Sok dakoh mansikatn wa' Yesus, "Parintah da dume?" Yesus nahama, "Iya' ngamis, iya' babayu, iya' nangko, iya' mangkatn kesaksian palsu, ¹⁹ manghormatlah sama' ge' sino'mu' ge' kasihilah samu adupmu' talino ulah adupmu' sendiri." ²⁰ Sok bujakng dakoh nyansana wa'-Ini', "Smaan hal dakoh nga ko' taati, jai agi da masih kurang?"

²¹ Yesus nyansana wa'ini', "Sa' imu' ngatte sempurna, anu ge' nyualtalah smaan da mu' umpu'. Lalu, mangkatnlah wa' sok papa, ge' imu ao' umpu' harta ka surga, ge' kaeh ngananglah Iko."

²² Namun, Jangkah sok bujakng dakoh ngadangah saratn diah, ini' boho nige' sedih sabab ini batol kaya.

²³ Lalu, Yesus nyansana wa ayo murid-A, "Iko' muji' da sabanara wa'imu, susah bagi sok da kaya ya' maruh ka sadatn Karajaan Surga. ²⁴ Nyasidah agi', Iko' muji' wa'imu' bahwa labih mudah bagi nyungan unta ya' nabo rubakng atos daripada sok kaya maruh ka sadatn Karajaan Jabata."

²⁵ Jangkah ayo murid ngadangah sarat dakoh, ayoa' jadi aru heran, ge' nyansana, "Kalo ladakoh, asilah da kaatn gatn nyalamat?"

²⁶ Gae nyantunung ayoa, Yesus nyansana, "Samahu talino, hal diah mustahil, tapi samahu Jabata, smaan hal dakoh mungkin."

²⁷ Lakadakoh, Petrus nyansana wa'-Ini', "Ilekmih, kai nga ngagatn smaana ge' nganang Akupm. Jadi jai da ao' kai narima?"

²⁸ Ge', Yesus nyansana wa' ayoa', "Iko' muji da sabanara wa'imu' bahwa imu', da nganang Iko' sadatn dunia da bahu, jangkah Anak Talino unyung ka takhta kabesaran-A imu' uga' ao' unyung ka tumukng dua balas takhta ya' manghakimi kadua balas suku Israel. ²⁹ Ge', satiap sok da laka ngagatn ramin, agea' da are, agea' da mahu, sama', sino', anak-anak, ato uma a' karna gaatn-Ko ao' narima saratus kali lipat ge' ao' mawarisi idup da kekal. ³⁰ Tapi, karah sok da pamule ao' jadi da unyhi', ge' da unyhi' jadi da pamule."