¹ Lita limelo, ngo Polo newai nelombe,ngo mobwanina Yesu mumesi lita ilino waitoo wobe. ² Bokwane lita lilifao na Pasa e Aungu ine yabwengo lita ilino. ³ Hitelo henenele ngo hiolo liwenesani helenge hemoyindesi ha mwa lohotofelo. ⁴ Efale mbo enuyo wasundja woliwi owa hate ha hitelo he Klisto. ⁵ Ine ya liwesiana ingi wana wa waito na haiho hutieti woyo he nena sikene hate ha mwenda ingi watoma kamu wasakoli. ⁶ Yo ine hate ha Klisto Yesu,waito wabe wisi waoli wa wohua,kolo endoto imoi eyiso isingi oni imoi,wohili wa wisemba,na ndole emboli ndjali. ⁷ Ngo nisi moto olisala limelo isi ngani imoi na Pasa e Aungu ine ya bwengo na lihwa naluili olahe. ⁸ Nabwa Pasa ene ata nisikolo na hate ha wainoli,lita nefalakole waito wabe mbo ndjalina wabwiwo Klisto wane wotikoki woliwiane. ⁹ Nenesi kamu mua ingi waito owatuhu yo na hitelo hene hiaitani kowa na wihua wihala hate ha Aungu ,he mofongi mo mbiofee. ¹⁰ Yoiyo nandole elingamba,helenge na helenge na waliwi wo Aungu yaliwesiani ingi wakondi kamu luili hate ha tosingani to djolo. ¹¹ Ine iwai hakiliwo hali wela ine iteisahu hate ha Yesu Klisto mangine o hui so. ¹² Nahe tuisi na mohala kamu mosiho moti nanga litaliwunoli hate ahahe , ¹³ Woyo na kpome ne nu ine wotokwe obe lita limundu mokwengo lita ilino,yoiyo isi ngbende elino. ¹⁴ Lita nandenge emelo,newai nefia halui aha felo ekaka. ¹⁵ Hane haihohatuhu ha djolo kamu sise hebwi lina kowa nahe. ¹⁶ Heta ndenge emoi iwai wonenge na ngbende elehe ine okomelisi luili hate hate ahaino na ndole enda. ¹⁷ Kamu ine Klisto ayale na metema enino na ndole ewunoli. nawuyo aho afole enu omwimili emino hate ha hundo kamu wohangani djolo emelo hia likandi, ¹⁸ Boliwe olembe heli,isingani imoi na wainoli,wofi kamu wosa kamu ndoo na lundo lo Klisto. ¹⁹ Ee wokwe womelo wolotoli woliwi mpendja lita wohulete na lihuluti wo Aungu. ²⁰ Sikene ingahe omo elewi okeli hate ahahe,haita heti ohatuhu hi wai esu wolombi to woluhani,lita li luili ho ekele esu hate ahaiso. ²¹ Ngahe ngbende awe hate ha linginda kamu na Klisto tee ohaiho ohatuhu,liwela na liwela.Ame.