¹ Esu paulo na Silvano na Timote twasihela lingomba na Tesalonisia hate ha Aungu kaka na yesu moumesi. ² Pasa na hai awe naemu ndi Aungu kaka ohoiso na moumesi yesu klisto. ³ Isi wali ine tomosesi Aungu mbala ondie lita ilaino baengaenena isi yo owoyo, lita boinoli owaino bwalonga kamu loundo hate ahaino ngaiso, yaolonga owoya. ⁴ Buyo esu kamu toyasesia lita ilaino hate ha hangomba ha Aungu lita li mohala omaino na boinoli hate ha mundu omaino na mundu mone mwatwele enu. ⁵ Iyo nde iyeneseli mbo eu bweli ho Aungu na ine enu bowe wali lita li wokonzi lo Aungu na ine yokoi enu wokonzi wo Aungu. ⁶ Yeneni wali ngi Aungu bokali mundu hia lifao ilawo beokwesi enu mundu. ⁷ Kamu wokali enu wane boena mundu isinga imoi na esu mbuse e weneni na yesu moumesi ane ekowa mbo he djolo isingani imoi na wandjelu awahe wa luili, ⁸ Hate ha botwani wo iyohe lita akale waito obe itumbu wane betiliwi Aungu kamu belumbi woteni mboli ndjali li moumesi omaiso yesu. ⁹ Bebwa mbo lifuti na wobebi woliwela kamu wisami na lohia kowa felo nahe kamu kowa na ngbende na luili olahe, ¹⁰ Aho elwa mbo he, nahose womelo ine hasesiami na wahinoli awahe kamu atwelane na wainoli wo pka. Lita linaho ilaiso felo elino liafola winolami na wainoli. ¹¹ Nahelenge hemelo toisi tolomba lita ilaino wikekani yo pka ine Aungu ohoiso aemalani enu lita na hetelo ehahe kamu ine, na luili olahe, atungesi mehendo ometuhu miali kamu hahwa ho pka na winoli. ¹² wo yo lina li moumesi omaiso yesu ikomelisana mbo hate ahaino kamu enu hate ahahe, helenge hemoi pasa he Aungu ohoiso kamu na moumesi yesu klisto.