¹ Miibà, kaambrua nombi kana noodio aadá ne, aamisi na atiisu ne, aniingane nakiisu kana neyi nendoo ne. karindru sizindru suato kangaabúmi mbee siiso. ² Aneebiri eebirí esi ebakuanye, idru ne nesia ba na mobeko Kristu bane naate. ³ Nombi kana ongandre ba ane nedu kpokpo, kumbi kayine bedu ne, anaada sinendre. ⁴ Kila nombi noyindre atesiamesi bandrene, idru nè, oguato nedu oobruatondre ne, kaba ba noobrondru atombi kue; ⁵ Si kiloombi otabasine ebirisi bandrene. ⁶ Nombiï kanu kaadane nodio nè, nesi neduamombe atombiï anaadanenè ko. ⁷ Nungaambaki mbee : Kaandandaka Angea. Neyi nombi edia nè, opéba si neyi ediabru ne. ⁸ Nombiï edia atandreepi ne, opéba siiso ateepi nekanyaka, too neyi edia atiisu ne opéba atiisu nora gboo. ⁹ Mangoongo mbee atesesi mumbee, si mapéba neduamombe atongani mombe, idru metuato namolende. ¹⁰ Tongani mabuato naakuwezo ba amesi mumbe ne, amesi atoba ndubu, zaïdi atamiibà esi napapiane. ¹¹ Anuguo pitesi manumaandika sima miaa anoote akomuandiko kakpu. ¹² Eba ndubú esi kanukonda ba kobú eba mombe pitesi neepi odiane, kanukariami sikpakpara ba kofaami nuútú, nyaadi ba kangetuè mbee atogbagba Kristu bane. ¹³ Kuguo pitesi esi kofa nuútú ne karika kapa siye a mibeko; too koomuaba kofaami nuútú, ba koobrotonye takieepi. ¹⁴ Atoyi anyama ne, kayi bambaamba moobruatondre todu kiye ne, kanobu ba nyaa negbagba Yesu-Kristu bane, neto na mokili etuandre togbagba mato ne, pitesi ketuama siiso togbagba atamokiliandrodio ! ¹⁵ Asikpa idru nubua nama mofo ao kakofomi ne, neyi anedu ne aba nubú nombi adia. ¹⁶ Nebiï bu nodo nobú atobá ndubú esi kodrua nodioyi ne, too bu t'Israël Angea bane ! ¹⁷ Nombi nangesi boma mbee maada, si aalama esi ebi Yesu bane ka tandreepi. ¹⁸ Miibà, nembaï nekúmu bwene Yesu-Kristu nobú akiisu ! Aso !