¹ Atodri tomuo sikpa aneyi Kristu izabrutaama tobueni ne, anubú tomuo, nungababokimee ba anaatu atobueni. ² Anuguo, ima Polo, madia miaa ba, kofaami nuútú ne, Kristu kayibo nero bambee aamieto. ³ Mangodio aadí nemara kiye atombi pite neyi anondaba kofone nuútú ne, anonda ba nokpandre atamibeko ndubu. ⁴ namaanzue bu Kristu, aamisi nanununda ba anubú ebà mombe atamibeko ne, Kristu angokpuaami, kangizaami atombaï. ⁵ Aamaeto, napapi aneyi manumanva ne, atabrubru, neelikia atuukweli. ⁶ Si Yesu-Kristu to, nufondru, kanufondru ne, kayi to bambee, too napapi anokpane atoomu. ⁷ Nubruoruengo mumbe, aïngwe apáami nè, bodia mia ba nungoga mbee nuukweli ? ⁸ Nodio ne keenga atombiï ongaami ne. ⁹ Pitesi kodia ba : newongwe piido emapanye inunua nefarine atiibakuli kakpu. ¹⁰ Manakapapi ne inu baki, to kati Angea bane, ba naambaka todio kiye. Too nombiï anaùgiya akiedrù ne ogua moguo naadaádà. ¹¹ Mato, miibà, obuaba madio miaa nofo androdio ne, pitesi kanukiindratoma ne ! nonzi Kristu bane atogbagba asikpa ? ¹² Ebasi kanukekia amieto nefudjo atodioï nuútuandre, kiiza pitesi koomua ba nobú ! ¹³ Miibà, nungobruki ba anudri sikpa, anyadi bà nengetumbee nodri sikpa ne ba anudri ateepi, too anetuki atoomu emoloyisi mambikianye, aamieto. ¹⁴ Si, amibeko ndubu kaateta atokoro sikana, atodioï : Noomua ambindru pitesi sizindru. ¹⁵ Too, nuukaki ba naanyaki siamieto nè, anariki suato nungaprukimbee siamieto. ¹⁶ Madia ba : Anooyi atiisu, nesika noomu neyi neepiandre; ¹⁷ si neepi anakoomu namaayo oosi niisuane, bu niisu abune osi bandrene amaayo osi neepiane; kamaayo iye soopi; suato nungesimbee esi noomuane. ¹⁸ Nooyia atiisu ne, kayiami nuburu atamibeko. ¹⁹ Too, esiame esi neepiane koguanye wazi : nakindumba, niisu iku, naanzanzue, ²⁰ Uduúdú anyobrobro, notú, ebànyeteti, naababò, niisu adá, ewodjo, iigbugi ²¹ ne tamaa, nuulewa, naakpokia bu odió kiye. Madia miaa, pitesi madiobru miaa taa, ebasi kesia odiódjoè ne koguoka nekùmu Angea bane ²² Too, ebebukpo esi nabrubruane ka : noomu, nidjadja, nebii, nembrembru, nombe, ²³ niriiria, nodri mombe, naagaaga, a mibeko kayi atodióè. ²⁴ Esi kanu Yesu-Kristu bane kabretu anyeepi atogbagba oodió pite esi neepi oomuane. ²⁵ Obuaba manumadria atabrubru ne, amooyi siiso atabrubru. ²⁶ Mangondambee nekumu kayitobambee ne, manumiihïye aamateo ne, no tamaa aada aamaeto.