¹ Mo bosie, mo kembe to ti ngalasia sa klisto Yesu. ² Mu mo gini mu kati ngbe ti bongili ani sigi, oni yugu se ti a bita ani amu lengbe ba yuga na akula bako kasa. ³ Yo ni mo pe ba dinga wa ngbaya tuluugu sa Yesu. ⁴ Ni mu limi ti sungu tulugu oge na lima yongo sa ani mu du mu gelimi du ti sungu tulugu, baka o yiba mongo sa gbenge sa ko. ⁵ Tisu yo ani za inyatala na bati nga nyali kpati mu yini kumandima, kusu na gala. ⁶ Mbe dege mu na dinga ti sungu sa ko, kpati ko su ni gatala ni ba li hi sungu dege sa ko. ⁷ mo gini molo yongo me deme mi na fuku mu no: Gbe na ga ba kana ya mo yini kutu yongo mu nzu. ⁸ Oba duo ya Yesu klistu, bosi David lugu na ndagba ambe kulugba wa a yini ti gini ngbaya kpolo mi na fuka. ⁹ Mi za ndinga tipoyi ko, a boyi ni kiwi wa nimu kana gbegbeleke yongo kasi age pe bo ngbaya kpolo ni kiwi du. ¹⁰ Ti su dumu, mi yi ba dinga tipoyi ani mu Zegi loko ako tipoyi ako hi a zeli gusu tipoyi klisto Yesu, azeli yi malo ali zo. ¹¹ Kpolo sako ni bita: Baka ani na kpi na ko gini kili, ani na luga na ko gini kili. ¹² Baka ani na ma kemba ba zala gbenge na ko gini kili baka ani na ti kangu ko, ona ti kangu ani. ¹³ Bato ani ka ko, oge pe bayita ani du tipoyi ope ba hu tiko tipoyi ko kili du. ¹⁴ Gayita nga ba fuka na ani yongo mu nzo ka. Mo voloko ako ti bongili Zegi tipoy a kusu kpolo tikangu ka, mu na kana ya amu na gina ako, ako ti ka sende. ¹⁵ Mokembe toni tipoyi ba bi ngbaya ni ti bongili Zegi, wa mbe sungu pe ba gina se. Ni mu na fuka bita yongo. ¹⁶ Mo ota fuka domu dumu na ti molose te ku, Mo du ti gini yiyi ni yongo ku, ani mu dumu na balakpa yongo mu, ona kemba ba ka Zegi. ¹⁷ Kpolo sako du wa holo na li kusa sa ni yeyeme. Hyménée na Philete na kana nzeke wa muyo. ¹⁸ Ayita bita yuyugu yongo a henge ba fuka ya lugu na be kulugba ti nyesi ba kana, a gbeleke yiyi yongosa ani sigi. ¹⁹ Kitika yagba mbiza a Zegi mase a we wa se ni duma sako ti du ni nyenyeki, oke na li mbiza kpolo me: Gbenge yini ani sako na nimu ge luma gbenge o oto yongo mudumu zanga bita yongo. ²⁰ Na ndagba yagba duma akolo na zo kian kian kula mu guni leke leke, a kana se ni wolo, na fisi mbiza. Ana kana sungu te na ule mudumu we dodo nyali, kula mu akana se ni ngula na sende, ana kana sungu te ti ule nzu. ²¹ Ni mu ka kungba yongo, o du wa akolo like, petwami, ti ni hi malo, ti lengbe ni ngbaya sungu nzu. ²² Mo yita bato ti kutu hala mu malo na gina nzeke, mo gele bita yongo (boyambi) gumi na zezele du, gini na amu na voloka Zegi ti ngbaya du ako. ²³ Mo yita ba zunduka akungba yongo, we ani mu yaula mo ge yini du ya ti su na kusa imo. ²⁴ Kitika mbe sungu sa gbenge ope ba du ni mbe imo ka, kasi ope ba zala ani nzu ni zezele du, ba yugu ngbaya yongo, na ba bo duko na logbo woko te. ²⁵ O zingi ni gumi ti ambe ndendelikpa li, ka Zegi hu na ako ni ngalasia na bibili du ako na ada bayina bita kpolo. ²⁶ Azeli bati iyo ndata ti ule ana gu ti gbina zabolo muna zali ako ti kutu ya a dunga na a dombi sako.