¹ Ojebini ino meene, bangene, boimea bosu atei enu eitaka eyano. ² Ngongo e bonyokwama pe bolia maloba mabe ali Filipe, elenge ejebi no, epakaso elikya ai Njambe osu, atei e boetondeani miako mipele mi Njambe, a ndanda epele e bitumba. ³ Te ngasa liteya lisu liditi te atei e libunga, pepe atina e libunga, pepe atina e boiba; ⁴ Kasi, elenge e etanei Njambe su iba babongi bo apesu sango epele, na tina yena botondoko, pepe elenge e bosepija bato, kasi bosepija Njambe, iyo omekaka midema misu. ⁵ Pe busa, na boa, boibala miaka mi bakosa te, elenge ejebi no; Pepe busa bodaka naposa e falanga ta boda bosu, Njambe yo mene ada motatoli. ⁶ Boi lukaka koko kembo elonga ai bato, pe ai no pepe ai bakina; bokokaka bosapa bokumu nongo batoma ba Klisto, ⁷ Kasi bolumaka na bosatitija atei enu. elenge emoti iyo okanungije mwana akabanea na bopele bana bande, ⁸ Bopalaki atei e epaleli enene esu ai no, pepe koko bopaka nanu sango epele e Njambe, kasi naikina dande bomoi bosu mene, oi meani aiso motuya monene. ⁹ osakanijakani, bangene, mosala mosu pe pasi esu: bolu na moi a mosala, tina ebotaka muna poji omoti onu, botei no miako mi Njambe. ¹⁰ Odini batatoli, pe Njambe adi koko, iye edia so adi no iba badimeaka edeali esenwake, sembo pe taka epamela. ¹¹ Ojebini koko ibo dolaka nanu elenge e sango moto ta li bana bande, boleja no, bobondisa no, balapa no ¹² bolala na elenge ebongi na Njambe, iyo obiaka no ta bokumu bo nde pe ta kembo ende. ¹³ Natina emina bopaka dea na bususu ngolu ai Njambe na elenge ediaso miako mi Njambe, ima mikamejae iso no koko, oliani mo pepe elenge miako mi bato, kasi, na boa edi mo koko, elenge e miako mi Njambe, iyo okoko adi no iba badimeaka. ¹⁴ Jambi no, bangene, omeini bokwani mangomba ma Njambe ima madi ali Yesu Klisto ta Yudea, poji bo ino koko, okabini koko saya ai bato bano bene minyoko miya minyokomoko nu ai ba Yudea. ¹⁵ Edi bayuda iba bakobo Kumu Yesu Kisto adie yogo pe na basakoli, iba ba lonyokola, iba bata sepijaka Njambe, pe iba bali banguna ba bato basusu, ¹⁶ Boloneja so bobala ai bapagano poji bo bayele, na elenge bo bata kina bolipa ma masumu mabu. Kasi kanda e Njambe e balimoja koko. ¹⁷ Poji so, bangene, ngongo di su bihole bikeke bokabwana na nu, na mokuku pepe koko na molema, bodaki mene na posa enene e bonene nanu. ¹⁸ Koko bodukaka boke adi no, na bonoo mbai Polo, mbala emoti too ibaye; kasi sata alosiya so. ¹⁹ Iye eli, na boa, elikya esu, to sepi esu, to motole mo kembo? editi ino koko, a boso bo kumu osu Yesu Klisto, ehole e boluwa bonde? ²⁰ Edi boa, odi kembo pe sepi esu.