¹ Omoti onu, akala na likambo na mina onde, abwani bo mofunda abaso bo bajangi sembo, pe pepe aboso bo basembwi? ² Ojebitini bo basenwake basambijele ngonde? pe ekala bo na njia enu ngondo esambisami, obongitini te bo sambija meko mikeke? ³ Ojebitini te bo losambijabi banjelu? Pe losambijabiti te, na tina enene bo, leka lo bomoi ibu? ⁴ Ngonga elino bowelana poji leka bo bomoi ibu, ili bato iba bo lisanga liliti bobakipa te oli bobandwani ba juji! ⁵ Nalio tondo na soni eno. Na buwa moto omoti o bwanya aliti atei e bino iyo okoki botondo atei e ba ngene. ⁶ Kasi ngene ali boke na ngene onde ali ba juji, pe na yena aboso bo bajangi sembo! ⁷ Eli na buwa koko libunga ali noni na elenge efundaka no bamoti na bakina. Poji yeni oliti bonyokwamani te a sika e bajangi sembo? Poji yeni oliti bosakina ni te ibo babube ino? ⁸ Kasi eli ino iba bali bojanga kondima pe iba babubaka, pe eli yengo li ba ngene olini boko buwa! ⁹ Ojebiti ni te bo bajangi kondima bakwetele te a bokonji bo Njambe ? Te sakoseani: ekala bato babe, pepe basambeli bikeko, pepe bato ba ekobo, pepe bami iba bali atei emitindo mibali babo, pepe bami iba bakasameje bina bo ¹⁰ pepe bato ba buba, pepe bato ba mongonga, pepe bato bakalangoe mana, ba kwetele te a bonkonji bo Njambe. ¹¹ Pe eli iyena elakanu, bamoti atei enu. Kasi ososamani, kasi opetojamani, kasi olongejamani na kombe e Kumu Yesu Klisto, pe nanjia e mwembo mo Njambe. ¹² Misusu milingisami ali mbi, kasi misusu militi na tina te, misusu milingisami ali mbi, kasi na mikinetele bo nakuwe ta bohombo na ninga na eka emoti te. ¹³ Leka boli poji sopo, pe sopo poji leka, pe Njambe abejalea omoti elenge bakina. pe mokuku moliti poji pite te, moli poji Kumu, pe Kumu poji mokuku. ¹⁴ pe Njambe, iyo osekoja Kumu, asekojala iso koko na ngulu e ende. ¹⁵ Ojebitini te bo mikuku mino mili binama bi klisto? Nandoakalea binama bi Klisto, poji bo nakoe nabo binama bi ndumba? Boyali naena! ¹⁶ Ojebitini bo iyo obandamaka na ndumba ali mokuku momoti nande? te ngasa, ebalama bo, babae bameale munu momoti. ¹⁷ Kasi oyo obandamaka na Kumu ali nande mwembo momoti. ¹⁸ Tiyani pite. Lisumu likina likoko moto, lisumu liya lili pamba e mokuku; kasi iyo oli bosapa na pite alibokoela mokuku monde mene lisumu. ¹⁹ Ojebitini te bo mokuku monu moli mongombo momwembo mosenwake imu moli ali no, imu moliano ali Njambe, pe bo olitini te bano banene? ²⁰ Te ngasa oliama na motuya motutu. Kumijani Njambe atei e mokuku monu pe atei e mwembo monu, imi mili poji Njambe.