¹ Poji ye etali moloko na lisungi li ba senoke, kooni, ino koko, elenge epi mbi meko ta masambo ma Galatia. ² Ye omoti omoti atei enu, disu di yambo di poso, aise a dongo iye ediaka yo, bokokana na bodia bonde, natina bo otambani te boimea bombai po bosangisa kabo jia. ³ Pe ehole emeabi mbi, nalomabi na misono, poji boke na kabo jino ta Yelusalema, bato ba bajimaka no. ⁴ Ekada bo likambo limina li bwani bo nakee mi meene, bakolea mobembo esika emoti na mbai. ⁵ Nakebi adi no ehole elekelabi mbi Masedonia, te ngasa na lekelabi Masedonia. ⁶ Mbala ekina nadabi mbuti nanu, to koko na nojabi ehole e pio, atina bo okeeni engbanga na mbi esika ekebi mbi. ⁷ Na palaliti mbala ye booneno na bonoko, kasi, nalikeaka bohumela mbuti nanu mwa ehole, ekada to Kumu ajimeji. ⁸ Nada mweka a Efese kino Kitela; ⁹ Zambi ekuke omoti enene pe bo ingea bo ngolu bodipoami atina e mbi, pe batemeli badi bike. ¹⁰ Ekada bo Timoti ameyi, koni bo adae zanga na bobanga atei enu, te ngasa akoko angbanga na mbi mosala moKumu. ¹¹ Pe moto bomotiola. Dani engbanga na nde na kimia, atina bo adoe adi mbai, zambi na mombaka engbanga na ba ngene. ¹² Poji ye etali ngene Apolo, namolendisi mingi bo akee engbanga na ba ngene, kasi edaka te meko mi nde bo adoe edeye; akebi aka dia libaku. ¹³ Senjelani, yeyoani atei e ejimeli, daani bami, salendisani. ¹⁴ Ye bo iye isusu ikoko no ikome na epaeli! ¹⁵ Na ekina lilako limoti lipaka mbi no, ba ngene. Ojebini bo libota li Setefanasa lidi mbuma e boso bo Akaya, pe lisa pa ta mosala mo basenoke. ¹⁶ Daani koko na litosi adi bato ndenge baya, pe tina e basusu basalaka mosala momina. ¹⁷ Na sepaka dea na boone Setefanasi, na Folotinatusi pe na Akayacusi; basungaki ta ehole edakiti no ya, ¹⁸ te ngasa basaki bowi mwembo mo mbi na monu. Jebani bo ekumu na bami ndenge baya. ¹⁹ Masambo ma Asia mapini no epaeli. Akilasi pe Pilisile, na lingomba li lidi a ndako ebu, bapino epaeli enene atei e Kumu. ²⁰ Bangene basusu bapino epaeli. Panani epaeli atei enu na ekopi esenoke. ²¹ Napino epaeli, mbi Polo, na ebo embi meene. ²² Ekada bo moto apaliti Kumu, alakelame bobe ! E Kumu osu dua. ²³ Ye ngolu e Kumu osu Yesu-Klisto edae nanu! ²⁴ Epaeli embi edae nanu basusu atei e Yesu-Klisto.