¹ Bhato bha leta bhaazu pe bhato bhone bhesesiinde ebina na Yezu kwa bhan'woo. ² Pe bhafalizeo na bhandombebhalinde bhan'saa, pa bhapaga: Moto mo odunga bhato bha bhakwa bhenene, pe ayayea na bhu. ³ Kasi Yi opaga letoto le: ⁴ Moto sina kati-kati engbanu, o ali na bhakandolo enkama, pe an'wumisa omoti, kodhe bhaada tuku libuwa na libuwa a wuma nakwa ankabhage omoti mo mawumanagi, tii an'mene? ⁵ O an'meni , ankumba na esonelee ange ambega, ⁶ pe, o ade angi,omaa bhapombode pe bhato bho bhegbatii nayi, pe opaga: Esoneleani naame , nakwate nameni kandolo mongame mo nde awumanagi. ⁷ Ndenge emoti, nale namopaga, aliandele esonelee tesi a engali nakwa moto mone omoti ma apaasi enmeleme, asoo bhato tuku libuwa na libuwa bhonza bhale nakwa paase enmeleme. ⁸ To enka sina, o ali na dalakma zumi, pe awumisa emoti, kana apeisa tala, akpaza ngbale, pe akabha na enmeleme okia , tii ge amena? ⁹ O ameni dalakma yo, oma bhasea bhadepe bhakabha bhegbatii nayi, pe opaga: Esoneleani naame, nakwa nameni dalakma yende awumani. ¹⁰ Ndenge emoti, nale namopaga, esonelee ale ambola wa bhamodokoogo bha Kuunzi na kwa moto one omoti ma apaasi enmeleme. ¹¹ Apaga goto: Molo omoti alinde na bhami bhalo bhebhale. ¹² Mo taadi ampaga na abee: Abo, lepa me mosolo mo akonga ete ade mongame. Pe Ababhu ogbalea mosolo monge. ¹³ Antinde ndambo ya bhabiti, mi motaadi, akanda bhasoe bhenge bhayaazu, agea mokili mayi, asoe an'masii mosolo monge na bhakabha pe maana.v 14 N'edheli amasii yaazu, nzaa esi apupa a mokili mo, pe abhanda akongaga na kwa yayee. ¹⁵ Agea ava ensale bya moto ma mokili mo, anteya nange matya ete omondage bhangwea. ¹⁶ Alinde abhaa ete aye ata eyeli te bhangwea bhalinde bhaya, kasi moto bhole pomoti kampi te. ¹⁷ Pa alaa yi ma moti, apaga: Bhato bhenga bhasala na kwa falanga bya abo bhale na mampa obuwa, pe me, wane, nale nakwa nzaa! ¹⁸ Nayamandele, nageandele bya abo, pe nampagandele: Abo, nazi kwane bya engali pe bi engo, ¹⁹ tebhongi goto te ete bhale maa manaa, leva ge bhato bha ensale bho ofutagaga na falanga. ²⁰ Pe ayama, pe agea bya abee. Pa gee nde ali mayi, abee anmena pe atuma na bhodogi, atetea agua nangee kingo pe ankpomeaga. ²¹ Mi ampaga: Abo, nazi kwane bya engali pe bi engo, kabhonge goto te ete bhalemaa manaa. ²² Kasi abee opaga bhato bhonge bha ensale: Onveleagani ngombe ya asoi bhonza, pe ontubhisani; man'bisi empete a ensewu, pe bhakatala a matindi. ²³ Dooni na mi ma bagala ma mafuta mingi, pe onmoni. Tan'yini pe tedhengeleageni; ²⁴ nakwate mimongame man'mena mo alinde akwa, pe asiile a bhomoyi, awumanaginde, pe amenani le..Pe bhabhanda bhedhengeleaga. ²⁵ Kasi, mi monkolo alinde n'amatya. N'edheli asii pe ade ebina na engii, awoondo esembe na molinga. ²⁶ Anmaa moto ma ensale mongee omoti pe anmosia kwasina ya asoo le. ²⁷ Moto ma ensale mo ampaga: Tadi mongo ndasii, pe, gee adu na nzoe enza, nde abaa anmo mi ma bagala ma mafuta mingi. ²⁸ awoo kangi anmelema, kabhayi yingye te. Abee apupa, peankonga ete ayingii. ²⁹ Kasi ansisia abee: Monda, azile bhagala bhebuwa ge naza ensale ongoo pe kali biti emoti te nazanga tose motindo mongo te, pe kali ata biti emoti te olopi mi ma meme ete nedhengeleage na bhadame te. ³⁰ Pe o manaa ade , yi ma anyi mosolo mongo na bhandumba, nakwa enge nde onmo mi ma bagala ma mafuta! ³¹ Mi mongame, abee ampaga, we ole babiti bhayaazu naame, pe tomate taazu tengame ale tengo; ³² kasi abhongi enza ete tesonelee pe tedhengeleage, nakwate mamaa mobhe alinde moto makwi pe asiile na bhomoyi, nakwate awumanagi nde pe amenani le.