¹ Pa n'edheli emoti yo, bhatoda bho bhalinde wo bhantangusiaga na Yezu kwa ya azananinde na bhato bha Galilea bho Pilato awoyinde bhango engabhu na ya nyame ya lekenga lekenga lengabhu. ² Yi sosisia: Malaa ete bhato bha Galilea bho bhalinde bhato bhone bhosoo bha mo galileo bhaada, nakwate bhameni empasi o ndenge lelia yo? ³ Te, namopagale. Kasi o mapasi enmeleme te, makwandele bhino bhaazu lokola. ⁴ To, bhato bho zumi na muambe bho bhongbale ya Silowe aguili pe omo bho, malaa ete bhu nde bhato bhone bhosoo bhato bhaazu bhada a Yeluzaleme? ⁵ te, nalenamopaga. Kasi o mapasi enmeleme te, makwandele bhino bhaazu lokola. ⁶ Opaga goto letoto le: Moto omoti akuni nde figya ange matya, Odoo biti emoti nakwa abhuni mbuwe yia, pe katani ata lembua lemoti te. ⁷ Antinde yia opaga na bhato bha ensale wa matya monge: mondani gala esalo ndi nadoo ete nabhuni mbuwe ya figya ye, pe tetaneagage ata lembuwa lemoti te. Gwetani wu; kwasina abebisale dhoote pamba aso? ⁸ Moto ma ensale wa matya ansisia: Kumu, dhosi goto gala ye; nakpowa lebhadhu enkpengbe yia, pe nandhulia yala. ⁹ Edi entango wa adoo bhe apatondele mbuwe; o kali go otenaandondele. ¹⁰ Yezu alindele awanisia a sinagoga, biti ya sabato. ¹¹ Mondani, alinde wo enka omoti alinde na biimo anyatisi bhagala zumi na muambe; egumbinde angongo, kakukinde ayama pekedhe te. ¹² N'edheli anmeni, Yezu awua enoo, pe ampaga: Enka, owuule na egopi tengo. ¹³ Pe anbisilia mabhoo. Mbala emoti ayama bhengii pe ankumisa Kuunzi. ¹⁴ Kasi mogoto ma sinagoga yo, ananlea ge Yezu anwuusi moto biti ya sabato, apaga na entuntu waa bhato: Bhabiti sita ale na kwa ensale; doogogoni bhabiti yo na kwa bhamowuusi, pe kana biti ya sabato te. ¹⁵ Bhawowolo! Kumu osisia, nde bhino mamoti mankoleagage bagala to kamela ange angbale nakwa manisi libha? ¹⁶ Pe enka mo, mo ale mi ma Abalama, pe Sumui abhandi nde na egopi bhagala zumi na muambe, kabhongi nde ete bhankoleage na monyololo mo biti ya sabato? ¹⁷ Ge nde ali adhela go, bhakukule bhonge bhaazu bhawoo soni, pe entutu wa bhato bhalinde bhedhengeleaga na bhakwa enzanza yaazu alinde aza. ¹⁸ Apaga goto: Etee te legoto la Kuunzi amanani na tu, pe nangemisiaga na etee? ¹⁹ Amanani na lembuwa la seneve ye moto omoti avinde pe adheta nange gadi; ataa, ade embaso osi, pe bhambhuubha bhayanga a mentabo mya. ²⁰ Apaga goto: Nangemisiagandele legoto la Kuunzi na etee? ²¹ Angemeniagi na dege mo enka omoti anvi pe anwoyi na falini, nakwa andhaisi mokati. ²² Yezu alinde atenaga bhagbata pe mongiime, pa awanisia, pe agea na Yeluzaleme. ²³ Mot omoti ampaga: Kumu, pa bhato bhokedhe pato nde bhabhikande? Ansisia: ²⁴ Edhulia ete oyingii a empomu okedhe. Nakwa ete, nale namopaga, bhebuwa bhakabhandele ete bhayingii, pe bhakukindele te. ²⁵ N'edheli mangina ngbale ayamandele pe adhiande empomu, o mali a ensenge, mabhandandele magongo empomu, pa mapaga: Kumu, Kumu, ewulia! Amosisiandele: Teyibi bii ye mali aso. ²⁶ Antinde yia mabhandandele mapaga: Tayayi pe tano maana ango miso, pe oli ewanisia angbasu ansenge. ²⁷ Amosisiandele: nale namopaga, teyibi soe ye mali aso, toyeani ebina name, bhino bhaazu, bhato bha ensale one. ²⁸ Wo nde aliandele engamo na ye mino, n'eheli manmenandele Abalama, Isaka, Yakobo, pe bhaplofeta bhaazu, a legoto la Kuunzi, pe bhamodheta ndele bhino ansenge. ²⁹ Bhatusiandele na bya esa pe na bya gogoye, na samabe pe na osele; pe bhepiandele mesa omoti a legoto la Kuunzi. ³⁰ Pe mondani, aliandele na bhatinda bho bhadendele bhambola. ³¹ Pa biti ye moti yo, bhaada bhafalizeo bhadoo bhampaga: Towea wo, gea na bino, nakwa Elode abhale ete omo. ³² Osisia bhu: Geani, pe pagani na mbole mo: Mondani, nale nobheya biimo, nale nowuusa bhato elo pe yio, pe biti ya esalo nde na masya. ³³ Akonga ete natange elo, yio, pe biti ya entinde; nakwa ete kabhongi te ete plofeta akui ansenge wa Yeluzaleme. ³⁴ Yeluzaleme, Yeluzaleme, mo omo bhaplofeta pe oboma mabogo na bhato bhotii bi engo, mbala enga nabhayi ete nodasiagi bhami bhongo, ge koo odasiaga bhami bhonge asunalia ya mapapa monge, pe we kobhayi te! ³⁵ Mondani, nadhoto ngbale engo; kasi, nale nopaga, kolomenendele goto te, tii biti opagande: Lekumu ali na madoo na lina la Kumu!