¹ Polo, Silive, na Timote ta linginda la Batesaloniki, bambe na mungu Isee na Yesu kilisito Aongo: botumbi na lehai lembe naino. ² Tombé toinesela Mungu botumbi bwainde lita laina fee, na boluhanyi enu ta malombi maiso. ³ Tombe toluhanya masala na bwimeli bwaino, na masala ma loundo, na lihenya la bwimeli ambe Aongo Yesu kilisito, felo ya Mungu Isee yaiso. ⁴ Toobilé, baoli ba Mungu, bane baminolamilé, ⁵ litalambo mboli yaiso, iyafalesama feo na maohi, owalo na lwili, na mwenda mwa ngia, owalo na bweli, litalambo buyalendja bosio bwamba esu letai laino, lita laino. ⁶ Owalo enu, bombe batwutweli baami, na Aongo, na bobwi yohi, letai la metulungi, na bohenesi bwa mwenda mwa ngia. ⁷ Na bosio bwaho bwamba batwutweli ba baimeli fee ba Macedoine na Alakai. ⁸ Litalambo yohi la Aongo liti feo ambo leowane ambe enu ta makedonia, na Akaya, owalo baimeli bwaino ambe Mungu, boobanilé bisia fee, na lelenge mbo totiale na kamo ya bobei. ⁹ Owalo boobesa mokpe mwa lobeo, na lebu labola esu ambe enu, na lelenge laimele enu Mungu, na boili bikeko lita la botongeli Mungu ya buumi na yaomoongo. ¹⁰ Lita la boiteli moona yainde ya lioló, ono aisola ta meliyo, Yesu, ono aluhese esu ta bwaango bone bombé boya.