¹ Mbi Yakobo, mobudhi wa Akongo pe wa Kumu Yesu Klistu, a matungu zomi na mabhale mabomboke: Agbaya nanu! ² Bhana bha ima, seleni bhomekama bhokopo na bhokopo bhokoki bhootanani ndje mokando mobhongu menemene. ³ Omadjeani bho bhomekama bha baoadima bhanu bhoabota molema bhodhoo. ⁴ Kasi esengeli bho molema bhodhoo mongemedje menemene elomo yaande, akpuli bho odhaani sembo pe bhangemeke, ye bhokwa a mokando nako momoti te. ⁵ Omoti tei yaanu amadjanga ndata, aeyonge pamba ya Akongo, oobho akanyee na bhagendja bhasusu na petee pe na bhozanga pamea, aamonyea naayu. ⁶ Kasi aeyonge na bhondima, ye na bhoisa tembe; bhoo oobho okaise tembe angemeni na mohumbela ma dhua enene, mopepe momamokuma pe momasombedjaka pamba susu. ⁷ Mogendja wa endenge ena tealeene bho aadhisa eyoma pamba ya Kumu. ⁸ Eke mogendja waagbaana, toodjue ndjia emoti. ⁹ Yee waan'ima okaatitidje aahekedje na tombwa yaande, ¹⁰ mogendja mogunake aahekedje na bhotita bhande; bhoo aanyoo ndje efulele ya mondjani. ¹¹ Dhiiso dha bhusa dhikpandji na bhodoo bhaina bhasusu, dhiyomedja modjani, efulele yaande eikpaa, pe bhobhongu bhaina bhoisiya: yaagwaibhi mogendja mogumake bhoa na ngando djande ¹² Bhopele bha mogendja oobho okadjee bhonyango molema liboso dha komekama; bhoo lingongo dhande bhomekama, aadhisa ngundu ya ehele, eebhe yaabhunia Kumu a bhabho bhakamopale. ¹³ Mogendja nako omoti amamekama, teabuke, "Akongo akamekani. Bhoo bhobhehu bhokokiti bhomeka Akongo," pe iyo teameke mogendja. ¹⁴ Kasi moto na moto akamekama poko ekadjua iyo bholuli bhande meene. ¹⁵ Bholuli bhomaingia, bhokabho te lisumu; pe lisumu dhimakomeene dhikabhote yogo. ¹⁶ Toakoseni, bhana bha ima. ¹⁷ Ngrasya esusu epele pe likabho peto djikodjonge dhiko, pamba ya Yaa wa miinda, pamba yaande mbongwana pe modhidhi mahombake moti. ¹⁸ Aebhota na bhopala bhande meene, na buka ya menemene, akpuli bho edhaa mbuma dja liboso dja dhikelamo bhande. ¹⁹ Bhaana bha ima, djeani bhoa. Moto na moto adhaa na bhooka bhogala, ye bhobuka bhogala, ye bhodhisa gbeku bhogala. ²⁰ Bhoo gbeku ya mogendja teengemedje bhosembo bha Akongo. ²¹ Mainanga, omadhumbani mbindo susu pe bhobhehu bha mokoseli, waadhisani na bhopolo buka eebhe yaaona ibho pamba yaanu, pe eebhe ekoki bhoheledja milimo manu. ²² Isani liloba a misala, tosukeeni oko a bhoddhioka, waakosakani ino bheene na maleeni mabhehu. ²³ Bhoo, oobho okaoka liloba pe teadhiise a misala, angemeni na mogendja oobho okasele mbanda yaande a talatala. ²⁴ Pe lingongo dha bhoasele, anyoo pe abhosane ndje edhaki iyo. ²⁵ Kasi oobho waaisa miso mande a mobeko mobhongu, mobeko ma somi, pe waaisa piko, ye oobho okaoke pe lingongo abosane, kasi aise a misala, ona bhoa aadhaa na mosepi a elomo yaande. ²⁶ Oobho okainge bho ake mosambeli, teanyange edhadha yaande na mondiki, akosaka molema mande, lisambo dha mogendja ona dhike dha edjegi. ²⁷ Lisambo dha bhongoo pe dhidjangi mbindo liboso dha Akongo, dhike bhosele bhaana bhaagweyee baboti pe bhadhi, bhaagweyee bhami tei ya mawa mabhu, pe bhoabhanea na bhosoto bha mongali.