¹ Masihi ma Paolo la Timote, basali ba Yesu Kilisito, ale banyemi atite ya Yesu, batondoli la milutifelo mia ekanga ya Filipo; ² Senye mbo lifee la Mungu la ehole yefeme ino la Mungu sango limo la Angene Yesu Kilisito. ³ Lofa eboto ale Mungu lita la masala malo manu emalubi mba, ⁴ Soo bosenyi bikeka fee malombi ma mba lita lanu fee, ⁵ La boenesi enyange ya mba lita la bobengeli bwanu mboli ya Yesu sokba o lise la ososo tee owaniwani, ⁶ Lele la boimeli mbo, oyo atchatchesi lisala lilo atite yanu, elonganesa bono lo lita la lise liya bono Yesu Kilisito. ⁷ Yengani mbo leluhanya bono lita lanu fee, lwaso mbo lele leluhanya ino la motema mwa mba , yebe nde la bobwemi bwa mba ambeke nde bwenesi la boimelesi masala ma Mungu, ino atubu fee eba bosobiana la mba la lifee la Mungu. ⁸ Lwaso mbo Mungu alubi mbo lenangi ino atubu la loundo lwa Yesu Kilisito. ⁹ La eyelenge mba la malombi, yele mbo loundo lwanu lolile oliyolo la bolubi ndjaso la bweli botumi, ¹⁰ Imbo bolembele ndjaso eyeti la bolo bobe ndjaa la soo mapusano lise liya Kilisito, ¹¹ Botume la ndjaso ya tondoyo la mbwa ya Yesu Kilisito ya bofiefi Mungu. ¹² Beelo, lenangi bolube mbo lwaso lobweseli lobengela limo ndenga botondoli yohi la Mungu. ¹³ Obona, atite ya batondoli fee, la ngemba fee, moto aiyotchui mbo lele nde la la bayaka lita la Kilisito, ¹⁴ La beelo oliyama atite ya Angene, eba sosesema la lwa botondoli soola boho yohi la Mungu. ¹⁵ Yele omongo mbo basi betondolo Kilisito la mohohia la elenge yonangela. ¹⁶ Eba balebekela la loundo la oluba mbo letemi lita la boenesi masala malo ma Mungu. ¹⁷ ango nde bana ebatumi la mwenda mwa fehe bale betondolo Kilisito la ndjaso yitchengani la lihenya la boyesi miundu la bobwemi bwa mba. ¹⁸ Yebe nde la bilenge fee, yebe nde la elenge ya boeni la maiso, yebe nde la elenge ya omongo, Kilisito ati etondoleme la bolemalemu: lohenela la elenge yaho, la lehenela bono yasi. ¹⁹ Lwaso lelubi mbo eyo yekikwa bono la boumi bwa mba la mbowa ya malombi manu la bobengeli bwa mwenda mwa Yesu Kilisito. ²⁰ La elenge ya boimeli bwa mba, la boteli motema yele mbo litchoe abono yombi la lwaso ango lomoti,la mbo sokba olabono tee o maise meya, Kilisito efiefeme bono atite ya loomba lwa mba la boteli motema tebe nde la mbowa ya boumi bwa mba ambeke nde ya loho lwa mba; ²¹ Lwaso mbo Kilisito nde ale boumi bwa mba, la loho lole nde seeli ale mba. ²² Ambeke yele bolo lita la lisala la mba imbo leuhe atite ya mwinyo, lilonge bolubi luba lina lihenelesa bono mba. ²³ Loheheleme la ndjaso imbale: lele la kamo ya boi limo la bobi esiya yemoti la Kilisito, eyele bolo ele bato baiye; ²⁴ ango nde lita lanu, yele bolo imbo lebe la boumi bwa loomba. ²⁵ La leimeli la lelubi mbo letobo bono, la leba bono lanu fee, lita la bohohomesi ino la lohenele lwanu atite ya boimeli, ²⁶ imbo la mabinyuelo ma mba atite yanu, lebe atite yanu moto ya bofiefi atite ya Yesu Kilisito. ²⁷ Angombo ende la elenge yengani la boimeli bwa Kilisito lita lambo leye wasimela ino, ango nde liyei, loowe ale ino imbo bobwi kboo la bole bowanesa atite ya mwenda momoti lita la boimeli bwa yohi la Mungu. ²⁸ Ele Mungu, lwaso ekeka ango yemoti ale ebafalesemi lanu, eyeba bono ndembe ya bolisi bwa bu nde ale ino ndembe ya boumi. ²⁹ Ele Mungu, lwaso mbo yekekemeli ino lifee la Mungu la mbowa ya Kilisito oyo eya la loomba lwa Mungu soo nga lita la boimeli inde, ango boeni mundu lita la nde.