¹ Bana boli, losiyela ino ndjaso yiyi, litambo moto atongee obee. Ambeke moto aotonga obe, tole la mwaseli oboso ya sango, Yesu Kilisito oyo aletondo yo. ² Ale indeangne kwele lita la obe bwasu, soo nga bwasu angene, ango limo la eba mwano fee. ³ Ambeke tohohomese ngele ya nde, haho tooluba mbo toolembela inde. ⁴ Oyo aasa mbo looluba inde, nde ati ehohomese ngele ya nde, ale moititai, limoo moongo yeti ho ale inde. ⁵ Angoho oyo ahohomesi yoohi lande, loundo lwa Mungu loengani moongo ale inde: haho, toluba mbo tole atite yande. ⁶ Oyo asa mbo: aoyala atite yande, aengani boendi obona aende indiangene. ⁷ Baelo ba loundo, yeti ngele ya owanu wani y'osiyela mba ino, angoho ngele ya hola yoohanyi ino olaa litshatshelo; ngele yaho ya o hala, ambo loohi loowi ino. ⁸ Ekeka yemoti yele ngele ya owaniwani yosihela mba ino, ele lwa omongo ale inde limo ale ino, litambo ngundu yesisama limoo monyanya mwa omoongo mosomwa ohala. ⁹ Oyo aasa mboo alee laa ndjaa, nde ale eowa mwelo yande obe, ale la ngundu. Oyo enanga mwelo ya nde, aoyala laa ndjaa, limoo liuuya liti ale ¹⁰ inde. ¹¹ Angoho eowa mwelo yande obe ale laa ngundu, ale eende ya ngundu, la ailubi ambeke ee to yaito, litambo ngundu yolifa maiso ma nde. ¹² Loosihela ino, bana boli, litambo obe bwanu bo omeseleme ino la bosiyo bwa lina lande. ¹³ Lo siyela ino, ba sango, litalambo bolubi oyo aleho sokba laa litshatshelo, lo sihela ino, yembemba, litalambo bolongi moto ya maluhanyi mabe. Lesiheli ino, bana boli, litalambo ino bolubi Sango. ¹⁴ Lesiheli ino, basango, litalambo ino bolubi oyo ale ho, sokba laa litshatshelo. Lisiheli ino, yembemba, litalambo bole la bolengi, la yohi la Mungu lile ale ino, la yasi, ino boolonga moto ya maluhanyi mabe. ¹⁵ Bonange mohili la ndjaso ile la mohili. Ambeke moto enanga mohili, loundo la Mungu loti ale inde. ¹⁶ Lita lambo eyi yile laa mohili, kamo ya loomba, kamo ya maiso, la ifata sa mohili, yisokbe ale Sango, yisokba nde la mohili. ¹⁷ Mohili mweta, la ndjaso ya nde. Angoho oyo ekela kamo ya Mungu, ale euha omoongo. ¹⁸ Bana boli, tole laa molaho mwa botungi. Obona aowi ino mbo oyo akili Yesu ale eya, owanuwani, eba bakili Yesu baoba obaiye. La haho tooluba mbo tobwesa la molao mwa botungi. 19 Baosomwa atite yasu nde baibi basu; lita lambo, baaba basu, ngatiye bale lasu esiya yemoti. Ambeke bati lasu esiya yemoti, yenese mbo bati basu. ²⁰ Ino bobwi boumi bwa mwenda, la ino fee boolembela. ²¹ Lesiheli ino, yeti lita lambo buulubaa omoongo, yele nde litalambo bolembeli inde, lambo boititai angoo bomoti bosokbe laa omoongo. ²² Ndato ale moititai, ambeke ati oyo aangina mbo Yesu ale Kilisito? Oyo ale mokili Yesu, oyo aangina Sango la Mwana. ²³ Oyo aangina mwana, ati limoo la Sango; oyo eimela Mwana ale limoo la Sango. ²⁴ Yengani mbo ndjaso yowi ino sokba laa litshatshelo yiyale ale ino. Ambeke iyi yowi ino sukba laa litshatshelo yile ale ino, botiale limoo bona ale mwana la ale sango. ²⁵ Esemba yefi inde iso, yele boumi bwa omoongo. ²⁶ Lesiheli ino ndjaso yiyi lita la eba belisesa ino. ²⁷ Lita lanu, boumi bwa mwenda ebo bobwi ino ale inde botiala ale ino, la boti la kamo mbo bafalese ino. Ani boumi bwa mwenda bole bofalesa ino, la bole omongo, la boti la boititai, tiyala ale inde obona afalesi inde ino. ²⁸ Owanuwani, ino bana boli, yala atite ya nde, lita la mbo molao moyabono inde, tobe la boimeli oboso, litalambo la boyei bwa nde toowee yombi la tobee hola laa nde. ²⁹ Ambeke bolubi mbo ale tondoyo, lembela mbo oyo ale tondoyo, abotemi laa nde.