¹ Èyí ni ìfihàn Jésù tí Ọlọ́run fifún Un láti fihàn ìránsẹ́ Rẹ̀ àwọn ohun tí yóò sẹlẹ̀ láìpẹ́. Ó sọ eléyìí di mímọ̀ nípa rírán ángẹ́lì Rẹ̀ sí ìránsẹ̀ Rẹ̀ Jòhánù. ² Jòhánù jẹ́rìí nípa ọ̀rọ̀ Ọlọ́run àti ẹ̀rí tí a sọ nípa Jésù, àwọn ohungbogbo tí ó rí. ³ Alábùkúnfún ni ẹnití ń kàá sókè, àti tí ń tẹ́tí sí àwọn ọ̀rọ̀ ẹ̀rí na, tí ń se ohun tí a kọ sínú rẹ̀, nítorí àkókò nà kú sì dẹ́dẹ̀. ⁴ Jòhánù, sí ìjọ méje ní Ásíà: Ore -ọ̀fẹ́ àti àláfíà fún un yín láti ọ̀dọ ẹnití ń bẹ, tí Ó ti wà, ẹnití ń bọ̀ wá, àti láti ọ̀dọ àwọn ẹ̀mí méje tí ó wà níwájú ìtẹ́ Rẹ̀. ⁵ àti láti ọ̀dọ Jésù Kristi, ẹnití ń se ẹlẹ́rìí òtítọ́, àkọ́bí nínú àwọn òkú, àti aláàkóso àwọn ọba ayé. Sí ẹnití Ó fẹ́ wa, tí Ó túwasílẹ̀ lọ́wọ́ ẹ̀sẹ̀ nípasẹ̀ ẹ̀jẹ Rẹ̀. ⁶ Ó ti sọ wá di ìjọba, àlúfà fún Ọlọ́run àti baba - Òun ni ògo àti agbára wà fún lái àti láilái. Àmín. ⁷ Ó ń bọ̀ nínú àwọsánmà; gbogbo ojú ni yóo ri, pẹ̀lú àwọn tí ó gun lọ́kọ̀. Gbogbo ẹ̀yà nínú ayé yóò sọ̀fọ̀ nítorí Rẹ̀. Bẹẹni, Àmin. ⁸ "Èmi ni ẹnití o bẹ̀rẹ̀ ohun gbogbo àti ẹnití ó parí ohun gbogbo" ni Olúwa Ọlọ́run wí, "Ẹnití ó ti ń bẹ, Ẹnití ó ti wà, Ẹnití ń bọ̀ wá, Alágbára jùlọ. ⁹ Èmi, Jòhánù arákùnrin yín àti ẹnití ó pín pẹ̀lu yín nínú ìyà àti ìjọba àti sùúrù òun ìfaradà tí ó wà nínú Jésù - wà nínú erékùsù tí a n pe ni Pátímò nítorí ọ̀rọ̀ Ọlọ́run àti àwọn ẹ̀rí nípa Jésù. ¹⁰ Mo wà nínú ẹ̀mí ní ọjọ́ Olúwa. Mo gbọ́ lẹ́hìn mi ohùn ńlá bi ti fèrè. ¹¹ Ó wípé, "Kọ ohun tí o rí sínú ìwé, kí o sì fi ránsẹ́ sí ìjọ méje - sí Éfésù, sí Smyrna, sí Pergamu, sí Tiatira, sí Sardi, sí Filadéfíà àti sí Laodikia." ¹² Mo yípadà láti mọ ohùn ẹnití ń bá mi sọ̀rọ̀, nígbàtí mo yípadà, mo rí ọ̀pá fìtílà méje. ¹³ Láàrin ọ̀pá fìtílà na, ẹnìkan tí ó dàbí ọmọ ènìyàn, Ó wọ asọ gígùn tí ó débi ẹsẹ̀ Rẹ, pẹ̀lú ẹ̀wù wúrà ní igbá àyà Rẹ̀. ¹⁴ Orí àti irun Rẹ̀ funfun bi òwú àti òjò dídì, ojú Rẹ̀ dàbí ẹ̀là iná. ¹⁵ Ẹsẹ̀ Rẹ dàbí Bàbàa dídán, gẹ́gẹ́ bi Bàbàa tí a ti tun rọ pẹ̀lú iná, ohùn Rẹ̀ dàbí ìró ọ̀pọ̀ omi sísàn. ¹⁶ Ó ní ìràwọ̀ méje ní apá ọ̀tún Rẹ̀, àti idà olójú méjì mímú ti ẹnu Rẹ̀ jáde. Ojú Rẹ̀ ń ràn bi òòrùn tí ó fi agbára ràn. ¹⁷ Nígbàtí mo ri, mo wólẹ̀ lẹ́bàá ẹsẹ̀ Rẹ̀ bi òkú ènìyàn. Ó gbé ọwọ́ ọ̀tún Rẹ̀ lé mi wípé, "Má bẹ̀rù. Èmi ni ìbẹ̀rẹ̀ àti òpin, ¹⁸ ẹnití ń bẹ láàyè. Mo kú, ṣùgbọ́n wòó, Mo wà láàyè laílaí! Mo ní kọ́kọ́rọ́ ikú àti ipò òkú. ¹⁹ Nítorí naa kọ ohun tí o rí sílẹ̀, ohun tí ń sẹlẹ̀ lọ́wọ́lọ́wọ́, àti ohun tí yo sẹlẹ̀ lẹ́yìn eléyìí. ²⁰ Nípa ìtumọ̀ ìràwọ̀ méje tí ó farasin tí o rí tí ó wà lọ́wọ́ ọ̀tún mi, àti ọ̀pá fìtílà méje: Àwọn ìràwọ̀ méje naa ni àwọn ángẹ́lì ìjọ méje, àti ọ̀pá fìtílà méje ni àwon ìjọ méjèje."