¹ Ẹ jẹ́ kí ìfẹ́ ará má a tẹ̀síwájú. ² Ẹ má ṣe gbàgbé àlejò ṣíṣe fún àwọn àjèjì. Nítorí láti ipaṣẹ eléyí, àwọn kan ti ṣe áńgẹ́lì ní àlejò ní àìmọ̀. ³ Ẹ rántí àwọn tí ó wà ní ẹ̀wọ̀n bí ẹni wípé a dè yín pọ̀ mọ́ wọn. Ẹ rántí àwọn tí à ún fìyà jẹ gẹ́gẹ́ bí wípé ẹ̀yin náà wà pẹ̀lu wọn nínú ara. ⁴ Ẹ jẹ́ kí gbogbo ènìyàn bu ọlá fún ìgbéyàwó. Ẹ jẹ́ kí àketè ìgbéyàwó wà ní mímọ̀, nítorí Ọlọ́run yí ò dá àwọn panságà àti àwọn alágbérè ní ẹjọ́. ⁵ Ẹ jẹ́ kí ìgbe-ayé yín jẹ́ èyí tí ó ní òmìnira kúrò lọ́wọ́ ìfẹ́ owó. Ẹ ní ìtẹ́lọ́rùn pẹ̀lú ohun gbogbo tí ẹ ní, nítorí Ọlọ́run fúnrarẹ̀ sọ wípé, "Èmi kì yò fi yín sílẹ̀, tàbí kọ̀ yín sílẹ̀." ⁶ Ẹ jẹ́ kí á ní ìtẹ́lọ́rùn kí á bàle fi ìgboyà wípé, "Ọlọ́run ni olùrànlọ́wọ́ mi; Èmi kì yíò bẹ̀rù. Kín ni ènìyàn lè ṣe fún mi?" ⁷ Ẹ kíyèsí àwọn aládarí yín, tí wọ́n sọ ọ̀rọ̀ Ọlọ́run fùn yín, kí ẹ sí kiyèsí ìwà wọn. Ẹ kọ́ kí ẹ ṣe àmúlò ìgbàgbọ́ wọn. ⁸ Jésù Kristì nì kan ni ní àná, ní òní, àti títí ayé. ⁹ Ẹ má ṣe jẹ́ kí á fi àwọn ẹ̀kọ́ àjèjì gbá yín lọ. Nítorí ohun tí ó dára ni kí á mú ọkàn wa le pẹ̀lu ore-ọ̀fẹ́, kì í ṣe nípa oúnjẹ tí kò le ran àwọn tí ó ún rìn nípa wọn lọ́wọ́. ¹⁰ Àwa ní pẹpẹ kan èyí tí àwọn tí wọ́n ṣiṣẹ́ ìsìn níbẹ̀ kò ní ẹ̀tọ́ láti jẹun níbẹ́. ¹¹ ẹ̀jẹ̀ ẹranko tí a pa fún ẹ̀ṣẹ̀ ni olóri àlúfà yíò mú wá sí ibi mímọ́ jùlọ, tí a ó sì sun ẹran ara wọn ní ìta àgọ́. ¹² Kí ó bà le ya àwọn ènìyàn sí mímọ́ nípa ẹ̀jẹ̀ òun tìkálára rẹ, Jésù pẹ̀lú jìyà ní ìta ẹnu ibodè ìlu nà. ¹³ Nítorínà ẹ jẹ́ kí á tọ̀ ọ́ lọ sí ìta ibùdò, kí á sì ru ìtìjú rẹ̀. ¹⁴ Nítorí àwa kò ní ìlú tí ó wà títí ní ìhínyí. Kàkà bẹ́ẹ̀, àwa ún wo èyí tí ó ún bọ̀. ¹⁵ Ẹ jẹ́kí á ma rúbọ ọpẹ́, ọpẹ́ ti èso ètè wa tí ó uń fi ọlá fún orúkọ rẹ̀ nígbà gbogbo, nípasẹ rẹ̀. ¹⁶ Ẹ máse gbàgbé láti má ṣe ohun rere kí ẹ sì ma ran ara yín lọ́wọ́, nítorí irú ìrúbọ yìí ni Olúwa ní inú dìdùn sí. ¹⁷ Ẹ ma gbọ́ràn sí àwọn aládarí yín lẹ́nu kí ẹ sì tẹríba fún wọn, nítorí wọ́n uń ṣe ìṣọ́ lórí ẹ̀mí yín, gẹ́gẹ́ bí ẹni tí yíò jí yìn. Ẹ gbọ́ràn kí àwọn aládarí yín le ṣe èyí pẹ̀lu ayọ̀, kì í sí ṣe pẹ̀lú ìnira, tí kò ní ànfàní kankan fún yín. ¹⁸ Ẹ ma gbàdúrà fún wa, nítorí tí àwá ní ìdánilójú wípé a ní ẹ̀rí ọkàn tí ó mọ́ àti wípé ìfẹ ọkàn wa ní láti gbe ìgbe-ayé tí ó tọ́ nínú ohun gbogbo. ¹⁹ Mó gbà yín níyànjú láti ṣe ju èyí lọ, kín bà le wá sí ọ̀dọ̀ yín ní àípẹ́. ²⁰ Ǹjẹ́ ní ìsinsìnyí kí àláfíà Ọlọ́run, eni ti ó mú olùṣọ́-àgùtàn àgbà, Jésù Olúwa wa padà wá kúrò nínu ipò òkú nípaṣẹ májẹ̀mú ẹ̀jẹ̀ tí kò ní pẹ̀kun, ²¹ kí ó ṣe yín pé pẹ̀lu ohun rere gbogbo láti le ṣe ìfẹ́ rẹ̀. Kí ó lè ṣe ohun tí ó tẹ́ ẹ lọ́rùn lójú rẹ̀ nínú wa, nípaṣẹ Jésù Krístì, ẹni tí ògo wá fún títíláí. Àmín. ²² Mo gbà yín níyànjú ará ní ìsinsìnyí, kí ẹ gba ọ̀rọ̀ ìyànjú tí mo kọ ní kùkúrú sí yín mọ́ra. ²³ Ẹ mọ èyí pé, a ti tú Tìmótíù arákùnrin wa sílẹ̀, eni tí a ó jọ dé ọ̀dọ̀ yín bí ó bá tètè dé. ²⁴ Ẹ kí gbogbo àwọn aládarí yín àti gbogbo àwọn onìgbàgbọ́. Gbogbo àwọn tí ó wá láti Ítálì kí yín. ²⁵ Ǹjẹ́ kí ore-ọ̀fẹ́ kí ó wà pẹ̀lú gbogbo yín.