¹ Дэ дэшудуйто чён, саво кхарэлпэ Адаро, дэ лэско дэшутрито дэвэс, подгия дова дывэс тэ кэрэн дова со припхэндя царё до лыла, – соб враги иудеенгирэ тэ умарэн лэн, нэ обрисия саро дякэ, со иудеи выкхэлдэ дава марибэн кэ пэскирэ враги, ² и скэдынэпэ сарэ иудеи дэ сарэ форы царёскирэ Артаксерксоскирэ тэ марэнпэ пэскирэнса врагэнса, нэ никон на выгия пэ лэндэ марибнаса, пал дова со дар лыя лэн, сарэн врагэн иудеенгирэн. ³ И сарэ шэралэ дэ сарэ форы, кэрэнас рынды царёскирэ и подрикирэнас иудеен, пал дова со дарэнас Мардохеёстыр. ⁴ Ёв сыс барыдырэса дэ царско кхэр, и лэскиро вычипэн и слава барьёлас пир сарэ форы бутыр и бутыр. ⁵ Иудеи умарэнас пэскирэн врагэн, и кэрэнас пэскирэнса врагэнса саро со камэнас. ⁶ Дэ форо Сузы, иудэи умардэ и хаскирдэ панчшэла манушэн: ⁷ и Паршандафос, и Далфонос, и Асфафос, ⁸ и Порафос, и Адальёс, и Аридафос, ⁹ и Пармашфос, и Арисаёс, и Аридаёс, и Ваиезафос– ¹⁰ дэшэн чявэн Аманоскирэн, чявэс Амадафоскирэс, врагэн иудеенгирэн, ёнэ умардэ, а пэ лэнгиро барвалыпэн на чидэ пэскиро васт. ¹¹ Дэ дова дэвэс допхэндэ царёскэ скицык умардэ манушэн до баро форо Сузы. ¹² И пхэндя царё Есвирякэ царицакэ: «До форо Сузы иудеи умардэ панчьшэла манушэн, и дэшэн чявэн Аманоскирэн. Сож тэнче ёнэ кэрдэ дэ авирта форы царёскирэ? Со камэл тыро ило? Пхэн мангэ мэ кэрава». ¹³ И пхэндя Есфирь: «Мангув тут на отпхэн мангэ мэк и тася иудеи савэ до Сузы кэрэн дова со кэрэнас дэ дава дэвэс, мэк ублавэн далэн дэшэн чявэн Аманоскирэн пэ дэмбо». ¹⁴ И припхэндя царё тэ кэрэн дякэ сыр пхэндя царица, и убладэ дэшэн чявэн Аманоскирэн. ¹⁵ И скэдынэпэ иудеи, савэ сыс до форо Сузы, до дэшуштарто дэвэс до чён Адаро, и умардэ до Сузы триншэла манушэн, а пэ лэнгиро барвалыпэн на чудэ пэскирэ васта. ¹⁶ А иудеи пир сарэ форы царёскирэ, скэдынэпэ и марэнаспэ пал пэскиро джиипэн, и выкхэлдэ дава марибэн, и сыс умардэ эфтадэша панчь барья манушэн савэ сыс врагэнса лэнгэ, а пэ лэнгиро барвалыпэн на чидэ пэскирэ васта ¹⁷ до дэшутрито дэвэс до чён Адаро. А до дэшуштарто дэвэс пирьячнэ тэ умарэнпэ, и отхинёнас и кэрдэ дэ дава дэвэс баро свэнко. ¹⁸ А иудеи савэ дживэнас до Сузы, скэдэнаспэ до дэшутрито и дэшуштарто дэвэс, и пирьячнэ тэ умарэнпэ и откхинёнас, до дэшупанчьто дэвэс кэрдэ баро свэнко. ¹⁹ Пал дава мануша савэ дживэнас до на барэ форы и до гава, кэрэнас свэнко до дэшуштарто дэвэс до чён Адоро, дава свэнко пролыджян дэ бари лош чивэн барэ скаминда и бичявэн екх екхэскэ лачипэн. ²⁰ Зачиндя Мардохеё далэ лава, и бичявдя лыла кэ сарэ иудеи пир сарэ форы царёскирэ Артаксерксоскирэ: кон пашил и кон дурал, ²¹ соб тэ авэл дава свэнко дэ дэшуштарто и дэшупанчто дэвэс дэ чён Адаро бэрш до бэрш, ²² дякэ сыр дэ далэ дэвэса иудеи выкхэлдэ марибэн кэ пэскирэ враги, и откхинынэ дэ дава чён лэнгири дар обрисия да бари лош и лэнгири бида обрисия дэ бахтало дэвэс, соб тэ кэрэн далэ дэвэса барэса свэнкоса, и тэ бичавэн екх екхэскэ лачипэн и тэ подрикирэн чёрорэн. ²³ И прылынэ иудеи далэ дэвэса и со чиндя лэнгэ Мардохеё: ²⁴ пал дова со Амано, чяво Амадафоскиро, вугеянино, враго сарэнгэ иудеенгэ, закамья тэ умарэл иудеен и чурдэлас пуро саво кхарэлпэ жрэбиё соб тэ галёл дэ саво дэвэс тэ умарэн лэн; ²⁵ и сыр явья царица ко царё, ёв припхэндя и зачиндэ до лыл, соб бида сави камья тэ кэрэл Амано иудеенгэ, обрисия пэ лэскиро шэро, и убладэ лэс и лэскирэн чявэн по дэмбо. ²⁶ Пал дава прокхардэ далэ дэвэса Пурим, лавастыр пур". И пир сарэ лава савэ сыс зачиндэ до лыла и пир дова со дыкхнэ и пириджиндэ ёнэ, ²⁷ иудеи прилынэ ваш пэскэ, и ваш саро родо, и долэ мануша савэ авэна иудеенса тэ кэрэн дава свэнко дуй дэвэс сыр зачиндо до лыл бэрш до бэрш, ²⁸ дэ далэ дэвэса тэ назабистрэн и тэ кэрэн дава свэнко родостыр ко родо, семьятыр кэ семья, до барэ фори и тыкнэ гава, и далэ дэвэса Пуримо тэ рипирэн и тэ на забистрэнлпэ дэ иудеенгиро родо. ²⁹ И чиндя царица Есфирь, чяй Абихаилоскири, и Мардохеё иудеё зорьяса сави дэя лэскэ царэ, тэ кандэн со зачиндо дэ авирто лыл пал свэнко Пуримо. ³⁰ Ёв бичявдя далэ лыла кэ сарэ иудеи дэ шэл биш эфта форы до царство Артаксерксоскирэ лавэнса акана явья миро и бахт ³¹ тэ кэрэн дава свэнко Пуримо до дова дэвэс ваш саво чидя лэнгэ иудеё Мардохеё и царица Есвирь ваш пэскэ и саро родо тэ рипирэн дэвэса сыр лэнас посто и мангэнаспэ. ³² И Есфирь припхэндя соб тэ авэл свэнко Пуримо ваш иудеенгэ, и лэс зачиндэ до лыл.