¹ Дэ дова дэвэс царё Артаксерксо отдыя Есфирякэ царицакэ, кхэр Аманоскиро саво сыс врагоса иудеенгэ, Есфирь роспхэндя царёскэ кон лакэ Мардохеё, и ёв явья ко царё. ² И злыя царё ангрусны пэскири, сави сыс ко Амано, и отдыя ла Мардохеёскэ. И чидя царица Есфирь Мардохеёс барыдырэса пэ саро со сыс ко Амано. ³ И напирьячелас Есфирь тэ мангэл царёс, и пэя лэскэ до гэра и ровэлас тэ отлыджял бида сави камья тэ кэрэл Амано, вугеянино, пэ иудеендэ. ⁴ И протырдыя царё кэ Есфирь пэскиро сумнакуно дэсто, и гадыяпэ Есфирь, и тэрдыя ангил царёстэ, ⁵ и пхэндя: «Сыр царё камэл и на холясола пэ мандэ, и мэ попэём лачипэн дэ тырэ якха, пхэн мэк зачинэн лыла, савэ рискирна лыла савэ чиндя Амано чява Амадафоскиро, вугеянино, саво камья тэ умарэл иудеен пир сарэ форы царёскирэ. ⁶ Пал дова со мангэ авэла пхаро тэ дыкхав сыр лэна тэ хасён мирэ мануша, и ило миро дукхал пал миро родо.» ⁷ И пхэндя царё Артаксерксо царицакэ Есфирякэ и иудеёскэ Мардохеёскэ:«Мэ, отдыём кхэр Аманоскиро Есфирякэ, а лэс убладэ по дэмбо пал дова, со ёв камья тэ умарэл сарэн иудеен. ⁸ Акана тумэ чинэн нэвэ лыла мирэ лавэстыр, дякэ сыр тумэ камэн, ваш иудеенгэ савэ заракхэна лэн и дэна лачё джиипэн, и чивэн пичать мирэ ангрусняса, пал дова со лыл саво чиндо мирэстыр лавэстыр и марды пичать мирэ ангрусняса, дасавэ лыла сын чячунэ.» ⁹ Царё скхардя манушэн савэ зачиндэ лыла, дэ трито чён Сивано, дэ бишта трито дэвэс, саро сыс зачиндо дякэ сыр пхэндя лэнгэ Мардохеё, ко иудеи, и сарэнгэ шэралэнгэ пир сарэ форы, савэ джян Индиятыр кэ Ефиопия – сарэ шэл биш эфта форы: пир лэнгирэ чиба пэ савэ ёнэ ракирэнас и иудеенгэ пир лэнгири чиб и лэнгиро зачиныбэн. ¹⁰ И чиндя Мардохеё лавэстыр царёскирэстыр Артаксерксостыр и пикадя царёскиряса ангрусняса пичать по лыла, и розлыджинэ далэ лыла пэ грэндэ савэ сыс ко царё тырдэ дэ штала, дэ далэ лыла сыс чиндо, ¹¹ со царё на запхэнэл иудеенгэ дэ сарэ форы тэ скэдэнпэ и тэ тэрдён пал пэскиро джиипэн, тэ хаскирэн и тэ умарэн сарэн кон гадэла пэ лэндэ васт, чяворэн и джювлен, и тэ росчёрэн лэнгиро барвалыпэн ¹² дэ екх дэвэс дэ сарэ форы царёскирэ Артаксерксоскирэ– дэ дэшутрито дэвэс дэ дэшудуйто чён, саво кхарэлпэ чён Адаро. ¹³ Далэ лыла мэк бичявэн дэ сарэ форы, сыр царёскиро лав, саво пхэндо ваш сарэнгэ манушэнгэ, соб иудеи тэ авэн готова тэ марэннпэ дэ дова дэвэс, сыр явэна лэнгирэ враги. ¹⁴ Мануша, сыгэс традынэ пэ царсконэндэ грэндэ, сыр припхэндя лэнгэ царё до баро форо Сузы. ¹⁵ И выгия Мардохеё царёстыр уридо дэ царско барвалы идя, дэ бари сумнакуны корона, дэ дрыван гожо плащо саво сыс лэстэ по псикэ. Мануша до форо Сузы сыс лошалэ. ¹⁶ Ко иудеи сыс бари лош и ёнэ сыс дрыван бахталэ. ¹⁷ Пир саро царство и дэ сарэ форы дур доджянас далэ лыла, ко иудеи сыс лош, бахт, баро свэнко и лачо дэвэс: и бут мануша савэ дживэнас дэ долэ форы лынэ тэ кхарэн пэс иудеенса пал дова со пиридарандынэ иудиендыр.