¹ Исыс до дэвэса Артаксерксоскирэ: ёв Артаксерксо сыс царёса Индиятыр кэ Ефиопия пэ шэл биш эфта форы, – ² до дэвэса сыр, сыс бэшто царё Артаксерксо пэ пэскиро царско троно, саво сыс до баро форо Сузы, ³ пэ трито бэрш сыр ёв сыс царёса скэрдя баро свэнко ваш сарэнгэ пэскирэнгэ шэралэнгэ и кон сыс паш лэндэ, ваш барэнгэ салдатэнгирэ шэралэнгэ пир Персия и Медия, и шэралэнгэ сарэ форэндыр ангил лэстэ, ⁴ ёв сыкавэлас пэскиро дрыван барвало царство и пэскиро вучипэн савэса шарэласпэ бут дэвэса – шэл охто дэвэса. ⁵ Сыр прогинэ адалэ дэвэса скэрдя царё свэнко сарэнгэ манушэнгэ, барыдырэстыр ко тыно савэ дживэнас до баро форо Сузы, свэнко дава сыс эфта дэвэса дэ садо саво сыс до дворо царёскиро: ⁶ парнэ лёнова и голубова матерьи, прыпхандэ сумнакунэ тхавэнса ко рупунэ ангрусня ико мраморна столбы: штэты пал савэ сыс пашлэ мануша сара до сумнакай и руп и дрогонэндыр барэндыр. ⁷ пьенас сумнакунэндыр тахтаендыр, и тахтая сыс савэ камэс, и вино ко царё сыс бут, пир барвалыпэн лэскиро. ⁸ Пьенас кон кицик камэлас и никон на запхэнэлас, пал дова со царё дякэ припхэндя бутярнэннгэ дэ пэскиро кхэр. ⁹ Адякэш Астинь, царица, скэрдя свэнко ваш джювлэнгэ савэ сыс до кхэр ко царё Артаксерксо. ¹⁰ Пэ эфтато дэвэс, сыр подпия царё и лэскиро ило сыс лошало виностыр, ёв пхэндя Мегуманоскэ, Бизфескэ, Харбаноскэ, Бигфескэ и Авагфоскэ,Зафароскэ и Каркасоскэ –эфта ефнухэнгэ, савэ сыс бутярннэнса ангил царёстэ Артаксерксостэ, ¹¹ тэ кхарэн царица Астинь ко царё, дэ царско корона, ваш дова соб ёй тэ сыкавэл манушэнгэ пэскиро гожыпэн, пал дова со ёй сыс дрыван гожо пэса. ¹² Нэ царица Астинь отпхэндяпэ тэ явэл ко царё, саво бичавдя кэ ёй евнухэн. И дрыван розхолясыя царё, и захачия дэ лэстэ холы. ¹³ И пхэндя царё годявирэнгэ манушенгэ савэ джинэн пуранэ законы,– пал дова со дякэ кэрэлас царё ангил сарэндэ кон джинэлас законо и сэндо, – ¹⁴ а паш лэстэ сыс Каршэно, Шефаро, Адмафо, Фарсисо, Мересо, Марсено, Мемухано – эфта шэралэ пир Персия и Мидия, ёнэ сарэ кхэтанэ роскэдэнас царска рынды: ¹⁵ «Со трэби тэ кэрас пиро законо царицаса Астинь пал дова со ёй накандыя и наявья сыр припхэндя лакэ царё Артаксерксо, сыр бичявдя кэ ёй евнухэн?» ¹⁶ И пхэндя Мемухано ангил царёстэ и шэралэндэ: «Нанэ ангил екхэстэ царёстэ банги царица Астинь, нэ ангил сарэндэ шэрэландэ и сарэндэ манушэндэ савэ дживэн пир сарэ форы царёскирэ Артаксерксоскирэ, ¹⁷ пал дова со рындо лакиро доджяла кэ сарэ джювля и тэнче ёнэ на лэна тэ кандэн и тэ полэн пэскирэн ромэн и пхэнэна: " Царё Артаксерксо припхэндя тэ явэл кэ ёв Астиль а ёй на явья". ¹⁸ И дэ дова дэвэс пхэнэна княгини Персицка и Мидийска, савэ шунэна лакиро рындо со кэрдя царица, и тенче авэла сарэнгэ шэралэнгэ холы и на лэна тэ полэн екх– екхэс. ¹⁹ Сыр камэл царё, мэк выджял лэстыр царско лав, саво авэла зачиндо до законо пир Персия и Мидия и на отлэлапэ, соб Астинь бутыр тэ назаджял ко царэ Артаксерксо, и пэ лакиро штэто тэ выкэдэн авирья царица сави лэла тэ кандэл. ²⁰ И розджялапэ лав саво припхэндя царё пир саро лэскиро баро царство, и сарэ ромня тенче лена тэ полэн и тэ кандэн пэскирэн ромэн». ²¹ И дава лав чялыя царёскэ и сарэнгэ шэралэнгэ, и кэрдя царё пир лав Мемуханоскиро. ²² И бичявдя ёв лыла пир сарэ форы царёскирэ, пир чиба пэ савэ ракирэн дэ далэ форы, соб мурша тэ авэн хулаенса дэ пэскиро кхэр.