¹ Сыр дава саро прогия, и холы прогия ко царё Артаксерксо, ёв зрипирдя пал Астинь и пал дова, со ёй кэрдя, и сэндо совэса ла сэндякирдэ. ² И пхэндэ тэрнэ мануша слуги царёскирэ; «Мэк родэн ваш царёскэ тэрнэн гожонэн чяен, ³ и мэк чивэл царё манушэн савэ лэна тэ дыкхэн до форы пир саро царство, и мэк ёнэ скэдэн тэрнэн гожонэн чяен до Сузы баро форо, до джювлитко кхэр, пал саво дыкхэл Гегаё – царско евнухо, и ёв дыкхэл пал джювлендэ. И мэк дэн лэнгэ саро, со трэби, ⁴ и чяй, сави чялёла царёскэ, авэла царица пэ Астинако штэто». И чялыя дава лав царёскэ и ёв дякэ и скэрдя. ⁵ Дэ Сузы, баро форо, сыс екх мануш, иудеё лэс кхарэнас Мардохеё, чяво Иаироско, чяво Семеёскиро, чяво Кисаскиро - вениамитянино, саво сыс пирилыджино Иерусалимостыр авиренса пленикэнца, ⁶ савэн пирилыджинэ Иехониёса, царёса Иудеякирэса, савэн пирилыджия Навуходоносоро царё Вавилонско. ⁷ Ёв выбарьякирдя Гадасса, ёй жэ сын Есфирь, чяй какэскири, дякэ сыр насыс латэ ни дая ни дадэс,и адая чяй сыс тэрны и дрыван гожо, сыр кэ ёй мэя дай и дад ла кэпэ лыя Мардохеё и выбарьякирдя сыр пэскирья чя. ⁸ И тэнче сыр выгия лав саво припхэндя царё, и сыс скэдынэ бут чяя до баро форо Сузы, до кхэр пал саво дыкхэлас Гегаё, тэнче яндэ и Есфиря до кхэр царёскиро, тэ кандэн Гэгаёс саво дыкхэл пал чяендэ. ⁹ Чалыя дая чяёри лэскэ, дякэ сыр ёй сыс дрыван гожо дэ лэскирэ якха и ёй попэя лачипэн лэстыр, и ёв пиридыя лакэ макхипэна тэ макхэлпэ и саро ваш лакиро миштыпэн и эфта джювлэн савэ лэна лакэ тэ служинэн, и ёв пирилиджия ла и лакирэн служанкэк до хэдыр штэто сава сыс до джювлитко кхэр. ¹⁰ Исфирь на роспхэнэлас катхыр ёй и савэстыр родостыр, пал дава со лакэ Мардохеё припхэндя тэ на роспхэнэл. ¹¹ Сарэ дэвэса Мардохеё явэлас кэ джювлитко кхэр, тэ уджинэл сыр састыпэн кэ Исфирь, и сыр лакэ одой дживэлпэ. ¹² И сыр поджялас дэвэс тэ заджял чякэ ко царё Артаксерксо ёй дэшудуй чёна макхэласпэ ксилэса смирна и ладано и кэрэнас лакэ саро со трэби ваш джювлэнгэ и сыр проджянас далэ дэвэса, ¹³ чяй заджялас ко царё. И саро со ёй камэлас тэ лэл пэса джювлитконэстыр кхэрэстыр до кхэр царёскиро лакэ на запхэнэнас тэ лэл пэса. ¹⁴ Бэвэляко ёй заджялас. а утроса рисёлас дэ авир джювлитко кхэр, пал саво дыкхэлас Шаазгазо, евнухо царёскиро саво дыкхэл пал ромнендыр. Ёй бутыр на заджялас ко царё, кэ дова сыр царё ла на закамэла, и ла на кхарэна пир лако лав. ¹⁵ И сыр подгия дэвэс Есфиряко, чякэ Абихаилоскирякэ, какэскири Мардохеёскири, саво выбарьякирдя ла сыр пэскирья чя, тэ джял ко царё, ёй на мангья ничи, екх дова со пхэндя лакэ Гегаё, евнухо царёскиро саво дыкхэл пал чяендэ. И чялыя Есфирь сарэнгэ кон дыкхья ла. ¹⁶ И лыджинэ Есфирь ко царё Артоксерксо, дэ лэскиро кхэр, до дэшитко чён, саво кхарэлпэ Тебефо, дэ эфтато бэрш сыр ёв сыс царёса. ¹⁷ И покамья царя Есфирья бутыр сарэндыр ромнендыр, и отлыджяласпэ кэ ёй лачипнаса бутыр сарэндыр чяендыр, и ёв вридя лакэ по шэро корона и кэрдя ла царицаса пэ Астинако штэто. ¹⁸ И кэрдя царё баро свэнко ваш пэскирэнгэ шэралэнгэ и слугэнгэ – свэнко Есвирякэ! И дэ сарэ форы ёв кэрдя свэнко, соб дэ дала дэвэса мануша тэ напокинэн налоги и роздыя лэнгэ лачипэна пэскирэ вастэстыр. ¹⁹ Сыр скэдынэ чяен авир моло, Мардохеё сыс бэшто паш царёскирэ вудары, ²⁰ Есфирь на роспхэнэлас конэскири ёй и савэстыр родостыр, сыр прыпхэндя лакэ Мардохеё, И Есвирь на выджялас лэскирэ лавэстыр, и кандэлас лэс дякэ сыр ёй дживэлас кэ ёв. ²¹ Дэ долэ дэвэса сыр сыс Мардохеё бэшто паш вудары царёскирэ, холясынэ Гавафа и Фарра, дуй царёскирэ евнухи савэ дыкхэнас пал лэскиро кхэр, ёнэ закамнэ тэ умарэн царёс Артаксерксо. ²² И уджиндя дава рындо Мардохеё. и пирипхэндя ёв саро Есфирякэ, царицакэ, а Есфирь роспхэндя царёскэ со лакэ пирипхэндя Мардохеё. ²³ И роздыкхнэ дава рындо и попэнэ кон банго, и лэн сарэн дуен убладэ и сыс зачиндо дава рындо до лыла савэ лыджянаспэ до дэвэса царёскирэ.