¹ Нэ джин, со явэна девеса пхарэ. ² Мануша авэна тэ камэн кокорэ пэс, скэмпа, пхуткирдэ, тэ надыкхэн пэ манушэндэ, лэна тэ кошэнпэ, тэ накандэн пэскирья да и дадэс, на пхэнэна наис, на пхирэн ангил Дэвлэстэ, ³ би илытка, на родэн миро, кэран бангэса авирэн, нанэ зрикирдэ, барунэ илытка, на камэна лачипэн, ⁴ здымаря, на полэн со кэрэн, бут пэ пэстэ лэн, дживэн ваш пэскэ, а Дэвлэс на камэн, ⁵ сыкавэнпэ со гинэн Дэвлэс, а зорьятыр лэскирьятыр отпхэндэпэ. А дасавэндыр отрисёв. ⁶ Пал дова со машкир лэндэ сын долэ савэ заджян до кхэра и хохаибнаса поджян ко джювля савэ дживэн до бэзэх, саво лыджял и росхачкирэл лэнгиро ило, ⁷ савэ сыклён и ни сыр на доджяна кэ дова соб тэ уджинэн чячибэн. ⁸ Адякэ сыр Ианиё и Иамриё гадэнаспэ пэ Моисеёстэ, адякэ и адалэ гадэнпэ по чячибэн, мануша хасютнэ годяса, савэ на вырикирдэ чячунэ до патябэн. ⁹ Ёнэ и дурэдыр на джяна до патябэн, долэскэ со дылныпэн лэнгиро дыкхэна всарэ, дякэж сыр кэрдяпэ долэнса . ¹⁰ Ту ж гиян пал мандэ до сыклякирибэн, до джиипэн, дэ дова кэсо мэ тырдавпэ, до патябэн, до вырикирибэн, до камлыпэн, пэ дава тэрдо, ¹¹ сыр традэнас, до пхарипэн, саво манса кэрдяпэ дэ Антиохия, дэ Икония, дэ Листра. Мэ пирилыджиём дова сыр ман традэнэ, и сарэстыр ман зракхья миро Рай. ¹² Да и сарэ, кон камэл тэ дживэл чячунэс дэ Иисусостэ Христостэ долэн лэна тэ традэн. ¹³ А захалэ мануша авэна захалэдыр , лэна тэ патян хохаибнаскэ и залыджяна до хохаибэн . ¹⁴ Ту ачпэ дэ дова, кэсо сыклякирдо и дэсо тэрдо, джинэс, савэ манушэндыр ту сыклыян, ¹⁵ и долэскэ со ту тыкнэ бэршэндытр джинэс Свэнто Лав, саво дэл тукэ годы тэ зракхэпэ пир патябэн дэ Иисусостэ Христостэ. ¹⁶ Саро свэнто Лыл пхурдыно Дэвлэскирэ Духоса и ёв сыклякирэл , сыкавэл по бангипэн, вылыджял по чячибэн, и сыкавэл сыр тэ дживэ до жужипэн, ¹⁷ тэ авэл Дэвлэскиро мануш кэ саро сыклякирдо, и тэ джинэл сыр тэ кэрэл лачё рындо .