¹ Ракирав, ту, чяворо миро, зоралёв до лачипэн, саво дэ Христостэ Иисусостэ, ² и дова со шундян мандыр ангил бутэндэ манушэндэ, дова пиридэ одолэнгэ, кон джинэла тэ сыклякирэл авирэн манушэн. ³ Лыджя пхарипэн сыр састо воино Иисусоско Христоско. ⁴ Дякэж сыр салдато трэби тэ вырикирэл саро до кандыпэн пэскирэскэ шэралэскэ и на думинэл пал джиипнытка рынды. ⁵ Нэ сыр кон прастал пало венцо и навыкхэлэл лэс, ада долэскэ со прастал нанэ пиро законо. ⁶ Кон кэрэл буты пэ маля дова перво хала лакирэ плоды. ⁷ Полэ, со мэ, ракирав, пал дова со дэла тукэ амаро Рай тэ роскэдэспэ дэ саро. ⁸ Рипир Иисусос Христос, саво вштыя мулэндыр, родостыр Давидоскирэстыр, дякэ сыр чиндо до Лав миро, ⁹ дэ саво мэ лыджяв пхарипэна ко бэшибэн. Нэ ваш Лав Дэвлэско бэшибэн нанэ. ¹⁰ Пал дава мэ саро вырикирав пал выкэдынэндэ манушэндэ, соб и ёнэ тэ дорэсэн ко зракхипэн дэ Иисусостэ Христостэ дэ вечно слава. ¹¹ Чячюно лав: " сыр амэ кхэтанэ мэям, кхэтанэ ласа и тэ дживас, ¹² сыр лыджяс пхарипэн, кхэтанэ и царствовать ласа, сыр отпхэнасапэ, тэнче и Ёв отпхэнэлапэ амэндыр, ¹³ сыр амэ хоханэ, Ёв ачкирэлпэ чячуно, пал дава со Кокоро Пэстыр на отпхэнэлапэ ." ¹⁴ Адава пририпир, и допхэн ангил Дэвлэстэ тэ на заханпэ пало лава. Адалэстыр нанэ нисаво лачипэн, а отчурдэл долэн кон шунэл. ¹⁵ Причув зор тэ авэс ангил Дэвлэстэ вырикирдо до пхарипэн, саво на дарэл и на ладжял нисавятыр бутятыр, прочивэл дром чячунэ Лавэскэ. ¹⁶ Йивьятунэ ракирибнастыр наш, пал дова со ёнэ дурэдыр отлыджян Дэвлэстыр, ¹⁷ и лава далэ сыгэс розджянпэ сыр насвалыпэн. Машкир лэндэ Имениё и Филито, ¹⁸ савэ отгинэ чячибнастыр, ракирэн, со уштыпэн мулэнгиро прогия и адалэса розмарэн патяибэн манушэнгиро. ¹⁹ Нэ зорало фундаменто Дэвлэскиро тэрдо, пэ саво чиндо: «...галыя амаро Рай, кон Лэскир» и « Мэк отджял бэзэхостыр дова кон прикхарэл лав амарэ Раескиро». ²⁰ .А дэ баро кхэр исын сумнакунэ кхорэ и рупунэ, сын и каштунэ и глинатыр. И дякэ сыр екх ваш жужыпэн а авирта важ мэлалыпэн. ²¹ А кана кон жужакирла пэс далэстыр, авэла жужо, свэнто, саво трэби Хуласкэ, важ лачё рындо тэрдо. ²² Уджя бэзэхостыр кэ саво тэрдэлпэ тэрныпэн, а тырдэпэ ко жужипэн, патябэн, камлыпэн, миро кхэтанэ долэнса кон прикхарэл амарэ Раес жужэ илэса. ²³ Дылынэ и налаче ракирибнастыр уджя, джин со дава лыджял ко кошибэн. ²⁴ Бутярнэскэ Хуласа на трэби тэ захапэ, нэ тэ авэл ковлэ илэса кэ сарэ, тэ джинэл тэ сыклякирэл, тэ авэл вырикирдо, ²⁵ нэ ковлэ лавэнса тэ допхэнэл кон захалпэ: чи надэла лэнгэ Дэвэл тэ порисён и тэ галён чячибэн, ²⁶ и ёнэ бы нашэнас бэнгэскирэстыр вастэстыр, саво ухтылдя лэн тэ кэрэн лэскири воля.