\c 1
1
ጳውሎስ እን ኣይ ውርካ ዋድማካ የሱስ ክርስቶሴ፣ ካኣይ ኬና ይእሲዬዬ እን ሺዌዬ ኣይ ናንዳካ ክያጃ ሹቃ እንካ ባሪዮ ዋናጝ፤
2
ናንዳካ ክያጃ ሹቃጝ ኬታካ ውር ጊታይካ ቶካ ባሪዮ ኬወርቀትካ ውር ጊታይካ ይሁኔን ሌምሼ ጋያ እሺ ቃቦ ሹቃ።
3
ክያጃ ሹቃ እንዻ ሃናንዳካ ውዋ ኔኒ፣ ኬኣሩጝ ኣይ ቢዛካ ዳዊት፣
4
ፕር ኬመንፐስካ ባሪዮ እን ኣይ ዋናጝ ኬእን ናሹጜ ኬኣርሼን ክያኑጝ ኬእን ኣዬ ውዋካ ባሪዮጝ ናንዳካ እን ቁዋቅቱጝ ሃናንዳካ የሱስ ክርስቶ ታቺ እን ጉዋዩጝ ።
5
ኬታይ ኔኑጝ ናንዳካ ሮጝ ኔኒ ኬኦካ ጫቃንካ ቶርሲ ፓይላ ካሺውሼ ውር ሃምካ ዋይሺኔን እን ጌዬኬ ኬታካ እምናቴ ሃጌያያ ኣይኔንካ ባሪዮዬ ይእሲኔኔ።
6
ኣይኒን እየውዻ የኣዬኬ ኦካ ጫቃንካ ውር ጊታይ ካኣይካ የሱስ ክርስቶሴ ሺዎጝ።
7
እየው ውር ጊታይ ናሺዬኬ ባሪዮዬ ኬኣይቴ ዋናዬ ጊታይ ሺዌዬ እየው ጊታይ ኣኔን ሮም ፓይላ፤ ኬሹኔ ጉዋዩ ባሪዮ፣ ኬየሱስ ክርስቶስ ታቺ እንዻ ኣይኔንካ ባሪዮዬ ሹቃቲዬ ካኣይሼ እየውባ።
8
ኬኦካ ፓይላ ሃሌምሺዬ፣ እምናት ጉዩ ናንዳካጝ ዋይኔ ኦካ ፔን ፓይላጝ፣ ናንዳካ እየው ፓይላ ሃጎሺባ ባሪዮ ናኒ ኬየሱስ ክርስቶስ።
9
ሹ ጮል ሃቃቢዬ እየው እያኑጝ፣ ኬክያጃ ሹቃካ ውዋ ሜይሺኔን ባሪዮ እን ሃዋድምሺኔ ኬሸን ክየሙጝ ሃማኚ ናኒ፤
10
ሹ ጮል ኬይሁኔን ናኒ ሃቃቢ እየውባ፤ ፕር ጋንዻ ኬቱንሲ ኬቃቦካ ባሪዮ ካቦውሼ ኣን ጉዋሬ ካኩዋዌ ሃም ጉዩጝ ሃይዌንባ።
11
ካሺሼ እየው ኣይኔንካ መንፐስ እንካ ካቻሊሺ እየው ቁዋቅትሼኑጝ፣ ሃፖሽካዽያ እየው ኩዬ ቶዬን።
12
ይንዻ ኣኔ እየዌ ኬእምናት እን ኣኔን ኦካ ኡዋው ክየም ክየሙጝ ካቁዋቅትሽ ጋጝባዬ ጊያ።
13
ጪኒጌን ናኒ ዮ፣ ኬእያይ ኣይሼ ኣን ኦካ ቶርሲ ዶኩጝ፣ ኬጌዬኬ ኦጉዩዻ ኦኬ ሹቃጝ ሹ ጁዋኑ ሃኣኔንባ እንካ ኩዋዌ ሃሚን ጉዩዻ ቃቢዬኔ፣ ዬ ሌይ ኣይ ጋኑጝ ኬእባጅቴ እን ሃርጌ ኣኑጝ ሃዎሺያ እንኬ እባጅቶጝ።
14
ውር ጊታይ ኣይ ግሪኬ ጊታይ ማር ውርካ ግሪክ ኣዬኔ፣ ናንዳካ ውር ፓካላኔ ውር ጊታይ ማር ኦኬ ጶቅሲዬኔ፣ ሃኣኔ ባጃ፤
15
ናንዳካ እየው ጊታይ ኣኔን ሮምዻ፣ ሃፖሽካዽዬ እየ።
16
ሃቦክንዺኬን ኬክያጃ ሹቃ፤ ናንዳካኦ ናንዳካ ውር ጊታይ ኣምኒ ፓይላ ካኣይሼ እንግን ባይሼኑጝ ሃቁዋቅቲካ ባሪዮ፤ ይንዻ ኬሌሜን ሜይሼ ውርካ አይሁድ፣ ኬኦይን ጩዋ ሜይሼ ቶርሲ።
17
ጫንቃል ኣዬንካ ባሪዮ ዹዋልሼና ኬክያጃ ሹቃ፤ ጫንቃል ኣዬን ኔኒዻ ካርሲኬ ሌሜኔ ሌይ ኣይ ቱንሱጝ ሃእን ኣይኬ እምናቱጝ፣ ኬእያይ ሺጜ፦ "ጫንቃል ኡፓ ኬእምናቴ" ቶኮጝ።
18
ውር ጊታይ ኬጋራቲ ጊዬይ ሃጄ ሺእሺ ኦይን ኣይን ኣይ ኣኩሉኩጝ፣ ኬናንዳካ ዎንጄል ጊዬይዬ ጋራቲ ጊዬይ ፓይላ ማኒቲካ ባሪዮ ኩምባ ኬፖላ ዶዮ፤
19
ኦይንካ ቻሊዬ ክያጃካ ባሪዮ እባጄኑጝ ኦጊዬይ ሃጃ፤ ናንዳካኦ ባሪዮ ዹዋልሼያ እንግን ጃ።
20
ካርሲኬ ኦባ ሙኔ ፔኔ ዴንታካ ባሪዮ እን ማር ጌይኔኑጝ ይንዻ ሃቁዋቅቲ እን ኔኒካ ቦንካ ቦኔ ባሪዮ ኣዬን ኔኒዬ፣ ኬኦካ ኦጊታይ ሙኖጝ ጌዬንባ ጃ፤ ዬ ውር ኦኬ ኬናካ ካይሲ እንግን ኣኔኬን።
21
ጊባጅኒን ባሪዮጝ፣ ካኒ ጎቢኬን እሺ ኬእያይ ኣዬ ባሪዮጝ፤ ካኒ ጎሺኬን እሺዻ፤ ኣይባዬ ቃቦ ጊዬይ ማቲያ ማም እያይ፤ ሸን እን ጊዬይ ማር ኦኬ ጶቅሲዬንዻ ድማ።
22
ሺጚኒን ኡዋው ሃኣያ ፓካላጝ፣ ማቲያ ኣርሹጉ፤
23
ጎቢንታካ ባሪዮ እንካ ቦንካ ቦኑጝ ኬውር እንካ ኣርሹጝ፣ ዋሼያ ሃምካ ኦይን ጋሽኪዬኬ ኩባሬ፣ ኬዳቢዬ ኬዳቢ ጊታይ ሙኔዬ ጁጁሬን ኬክያጜ።
24
ዬ ባሪዮ ኬኣርግማካ ሸን እን ጊዬይ ቋቅኬ ሴሶጝ እንግን ጋይኬ ጋጜ ካጋሽኪሼ እንግን ኤታጋን ኦኬ ጋራጝ ሳስኪዬ ኣያ እንግን ኦኬ ጋራ እን ማሬ ዋና ሻሜኑጝ።
25
ኣኩሉክ ኣዬንካ ባሪዮ ዋሼያ ሾሮ ክያኒ፤ ኦናካ ይሁኔ ባሪዮጝ እንግን ይዌና ኦጊታይ ጋሽኪዬኬ ቡዋጝ፤ ዋድምሼናዻ፤ ባሪዮ ኬቦንካ ቦን ሃኬና ጎሺዬ፤ አሜን።
26
ኬናንዳካ ዳቢ እን ባሪዮ ሳስኪዬ ኣያ እንግን ኣርግማ እን ኣይ ጋራጝ፤ ኣይኒን ሃኣጛንዻ ኦይን ኣሽክዬን ካሁሉኩሼ እንግኑጝ ውቡሼያ ሃምካ ኦይን ኣሽክዬን ካማር እንግን ሁሉኩሼኑጝ።
27
ኬእያይዻ ጁማንዻ ጎይድ ሃኣጛን ጊታይካ ኣይሼ እንግኔ ቡሌ ጆል ሃኣጛን ጊዬይ፤ ጁማንዻ ኣሽክሼያ ጋጝ ኦኬ ጋራ፤ ናንዳካ ኦኬ ጋራ ጊታይ ጋሽኪዬ ጆሎጝ ቂጣት እንካ ሁሉኩሼ እንግኑጝ ቦሼያ እንግን ኤታጋን።
28
ኬኦካ እንዻ ሳጊ ኬቃቦ ጊዬይ ኬእን ሺጜ ባሪዮ እባጄን ዎሺሽኬኑጝ፣ ኦይን ኣሽክዬን ካማር እንግን ሁሉኩሼኑጝ ካጋሽኪባዬ ባሪዮ ሳስኪዬ ኣያ እንግን ሾቦ ኬናካ ማር ኣግዬን።
29
ኬሃይናቲካ ሴሶ ፓይላ፣ ቋቋ ኬዎንጄሌ፣ ኬጋራቲዬ፣ ኬዛላሞዬ ኬጃካማዬ፤ ሃጊታኬና ቋቅኬ ምኒኔኔ፣ ውር ኒሺኔኔ፣ ጓሬኔ፣ ሱዱማዬ ጃካማዬ፤ ሃጊታኬና ኣይ ውርካ ቆፁሞዬ፣
30
ሃሳውኔ ጆል ሩዋካ ውሬ፣ ምኔ ጆሌ ባሪዮዬ፣ ይሪኔ ጆል ውሬ፣ ጊታኬና ኣይካ ጵራጵራዬ ካቃያዬ፤ ሃጊታይ ዎሼን ጉዋር እንካ ጋሽኪዬ ኦኬ ጋራዬ፤ ዋይሼንኬን ውራን ጊዬይዻ።
31
ጋይ ጊታኬና ማር ኦኬ ጶቅሲዬኔ፣ ላሊኔ ጆል ክያጃ እን ቱምዬዬ ማር ናሺማ ኣኔኔ ኣይ ጋራዬ።
32
ጊባጅኒን ህጊ ሊኪ እንካ ባሪዮ እን ሺጚ ውራን ጊታይ ኣሽክዬን ኦጊታይ ፓይላ ኣርሼን ሁሉኩሼ እንግንባጝ፣ ማር ኦጊታጝጲን ኣሽክዬኔኔ፣ ቁዋቅትሽባ ውራን ጊታይ ኣሽክዬን ኦጊታይዻ።