¹ Akʉna ŋieta Yakobhos, iya ɛnɛ garta Tamuo ko iya Alanɔ Yeso Kiristo, ko ako ŋieta ko bhornyoga ɛnɛ ɔmɔzɔ ko ramma atahanone lɔjɛn Kizayuŋɔ ² Erte kiye lemunenesa ɛnɛ dhereshi, ghɔzɔnɔgha, wassi ugga ojoyaɔ nɔŋa kironyʉŋa mele gho, ³ gaaji ugga aghayu dhaa ilawinesa ko yewisa noo eghenyetʉŋ ugga okomigho. ⁴ Gergejine maya adhija mina nɨndɛ ko ugga kɨdhɨ iyɛzɔ magatɛ juru, gimma ŋaalyoŋ. ⁵ Aji odhe ŋieta noo ŋaɔlɔmɔ ghʉrghʉri gho, nɔnɔ kɛnɛ kighin Tamu iya anye iya ŋaajɔanɛ edeine bhaɛ shallizena, ko ŋa kɨdhɨ kanye nɔnɔ. ⁶ Ko wassi nɔnɔ aghin gho, maya nɔnɔ ayɛ ko ŋaaniɔ sini ŋakeregho, gaaji nɔnɔ ghɔnɛa dhereshi ŋaeregho sini tɔ gho adhito ko ŋɔza yirsendo, ɛbɛgɛ ko atabalanɛ ushukuwe ŋɔzɛ. ⁷ Eeshi nyana nɔnɔ ɛzɛr ani, kɨdhɨ nɔnɔ ajɔa gimma ŋieta Alanɔ; ⁸ Nɔnɔ a eeza ɔwa ŋaɛzɛdhɔ, ghɨnɛji ami nɨnɛ bhaɛ. ⁹ Ghɔzɔna ghununseza shallizeno adhi ko kugɛ mɛrta ŋieta nɨndɛ abbo gho. ¹⁰ Ko ghɔnɛa ɛnɛ bhozoro maya akɔɛ mɛrta dambija alashanɛ ŋieta nɨndɛ aye gho, gaaji kɨdhɨ nɔnɔ aljoŋ hulla ko kɛza aule duya. ¹¹ Ko nɔ kɔra ajuga ko abhuri kɛna ururudho; ko kɛɛrɛa ghɨndɛ inanɛ ko shallizena nee kayɔmɔ. Ko dambija nyana lɛ, eeza ɛnɛ bhozoro kɨdhɨ ako rɛna wassi shɔ nɔnɔ ako ŋagaziseza gho. ¹² Muyugene a iya ko eeshi agɛrgɛj ironinda ggho, gaaji wassi nɔnɔ alɛ ilawinda, ko nɔnɔ alakama rʉghɨsa ko ŋɔla Tamuo osee ghɔzɔnɔghɛa elemunye nɔnɔ. ¹³ Wassi kilawiza gho, ghɔnɛi kakiye, “Tamu elawesa anda.” Tamu nɔnɔ ŋaelaweso mininde, dha nɔnɔ ilabhɔ ʉtʉmma; ¹⁴ Ko nɔ wassi odhe ilabh mininde ɛlɛ mandinya gho, nɔnɔ igili juru dha gɛra. ¹⁵ Ŋa wassi ɔlɔmɔ koi ye ʉrda gho, nɔnɔ ɔlɔ yukainesa ridhiŋu; ko ridhiŋ, ko wasssi izili ko iye abbo gho, nɔnɔ ɔlɔ yukainesa rezu. ¹⁶ Ghɔzɔnɔgha ghande, ŋakulutuŋa. ¹⁷ Ghɨna shallɛ ko anyinesa shallɛ bhaɛ ate da, aʉnanɛ lo hʉr ŋieta Baba ko iya aɛ tamua da taŋakɨa, ghɔnɛa nɔnɔ ŋaukɛ hulla rizono. ¹⁸ Nɔnɔ kabhɛra ko kanye yukainesa ko nɔŋa ɛnɛ dhereshi, iya ɛndɛ agga kegine kɛn kɛɛrɛa shallɛ adhunanɛ bhaɛ bhalɨ ɛghɛnsha. ¹⁹ Ghɔzɔnɔgha ghande, agazi nɔŋi jegi: Kɛnɛ eeza bhaɛ kɨsɨrartɔ kiye tire, ko kalie kiidhi ko kedewi kiidhi, ²⁰ nɔ dɛwisa ko eeza majɛ ŋakaʉnanɛ nɔŋa ko rʉghɨsa ɛnɛ dhereshi ami Tamu. ²¹ Ŋanyana, bhi ghɨnɛ gerre gho bhaɛ ko mininda rɛna nyana abhɔdhanyi gho, ko alakama nɔŋa kezedhiniŋɛ unda, iya ɛndɛ ɛlaniŋɛ unda. ²² Ugga ŋaɨsɨrarju nɔŋi ɛnɛ lo hɔrɔ, ko alutu elezɨa ghoo. Imɛ ga kosinʉŋa shi. ²³ Ghɔnɛi ɨsɨrar nɔŋa ko ŋaamiɔ gho ga wa kɔsɔa gho nɔnɔ adhito ko eeza ajin ŋuma nɨndɛ mirayaza. ²⁴ Ko wassi nɔnɔ ijin ɛlɛ ko iye ʉrda gho, ʉg rɛna dhogoni ko idhizo nɔŋa wa ɛndɛ ajinɛ ɛlɛ dhaa adhitone ko nya gho. ²⁵ Ko nɔ eeza ajin nɔŋa bakio juru ko anye nɔnɔ kɔzɔ juru gho, ko didi ami gi nyini gho, nɔnɔ ŋaadhizogho ɔ ghɨna wa ɨsɨga, ko ami, ko nɔnɔ kɨdhɨ umuyuge ga ami nɨnɛ gho. ²⁶ Aji ʉtʉmma anye ɛlɛa nɨndɛ kiye shallɛ ŋani ŋa kɛbhɛghɔ agaza nɨndɛ bharuja gho, nɔnɔ aluz ɛlɛa nɨndɛ ko shallizena nɨndɛ ahɔlɔŋ. ²⁷ Shallizena ko Baba naɛ alakama juru ko ga aɛ gɛrra aginyini ko kebhegi bhoyo ko tɛra eeza ghee arinɛ ko sinezi mazi ko kebhegi loja nyini azani nɔgɔ gho kiye ɛlɛa odhe.