1

¹ ህንዲትልድ ተርሰ ኢትዮጵያትል ኣኽታሲክ ላሊኽዲ ለጘረጝንዲ ለጛታ ድወልሲ መለኲ እርጋዅሊ ሲም ኣሕሽዌሮስ ኒሓከማ እርጋ ወክትድ ንሰና ኣኺዅ፣ ² እን ወክት እንድህሲ ሲም ኣሓሽዌሮስ፡ እን ኣደራሽ ሱሳንዱዅል እርጋዅ ቂጦራ ኒሕክሙዅሊ ከፍ የሰና፡ ³ ኒ፡ ሰየምሶ ኒሲዀር አመሪል ሟኳንንቲዲ ስየምዲሲ በሀር ዕዱመት እሲዅ፣ እን ዕዱመትልኻ ፋርስሩዲ ሜዶንዱዲር ዓስከርሲ ኣደደውዲ፡ ስየም ድወልዲሩዲ ናሕሹማንዲ ኒል እርግኑዅ።

⁴ ናድ፡ ርድቕ እን እዳናዅ ኒሕኩመቱዅዲ፡ ክብር እን ሕሹም ኒተኪንዲት፡ ላሊኽዲ ሰኾትረጝን ኳረድ ቋሊስዅሎም።

⁵ እና ግርጋት ነን ደኵናሰና፡ ሲም እን ኣደራሽ ሱሳንዱዅሊ እርገው ከው ናድክድ፡ ናግናይልድ ናበሀርሊ ኣኽታሲክ ኒልጝን ሕኩመቱዅ ነበክሊ ኒልው ሸጝገብ ኣትክልቲሲ ክልውሳኽ ሕዳርሊ ለጘታ ኳረድ ድያዅ ዕዱመት እሲዅ። ⁶ ጫዕዳዅዲ ኣሸለዲ፡ ሰመያዊረዲ ኣክረት፡ ጫዕዳዅዲ ሰራዅዲ ገመርድ እኝሸውሶ፡ ካትም ወርከትዅድ ጠልጠልዮ እርጉዅ፡ ኣልባስጥሮስድር፡ ጨዕዳዅ ክርጛ-እኻኺዅድር፡ ሉልድር፡ አረባ ክርጛ-እኻኺዅድር፡ አበድሳዅ ብራ ልጝኑዅሊ፡ ኒል ከፍሲሰን ደሀቡዲ ወርከሩዲ እርጉዅ። ⁷ እን ጅእስተውስኻ እራኵ ደሀቡውድ ሱኵስኑዅ፡ እን እራኵኻ ናትናቱሩ እርጉዅ፣ እን እውናር ሲሙዅልድ ጐዅ፡ እን ልጝን ሕኲመቱ ሚድኻ ገሪው እርጉዅ። ⁸ ሲምኻ ላዅሲክ ኒጀረበዅድ ኰት ሱክስድኖሉ እን ሚድሲ ላምሰውሲ ናትክ አደዶሎም እርግነዲን፣ ትእዳድ ሲሙዅድ ላዅክ ኒጀረበዅድ ኰት ጅእሮ ፈቀድሶሉ እርጉዅ።

⁹ ሲሚ ዋሽትኽር ሲም ኣሓሽዌሮስሩዅ ልጝን ሕኩመቱዅሊ ኒሰና እጝቃቕድ ዕዱመት እስረ እርግቲ።

¹⁰ ለጘትር ኳሪል፡ ሲም ሚድ ጅኦ ፈርሖሰና፣ መሁማዲ፡ ቢዝታዲ፡ ሓርቦናዲ፡ ቢግታዲ፡ ኣባግታዲ፡ ዜታርዲ፡ ካርክስዲ ነን ሲም ኣሐሽዌሮስ ጃብል ኣገልገልደው ለጘታ ሰልብስተውሲ፣ ¹¹ ሲሚ ዋሽቲ ሽኻርዲ እርግቲ እማ፡ ንር ሽኻርሲ እክዲ ስየምዲሲ ቋሊስቶ፡ ኣክሊል ሲሙዅሲ እስረ ሲም ጃብል ናቅስድኖላ ኣደድዅሎም። ¹² ሲሚ ዋሽቲ ደአም እን ሰልብስተው ድዊናዅላ ትእዳድ ሲሙዅድ እንትነስ ጉሽቲ፣ እንሲን እን ሲም ገሪዅድክ ቀጠብሱዅ።

¹³ ፍትሕዲ ዓዳትዲት ቋላዅድ ኣምራንድ ኳድጛ ወጝቀርና አርእስታዅ እርጉዅ እማ፡ ወክት ሰበትድ አርእን ህምበውሎም ልውሩዲ ጋብስትጚ፣ ¹⁴ እን ኒገባ ሱኵሩኑ እርገውኻ፣ ካርሽዲ ሼታርዲ፡ ኣድማታዲ ተርሺሽዲ፡ ሜረስዲ ማርስዲ፡ ምውካንዲ፡ እን ገሽ ሲሙዅሲ ቋለው፡ እን ሕኩመትሊኻ ጃብረድ ከፍዩኑ እርገው ለጘታ ስየም ፋርስሩዲ ሚዶንሩዲ ግናው። ¹⁵ ሲምኻ፡ “እን ሰልብስተውድ እኝሻቅሳዅሲላ ሲም ኣሓሽዌሮስሩዅ ትእዳድሲ እሲግረውድ፣ እን ፍትሕ ሰበትድ ሲሚ ዋሽቲትል ውራ ኣኺን፧” ይዅሎም።

“” ‘’

¹⁶ ኒደምቢ መሙካኻ፡ ሲምዲ መኳንቲር ጃብል ንሰናዩዅ፡ “ሲሚ ዋሽቲ ማኳንቲዲ ናውክ ምልክ ሲም ኣሓሽዌሮስሩዅ ዓጝቀይሊ መንደርተው እክዲት ግራ፡ ሲምሲ ካያ ኣኽላ ንሪ ዓገብራዅ ዩዅ። ¹⁷ እና ሲሚ እስረዅ ጋር ናውክ እኲንሊ አርእስትሮ ግን እማ፣ ናራንትትሲ ናገሸል ቃበብኖ፡ ‘ሲም ኣሓሽዌሮስ ሲሚት ኒል ናቅስድኖላ ኣደዱዅ፣ ደአም ንሪ እንትላ፡’ ይድኖ ግን። ¹⁸ ንክኻ እኲን ፋርስሩዲ ሜዶሩዲ ሲሚ እስረዅ ጋብሲ ዋስነሰና፣ ናውክ መኳንንቲ ሲሙሲ ኒሰና ይድኖሎም ግን እማ፡ ግሪዅ ቃበብነዲ ዋኸዲ ኣኽሮ ግን። ¹⁹ “ደአም፡ እን ጋብ ሲምሲ ፈርሕዳዅሉ ኣከን፡ ዋሽቲ ሲም ኣሓሽዌሮስሊ ናንዲ ደምቢ በታተን ትውግሪን ኣዋጅ ሲሙዅ ፊን፣ ኒንኻ ለውትሰጋዅ ኣኾ ፍትሕ ፋርስሩዅዲ ሜዶንዱዅዲትል ከተብስኒ፣ ኒሰናኽር ሲም ንር ሕክምሲ አሪሪሲ፡ ንርትልድ ኪድረሪሲ እውን። ²⁰ እና ኣዋጅ ኒን ሲምድ ኒውክ ኒሕክምሊ ዋስስተሰናኻ፣ ጊናዪትልድ በሀሪትል ኣኽታሲክ ህምበና እኲን ናውክ ናራንትትሲ ከበርድድኖ ግን።” ²¹ እና ኳድጟ ኒን ሲምዲ መኳንንቲዲት ፈርሕድዅሎም እማ፣ ሲምኻ ጋብ መሙካሩውሰና እሲዅ። ²² እን ድወል ሲሙልኻ ድውለቲትክ ናክታበትሰና፡ እን እክስኻ ላዅሲክ ናጋብሰና እሰ ጀዋብ እኝሻቝዅ፣ እን ኒ እኝሸቓ ጀዋብድኻ፡ ናላዅ ላዅክ ኒዕያሊ መልካይ ኣኽሮ፡ ኒእክ ጋበና ጋብድኻ ጋቢን ያዅ፣ ናትከል ገእዩዅ።