\c 1

1 ሲም ዮኣቂም ያሁዱዅ ሰየምሶ ኒሲዀር አመሪል፡ ሲም ባቢሎንዅ ናቡካደነጾር እንቶ ኢየሩሳሌምቲ ክልውዅላ። 2 ጃርኻ፡ ሲም ያሁዱዅ ዮኣቂምዲ ከለለው ኣራኵ ልጝን ሻትኵዲት ኒናንሊ ደኵሶ እውዅሉ፣ ኒኻ፡ ባቢሎንትል፡ ኒጃር ልጝንሊ አዶ ፈርዅሎም፣ እን ኒጃሩዅ ልጝን እራኵ ገምዲሰኒልኻ ገምድዅሎም። 3 ኒድ ደምቢ፡ እን ሲም ኣሽፋነዝ ሓለቓ እን ገኝሺኑዅሲ፣ እስራኤልዱ፡ እን ሲምድ ወንድድዲ እን መርሓት ጅንስልድ ኣኸውዲት ነቕስሮ አደድዅሉ፣ 4 ነንኻ፡ ኣባጥሕ፡ ናገሮብሊ ሓኵር እጝገው፡ መለምል፡ ኣኻ ምህሮስክ መሀርስድኖ ገረሰው፡ አርእጝ ሻው፡ ኒትክ ወለይዳዅድ ፈሀምድኖ ገረሰውዲ እን ልጝን ሲምዅሊ አገልገልድድኖ ባቕዓን ኣኸውዲ ግን፣ ባቢሎንዱ ጋብዲ ክታበትዲት መሀርድድኖሎምኻ አደድዅሎም። 5 እን ሲም ይኸ፡ ግርግል ናው ቋናዅዲ ናው ጀአነው ወይኒዲት እን መአዲራ ሲምዅልድ እውስትሮሎም አደድዅ፣ ነን፡ ሰዃ አመራ መሀርስኖ ደምቢ፡ እን ክድመት ሲምዅሊ ሕበርሰው ግን። 6 ነድ ነበክልኻ፡ ያሁዳ ብሪልድ እንተው፡ ዳኒኤልዲ ሃናንያዲ ሚሻኤልዲ ኣዛርያዲ እርግኑዅ፣ 7 እን ሓለቓ ገኝሺኑዃ ስጙⶖ ፍድዅሎም፣ ዳኒኤልቲ ቤልሻጽር፡ ሃናንያት ሲድራቅ፡ ሚሻኤልት ሚሳቅ፡ ኣዛርያትኻ ዓብድ-ኔጎ ዮ ስⶖዅሎም። 8 ዳኒኤልኻ፡ እን ሲሙዅ ነብራዲ ወይኒዲሲ ረዀስጊን ኒለበከድ ኰድጚዅ፣ እና ነድ ረዀስጊንኻ፡ እን ሓለቓ ገኝሺኑዅሲ ሺዊዅሉ። 9 ጃርኻ ዳኒኤልቲ እን ሓለቓ ገኝሺኑዅድ ጃብል፡ ከለብርሳዅዲ እጝከልሳዅዲ እሲዅሉ። 10 እን ሓለቓ ገኝሺኑዃ ዳኒኤልቲ፡ “ኣን እን ቊስታዅዲ ጅእስታዅዲት ደለምዳዅልኩም ይአደረስ ጒኢተኵንሉ፣ እንታ መስዋተልድ ዓበርትድኖ ቋልስትደነን፡ እንታ ሰበትድ እን ሲምልድ ይል ጨገም ገምጊንለ ጕኢተኵን።” ይዅሉ። 11 እንሲን ዳኒኤል፡ እን ሓላቓ ገኝሺኑዅድ፡ ዳኒኤልዲ ሃናንያዲ ሚሻኤልዲ ኣዛርያዲሲ ነብራ ኡሮሎም መድ እውስታዅሲሉ ንሰና ይዅሉ፣ 12 “ኳዕይብ፡ ኵገኝሺንሲ ቊስታዅ አምራዲ ዓቝዲ ካያ ኡሮ፡ ሽካ ኳረድ ወጠኒና፣ 13 ኒደምቢ፡ ገሽ ያናዅዲ እን ገሽ ነብራ ሲሙዅልድ ቋውድዅዲት መኸልትሮ፡ ኵገኝሺንሊ እንቲ ጀረብረዅስክ እሲ።” 14 ኒኻ፡ አጃ ይዅ እማ፣ ሽኳ ኳራ ወጠንዅሎም። 15 እን ሽካ ኳራ ደኮሰና፡ እን ነብራ ሲሙዅልድ ቋው ኣባጥሕልድ አወይሲ፡ ሳዅርኖኽር ናገሽ በርሆኽር ቋልስቱዅ። 16 እንሲን እን ነብራ ስኵሰንታ፡ እን ቍድኖ ወጀባዅ ነብራ ትክያዅዲ ወይኒዲት ከብሰ፡ አምራ ካያ እውዅሎም። 17 ጃርኻ፡ እና ሰጃ ኣባጥሕድ፡ አርእጝዲ ኣኻ አክትበሲ ፈህምነዲ አስተብሀልድነዲት እውዅሎም፣ ዳኒኤልኻ፡ ኣይዪ ራእይዲ ነበኺዲት ፈሀሙ እርጕዅ። 18 ናው ሲምሊ ስኵርድኖ፡ ኒየመማ ወክት ገእዮሰና፣ እን ገኝሺኑዅ ሓለቓ ነቡካድነጽርዲ ጃብል ስኵስዅሎም። 19 ሲምኻ ጋቢዅሎም፣ ናልድኻ፡ ዳኒኤልዲ ሃናንያዲ ሚሻኤልዲ ኣዛርያዲርሰና አርስላ፣ ንድኻ፡ እን ክድመት ሲሙዅሊ ሕበርሲኒዅ። 20 እን ሲም ወጝቀራዅሎም ወንቀራ፡ ኣኻ ልውርዲ አስተብሀልድነዲሲ ቋላዅድ፡ እን ንሓከማ በለድ ኒድክሊ ህምበው ልውሩዲ አርእን ሻውዲትልድ ሽካ ናንድ ኪደው ኣኽኖ አርዅሎም። 21 ዳኒኤልኻ፡ ሲም ቂሮሶ ሰየምሶ፡ ኒአመሪል ኣኽታሲ ኒል እርጕዅ።