¹ ዳዊትር ወክትድ ሰዃ ኣመራ ጉርጉርበትድ ትግር ኣኺዅ፣ እማ ዳዊት ጃርሲ ወጝቀሩዅ፡ ጃርኻ “ኒን ሳኦልድ ሰበትድር፡ እን ብር ሻኽረሪ ኒልጝን ሰበትድር ግን፡ ጊብዖንዱሲ ኲውነዲንሎም ግን” ይዅሉ። ² እንሲን ሲም ጊብዖንዱሲ ሽጘ ጋቢዅሎም፣ ጊብዖንዱ ኣሞራውያንልድ ከብተው ግራ፡ እስራኤልዱቍርልድ ኣኽኒ፣ ናው እስራኤልዱቍር ተከውድኖሎም ቆል ቱኖሎም እርግንነዲን ኣሞራውያንልድ በንሲነ ናቱ መንደርተው እርግኑዅ፣ ሳኦል ደአም እስራኤልዲ ይሁደዲሲ እርጋዅሉ ቅንዕብልድ ጐዅ ድሂስሮሎም ጀረቡ እርጉዅ፣ ³ እማ፡ ዳዊት ከው ጊብዖንዱሲ ላት ሽጞ፣ “እክ ጃሩስ ገውርትኖ መታን፡ እን እማና ገማዅኩም ዓመጭ ኣካንሊ ላጋር እስየልኩም ጀረባዅን እⶖኵዅን፣ እማ ውራ እሲንልኩም፧” ይዅሎም። ⁴ ናውኻ፡ “ሳኦልዲ ኒኣዳምዲ ህምባዅና ዋኻ ሰላዲዲ ደሃብዲሲ ገበብሳዅ ኣኽላ፣ ኒድ ንኻ ይን እስራኤልዱ ገፍልድ ላዅ ድኳ ኵኖ ጀረብነሊ” ይንዅሉ። ዳዊትኻ፡ “እማ ውራ እስየልኩም ጀረብደናኵን” ይዅሎም። ⁵ ናውኻ፡ “ሳኦል ይነት ናትክሲ ድሂስሮና ይና ነበክልድኻ ላዅ-ድኳ እስራኤልዱዅ ብሪል ኣኻ ኣካንሊ ፊዅትድ መንደርትጊን ጀረቦ እርጉዅ፣ ⁶ እማ፡ ፈደን ሳኦልዱልድ ይነድ ለጘታ ቍራቍር ደኲስሮ እዊና፡ ይጝኻ ናት ጃር ፍሪሮ ሰየማዅሉ ሲም ሳኦልዱዅ ዕርዲረትል ጊብዖንትል ጃር ጃብል ከርከርኖሎም ግን” ይንዅሉ። ሲም ዳዊትኻ፡ “ናት ደኵሶ እውየኩም ግን” ይዅሎም። ⁷ ደአም፡ ዳዊትዲ ዮናታንዲ ናሹር-ናሹ ቱናዅ ሻትክ ቆል ሟእኳቱዅ ሰበትድ፡ ዳዊት ሳኦልሲ ኒእዅረድ ዅረስ፡ ዮናታንዱዅረስ መፊቦሸቲ ደኵሶ ኡለሉ። ⁸ ኣኽን ግራ ዳዊት ኣያቍራ ሪጽጳ ሳኦልድ እዃርዳዅሉ ኣርሞንዲ መፊቦሸትዲ፡ እን ኣⶖኳ ሚካል ሳኦልድቍረድ ቍር፡ ዓድርኤል ባርዚላይድዅራ መሖላታዊራ እዃርድራዅ ናት አድዅሎም፣ ⁹ ዳዊት ነስ ናትክ ጊብዖንድውድ ደኵሶ እውዅ፣ ናውኻ ጃር ጃብል ጊሪል ከርከርንዅሎም፣ ለጘተርክኻ ላት ክርኑዅ፣ ናው ኲናዅሎምኻ፡ እን እሽርና ስክሙዅ ተርሰዅድ፡ መሽው ወክትድ እርጉዅ። ¹⁰ ሪጽጳ ኣያ ቍራኻ ንርሹሺ እን ግናደት ህምባዅ ኣካን ገቢል ማቕ አድሮ ሸሺል ወሸቕድቲ እማ ኒል ከፍ ይቲ፣ ንርኻ መሽው ተርይኒልድ ተርስረ፡ ሰሚልድ ስዋ እሲራሲክኻ፡ ገርክድ ጀከል ሰሚው ናዳግ ገምጊን፡ ቂርድኻ እንሱስ ከደኑ ቝጊንሎም ተከውሩሎም እርግቲ። ¹¹ ሪጽጳ ኣያቍራ፡ እዅና ሸልትሪ ሳኦልትሪ፡ እስረዅሲ ዳዊትድ ድዊኒዅሉ። ¹² ዳዊትኻ ፈሮ ናሽሽ ሳኦልዱዲ ዮናታን ኒዅሪውዲት ከው ያቤሽ-ጊልዓድሩልድ አዱዅ። ናው እን ሕዳር ልጝን-ሻንሩዅልድ ስዊኖሉ እርግኑዅ፣ ናው ኒል ፍልስጢምሩ፡ እን ሳኦልቲ ግልቦዓትል ኵና ግርገድ ኒል ከርከርኖሎም እርግኑዅ። ¹³ ዳዊትኻ ናሽሽ ሳኦልዱዲ ዮናታንዱዲት አዱዅ፣ ኒሰናኽር ከርከርሶ እርገው ለጘታ ግናደትስኽር እኽቡዅ፣ ¹⁴ ኒድ ደምቢ ሳልዱዅዲ ዮናታንድዅዲት አድኖ፡ ብንያም ብሪል ጼላዕ ይስቶ ሽጝስታዅ ኣካንሊ ሳኦልድ እክር አርብ ቂስሩዅሊ፡ ትእዳድ ሲሙዅድ ደቢኒዅሎም፣ ኒስ እሲናሰና፡ እን እክ ናብራ ሰበትድ ጠለይናዅ ጠሎትሲ ጃር ዋሱዅ። ¹⁵ ፍልስጢምኻ ሓዲስድ እስራኤልዲ ተሓረብኑዅ፣ ዳዊትዲ ኒዓስከር ኒዲ ገምኖ ፍልስጢምዲ ተሓረብኑዅ፣ ዳዊትኻ ቂልሱዅ። ¹⁶ ይሽቢ-ብኖብኻ፡ ኒ ራፋ ገፍልድ ኣኻዅ፡ ሰዃ ኪሎዲ ገፍዲ ናሕስልድ ከደምሳዅ እኝሽኽዲ፡ ሰፍ ሓዲስ ደበልታዅ እርጉዅ፣ ኒ፡ ዳዊቲ ኵሮሉ ሓሰቡዅ። ¹⁷ ኣቢሻይ ጽሩያዅራ ደአም እልልዅሉ፣ እን ፍልስጢማዊረስኻ ሸወጦ ክውዅሉ። እንሲን እን ዓስክር ዳዊትሩ “ቲዃ እስራኤልዱዅሲ ድሂስግሪን፣ ናንዲ ደምቢ ይነዲ ሓርብሊ ፊግ፡” ይኑዅሉ። ¹⁸ ኒድ ደምቢ ሓዲስድ፡ ጎብ ይስታዅ ኣካንሊ ፍልስጢምዲ ሓርብ ኣዂዅ፣ እንሲን ሲብካይ ሑሻታዊራኻ እን ራፋቍርልድ እርጋዅ ሳፍቲ ኵዅሉ። ¹⁹ ኰዶኽር ሊጘር ወክት ጎብ ይስታዅ ኣካንሊ ፍልስጢምዲ ሓርብ ኣዂዅ፣ ኤልሓናን ያዓሬ-ዖርጊምዅራ ቤት-ልሄምዱዅኻ፡ እን ኒእኝሽኽ ሸኺሰና ከብድ ከደምሳዅሰና እርጋዅ ጐልያድ ጋቱዅሲ ኵውዅሉ። ²⁰ ናጝር ሓዲስድ ጋትል ሓርብ ኣዂዅ፣ ኒልኻ ኣጫብዕ ኒናትቱዲ ኒልኲኵዲ ወልወልታ፡ ሺብ ናድካዅኻ ለጘርጝንዲ ሰጃ፡ እርጋዅሉ ግርዋ ኒል እርጉዅ። ንኻ ራፍትልድ እዃርሳዅ ግን። ²¹ ኒ፡ እስራኤልቲ ጀኸሰና፡ ሺምዓዅራ ዳዊትሲ ኒዳን፡ ኵዅሉ። ²² እና ሰጃ ነን ጋትልድ እዃርስኑዅ፣ ናው ዳዊትዲ ኒዓስከሩ ናንትዲሲ ለብኑዅ።