¹ ኒልኻ ላዅ ቢልያልዱዅ፡ ሸባዕ ይስታዅ ቢክሪርዱዅራ፣ ብንያማዊራ ግርዋ እርጉዅ። ንኻ፡ ይን ዳዊትል በና ሻኽኒ፣ እሴይዅሪልኻ መራስ ሻኽኒ እማ፣ ዎ እክ እስራኤልዱ፡ ላዅክ ኒልጝንሊ ወንተርን ዮ መለከት ጠዓምቡዅ። ² ናውክ እክ እስራኤልዱኻ ዳዊቲ ተለይኒልድ ወንተርኖ፡ ሸባዕ ቢክሪርዱዅረስ ተለይኑዅ፣ እን ከው ይሁደሩኻ ናሲምሊ ተከኖ ወረባ ዮርዳኖስሩዅልድ ዮርሳሌምትል ኣኽታሲክ ተለይኑዅሉ። ³ ዳዊትኻ፡ ዮርሳሌምሊ ኒልጝን ሕክሙዅሊ እንቱዅ፣ እንሲን ሲም እን ኒልጝን ሕክሙዅሲ ተከውድኖ ባሮለን እርገው ሽካ እኲን ኒሸሉሲ አድዅለን፣ ተከውስድኖኻ፡ ልጝንሊ እሰ፡ ቝሱለን እርጉዅ ግራ፣ ናል ቱላ። ናውኻ መፍልታን ኣኽኖ፡ ክርድናሲክ ኣበድስኖ እርግኑዅ። ⁴ ሲምኻ፡ ዓማሳት “ከው ይሁደሩ ናትክሲ እና ሰዃ ኳሪል፡ ይል እንትድኖ ሽጚሎም፣ እንቲኽር ናዲ እንቲ” ይዅሉ። ⁵ እንሲን ዓማሳ ከው ይሁደሩሲ ሽጝሮ ፈሩዅ፣ ኣኽን ግራ ሲም ኣደዳዅሉ ግርጋት ኣወይሲ ግጁዅ። ⁶ እንሲን ዳዊት ኣቢሻይቲ “ናን ሸባዕ ቢክሪርዱዅራ ኣቤሴሎምትልድ ጂብሮና ግን፣ ትብቲሰን ዕርዲታት እርጊን እማ፡ ይና ዕልድ ሹልቝርጊን፡ እንቲ ዓስከር ኵአደሪውሲ ኣዲ እማ ሳደዲሉ” ይዅሉ። ⁷ እንሲን ከው ዮአብሩዲ፡ ክረታውያንዲ ጵለታውያንዲ፡ ናውክ ፋርሳንዲ ኒጉርጒርበት ተለይኑዅ፡ ሸባዕ ቢክሪርዱዅረስ ሳደድኖኻ ዮርሳሌምልድ ፍኑዅ። ⁸ እን ጊብዖንትል ህምብዅ በሀር ክርጚል ገእይነሰናኻ፡ ዓማሳ አርዅሎም፣ ዮአብኻ፡ ዓስከሩዅ ኒሰረነስ ሰሮ ኒኣወይስኻ ሰፍ ኒመስከብዲ ኒየውሊ ደበልቶ እርግዅ፣ ኒገሽ ጃብራ ፈረሰንኻ፡ እን ሰፍ ኒምስከብልድ ፌ ለቡዅ። ⁹ ዮአብኻ ዓማሳት፡ “ዎ ይዳን፣ ውራ ህምብራዅን፧ ይዅሉ፣ ኒደምብኻ ዓማሳት ሰለማዅሉ ተከ ኒልው ናንድ ኒሸከምሲ ሻዅሉ። ¹⁰ ዓማሳኻ ናን ዮአብሩዅሊ ሰፍ እርገት ለበካ ግምድላ እማ፡ ጠንቐቕስላ፣ እማ ዮአብ፡ እን ሰፍሲ ኒጐድጕል ሸከትዅል፣ ኒጅልልኻ ብሪል ቡቍቲዅ፡ ሊጘር ወክት ሰብግሉኻ ክሩዅ፣ ዮአብዲ ኣቢሻይ ኒዳንድኻ ሸባዕ ቢክሪርዱዅረስ ሳደድኑዅሉ። ¹¹ ግናደት ዓማሳሩዅ ገቢል ደውየው ላዅ ከው ዮአብሩልድ፡ “ዮአቲ እጝከላዅ፡ ዳዊትሩዅ ኣኻዅ ኒውክ ዮአብቲ የለይን!” ዩዅ። ¹² እን ወክት እንድድ ግናደት ዓማሳይሩዅ ብርድ መጝከልሶ ደርብ ነበክሊ ለቦ እርጉዅ፣ እን ኒድ ደከው ዓስከር ናውክ ናደው ይነስ እና ግርዋ ቋሉዅ፡ እን ግናደትሊ ገእያዅክ ዓስከራ ደውይነት ፋሃማ ወክት፣ ግናደት ዓማሳይሩዅሲ ደርብልድ ሸሊሶ ታዊንድ ኵስዅሉ። ¹³ ግናደት ዓማሳሩዅ ደርብልድ ጌሰና፡ ናውክ እን ከው ዮአብቲ ተለይኖ ሸባዕ ቢክሪርዅረስ ሳደድድኖ ፈርኑዅ። ¹⁴ ንኻ፡ ናውክ ፈራዕ እስራኤልድዉዅድ እሰ ኣቤልዲ ለጝ-ማዓካንዱዅዲሲ፡ ናውክ በርያውያንዱውዅድ ደኵኑዅ፣ ናውኻ እክብስኖ ኒጉርጒርበት ፈርኑዅ። ¹⁵ እንትኖኻ ኣቤል ልጝን-ማዓካሩዅሊ ክልውኑዅሉ፣ እን ዕርዲረትኻ እን ንር ሐጠትዲ ድውያዅ ካሲሰና ገበርኑዅ፡ እን ዮአብዲ እርገው ናውክ ከውኻ እን ሐጠትሲ ለብድድኖሉ ሃገግድኑሉ እርግኑዅ። ¹⁶ እንሲን፣ ላሪ ኣስተብህልድረሪ እዅና፡ “ዋሳ! ዋሳ! እንታ ዓይብ ዮአብቲ ድዋዅሉ ጋር ዋነውድለ ናራ ሱክርዶ ድወል” ይቲሎም። ¹⁷ ዮአብኻ ንርትል ሱኵርዅ፣ ንርኻ፡ “ዮአብ ይስትርራኽር እንቲማ፧” ይሩ ወጝቀርቲሉ፣ ንኻ፡ “የዋ ኣንግን” ይዅላ፣ ንርኻ፡ “ይአደራ፡ እስከ ዋሲለ” ይቲሉ፣ ንኻ፡ “እናሓን ዋሳዅንኪ እⶖኵዅን” ይዅላ።

¹⁸ ኒልድ ኰድሮ ንሰና ይቲሉ፡ “እን እማኒው ከው፡ ‘ኰድጘስ ኣቤልትልድ ወጝቀራ’ ዩኑ እርግኑዅ፣ እማ፡ ናው ይናዅሰናኻ ኣዅ እርጉዅ፣ ¹⁹ ይን እስራኤልትል ሳላሙዲ እምንዱዲ ግን፣ እንቲ ደአም እስራኤልትል ገና ኣኽርደሪ ዕርዲረት ሃገግድቶ ጀረብራዅ እⶖኵረዅ፣ ውራመታን ግን እና ርስቲ ጃርትሪ ኣኽርደሪ ዕርዲረት ሃገግድቶላ ጀረብራዅን፧” ²⁰ ዮአብኻ ንሰና ይዅላ፡ “እን ድሂስነዲ ሃገግድነዲ ሺሽድኑ! ሺሽድኑ ይልድ!” ²¹ እን ጋር ኒሰና ኣኽላ፡ ሸባዕ ይስታዅ ግርዋ፡ ቢክሪርዅራ ጊራ ኤፍሬምሩዅልድ፡ ሲም ዳዊትል ኒናንሲ ጉዱዅ እማ፣ ኒት ካያ እወለ ግራ፡ እና ዕርዲረትልድ ፈርድየልኩም ግን” ይዅላ። እን እዅናኻ፡ “እን ግርዊዅ ኣዀርሲ ሐጠትድ ማልኖልካ ግን” ይቲሉ። ²² እንሲን እዅና ኣምር እንታኽታዅ ንር ኰድጘስ አድሮ ናውክ እክሊ እንትቲ፣ ኣዀር ሸባዕ ቢክሪርዱዅረስ ነተፍኖኻ ዮአብድ ማልንዅሉ፣ ኒኻ መለክት ጠዓምቡዅ እማ፡ ላዅክ እን ዕርዲረትልድ ኒልጝንሊ ዳሕዩዅ/ፈሩዅ፣ ዮአብኻ ሲምሊ ዮርሳሌምትል ወንተሩዅ። ²³ ዮአብኻ ሓለቃ ናድካ ዓስከር እስራኤልድዉዅ እርጉዅ፣ በናያ የሆያዳዅራኻ ሓለቃ ክረታውያንዱዅዲ ጵለታውይንዱዅዲ እርጉዅ። ²⁴ ኣዶራም ካየድ ከደመው ዳግሊ ሰይምሶ እርጉዅ፣ ዮሳፋጥኻ ህድግ ከተበንታ እርጉዅ። ²⁵ ሸያ ልጝን ሕክሙዅዱዅ ከተበንታ ኣዅ፣ ጻዶቅዲ ኣብያታርዲኻ ከዳታት እርግኑዅ። ²⁶ ኒሰናኽር ዒራ ያኢራዊራ፡ ዳዊትር ከዳታተልድ ላዅ እርጉዅ።