¹ ዳዊትኻ እን ጊራ ኣወይስልድ ግናዪ ዶኵ የሪት፣ እናሓን፡ ጺባ ገጂና መፊቢሸትሩዅ፡ ለጛ ሊኽ ሳንሰዓዲ፡ ሊኽ ንሽዋ ደቢቡዅዲ፡ ሊኽኻ ሕምባሸራ በልሱዅዲ፡ ላዅ ሃወት ሚድ-ዲ ጨዓንሰው ለጛ ድዃራ ሸኾ ከለብርዅሉ። ² ሲምኻ፡ “እና ነስ ናትክ ውራ መታን ናቕስርዅንሎም፧” ዮ ወጝቀርዅሉ።

ጺባኻ “ዎ ሲም! እን ድቋልሲ ኵአዳም ጨዓንስድኖለን፡ እን ሳንሰዓዲ በለስዲትኻ ሻሎት ቍድኖሎም፡ ሚድ ወይኒሩስኻ እን ኣው ከደንሊ ቂልሰው ጅእድኖሎም ዮ ግን” ይዅሉ።

³ ሲምኻ፡ “ኵኣደራ ሶኦልሲ ኒዅረድ ዅራ መፊቦሼት ኣወት ህምበኵን፧” ዮ ወጝቐርዅሉ። ጺባኻ “ኒ፡ ንኪ ልጝን እስራኤልዱዅ ሕክም ይኽርዱዅሲ ወንተስድኖለ ግን፡ ዩዅ እማ፡ ዮርሳሌምሊ ከፍ ዮ ህምበኵ” ይዅሉ። ⁴ ኒደምቢኻ፡ ሲም ጺበት “መፊቦሸትሩ ናውክ ኲድ ግናው” ይዅሉ። ጺባኻ “ዎ ይኣደራ ሲም፡ እናሓን ኣን ኵኣገልገልደንታ ግን፣ ዲማ ኵት ፈርሕዳዅ ክድመት ከደምያ መታን ተውህያ ግን!” ይዅሉ። ⁵ ሲም ዳዊት ባሑሪምትል እንተሪት፡ እናሓን፡ ሺምዓ ይስታዅ ግርዋ፡ ጌራዅራ፡ ኣሰል ሳኦልዱዅልድ፡ ንርትልድ ፊዅ። ኒ፡ እሹ ፊዅ። ⁶ እን እክዲ ፋርሳንዲ፡ ሲምሲ ኒላውዲ ኒሸገብዲሳ ዋኑኑ፡ ኒ ዳዊትልኽር ናውክ ገኝሺን ሲም ዳዊትሩልኽር ክርጝድ ድሪን ዩ እርጉዅ። ⁷ ሺምዓ ንሰና ዮ ዳዊቲ እሹሉ እርጉዅ፡ “ፊ! ነትድ ፊ! እንቲ ብርዅ አዳም፡ እንቲ እኵይ አዳም፣ ⁸ እንቲ ሳኦልዱዅ ሕክምሲ አድሮ ኒአዳም ናትክሲ ኵርዅሎም፣ እናሓን፡ ናን-ኻ ጃር ኵት ቀጽዓዅካ እⶖኵዅ፣ ጃር ኵሕክምሲ ኵዅእራ ኣቤሴሎምሲ ደኵሶ እውዅላ፡ እንቲ ርሕ ኵራኽር! እናሓን ኵድዳ ገእዩዅ።” ⁹ ኣቢሻይ ጽሩያዅራ-ኻ ሲምሲ፡ “እና ክራዅ ግድጝ ውራ መታን ግን ይአደራ ሲምሲ እሻዅንሉ፧ ኣን ፈሮ ኒኣዀርሲማ ቀረጭንሉ!” ይዅሉ።

¹⁰ ሲም ደአም፡ “እንትን ጽሩያቍር እንተዲ ይዲት አረሪሳዅ ውራ ጋር ህምበኵን፧ ጃር ‘ዳዊቲ እሺሉ’ ዮሉ እሻዅለ ኣከን፣ ‘ኒስ ውራ መታን እስሪዅን ዮ’ ኣውኒ ወጝቀርዶሉ ገረሳዅን፧” ይዅሉ። ¹¹ ተለይዶኻ ዳዊት ኣብሻይዲ መርሓትዲት ነሰና ይዅሎም፣ “ይግርፍፈልድ ፈዅ ይዅራ ኲረለ ጀረባዅ እⶖኵዅ፡ እማ-ኻ እና ብንያማዊረድ ውራ መታን ፈከርስደናዅን፧ እማ በረሉ፡ ጃር ዮሉ ግን፡ እሺን፣ ¹² ኣዊ አርእዅን፡ ጃር እና ገሞለ ህምባዅ ዓመጭሲ ቋሎ፡ እና ንኪር እሸና ኣካንሊ ትክያዅ ገውራ ኡረለ።” ¹³ ዳዊትዲ ኒአዳምድኻ ደርብድ ፈሩኑ እርግኑዅ፡ ሽምዓኻ እና ቅብለትድ ህምባዅ ጊራ ሸልድ ፈሩ እሹዅር ክርጝዲ ብተዲ ማሉሎም እርጉዅ። ¹⁴ ሲምዲ ኒት ተለዩ እርገውዲ ናውክ ወረባ ዮርድኖስሩዅሊ ገእይና ወክትሲ ቂልስኖ እርግንነዲን ኒል ፊዅኑዅ። ¹⁵ እን ወክት እንድሂሲ፡ ኣቤሴሎምዲ ከው እስራኤልዱ ናውክዲ ዮርሳሌምሊ እንትኑዅ፣ ኣሒቶፌልኻ፡ ኒዲ እርጉዅ። ¹⁶ ኣኾኻ፡ ዳዊትር እጝከልሰና ሒሻይ ኣርኪሩዅ፡ ኣቤሴሎምትል እንቶ፣ “ዎ ሲም! ዲመድ ሰየምሲ፡ ዎ ሲም! ዲመድ ሰየምሲ” ይዅሉ። ¹⁷ ኣቤሴሎምኻ ሑሻይቲ፡ “እን ኵእጝከልሱረድ ህምባዅካ እምንስና ንትል ኣኽራሲክ መኒ፧ ውራ መታን ኵእጝከልሱረዲ ፈርድላ፧” ዮ ወጝቀርዅሉ። ¹⁸ ሑሻይኻ ኣቤሴሎምቲ፡ “ኣዋህበ ኣን ኒስ እሳዅን፧ ኣን ኣኻ ወክትሊ እና እክዲ ናውክ እስራኤልዲሲ ኒሰናኽር ጃርድ ፍሪርሳዅ ኣዳምሲ ተለያኽር ግን፣ ናጝኻ ኵዲ ላት መንደርትያ ግን፣ ¹⁹ እማ-ኻ፡ ኒዅረስ ኣገልገልደገን ኣውቲ ኣገልገልድያ ግን፧ ኵእኽርቲ ኣገልገልደሰና ኵትር ኣገልገልድያካ ግን።” ²⁰ ኣቤሴሎምኻ ኣሒቶፌልቲ፡ “እስከ ኵኰድጛስ እዊ፡ ውራ እስኒን፧” ይዅሉ። ²¹ ኣሒቶፌልኻ ኣቤሴሎምቲ፡ “ልጝን ሕኲመቱዅሲ ተከውድኖ ባረውልን እኵን ኵዅርዱዲ ገኝጂ፣ ኒደምቢ እንቲ፡ ኵእኽርሲ ትክስረ እንጠርደት ንርውክ እስራኤል ዋስድኖ ግን እማ፡ እንሲን እን ኵዲ ላት ህምበውድ ናናንትት ተብሮ ግን” ይዅሉ። ²² እማ፡ ኣቤሴሎምሲ ኒልጝን ዳግ ዳስ ከደምኑዅሉ፣ ኒልኻ ኣቤሴሎም ናውክ እስራኤልዱ ቋሉኑሉ፡ ኒኽርድ እኵንዲ ትዎ ገኝጁዅ። ²³ እን ወክት እንድሂሲ፡ ኣሒቶፌል ኰድጚሱ እርገው ኰድጛ፡ ቆል ጃሩዅሰና ከለብርሱ እርጉዅ፣ ዳዊትኽር ኣኽን ኣቤሴልም ኰድጛ ኣሒቶፌልዱዅሲ ኣና ደርብድ ከለብሩኑሉ እርግኑዅ።