¹ ኒድ ደምቢ ኣቤሴሎም ሰረገላዲ ኣፍራስዲ፡ ኒሰናኽር ኒጃብ-ጃብል ጋጘው ኣⶖኵረጝ ግርው ኒሹሺ ደለምዱዅ። ² ብሪ ክሽጛ ሺባ ጐኵ እን ዕርዲረትል ቱሲሰና መራብሊ ደው ዩ እርጉዅ፣ ሲም ኒጋርሲ ቋልዶሉ ጀረባዅ፡ ዋኻ ወሪ ተካሓድና ህምባዅሉ አዳም ኒድ እንተረን፡ ኣቤሴሎም ሽጞ ኣወትልድ እንተት ዋጝቀራዅሉ፣ እን አዳም ኣዊልድ ኣከት ድሪትሉ፣ ³ ኣቤሴሎም፡ “ቋሊ፡ ኵጋር ራትዕዲ ተገባኣዅዲ ግን፣ ኣኽን ግራ፡ ሲም ኣካንሊ ኣኾ እምንድክ ቋልዶልካ ገረሳዅ እላ” ያዅሉ። ⁴ ተልይዶኽር፡ “ኣኻዅክ፡ ዋኻ ወሪ ፈርድሳዅ ጋር ህባዅሉ አዳም ይል እንትሮ እማ እምን ፈረድየሉ፡ እና ብሪል ኣዊ ፈርዳይ እሲረለ” ዩ እርጉዅ። ⁵ ኣኾኻ፡ ኒል ሰገድሮ ዮ ሱክራዅሲሉ፡ ኒናንሲ መደዶ፡ ሸኾሉ ሰለሙሉ እርጉዅ። ⁶ ኣቤሴሎምኻ፡ ፍርድ ኣርድኖ ሲምሊ እንተረውሲ ናትክ ንሰና እሱ እርጋዅ ኣኽነዲን፡ ናለበከስ ሰልብሮ ገረሱዅ። ⁷ ሰጃ ኣመራ ደምቢ ሲም ዳዊቲ ነዋ ይዅሉ፦ “ዎ ሲም! ጃርድ ትዋዅ ቆልሲ እስያ ኬብሮንትል ፈርያ ፈቀዲለ! ⁸ ኣን ኵኣገልገልደንታ ጌሹርት ዋኑ ‘ዮርሳሌምሊ ወንተስረነ ሰደቐት ሱክስየልካ ግን’ ዮ ጃርድ ቆል ትዎ እርጉዅን” ይዅሉ። ⁹ ሲምኻ፡ “ሰላምድ ፈሪ” ይዅሉ፡ ኣቤሴሎምኻ ኬብሮንትል ፈሩዅ። ¹⁰ “ኣቤሴሎም ደአም ንርውክ፡ እስራኤልትል ንሽቕ ፈሶ፡ ደሀይ መለኸቱዅ ዋስድና ወክት እንታ ደሀይሲ ክብ ስዲነ ‘ኣቤሴሎም ሲም ኬብሮንድዅ ኣኺዅ!’ ይድኖ ጨርሓ” ይኖ ድዊድኖሎም ሃቢዅ። ¹¹ ኣቤሴሎምድኻ ለጛ ሊኽ ዓደምሰው ከው ዮርሳሌምልድ ፈርኑዅ፣ ናውኻ ገራሃትድ፡ እና ጋር ሰበትድ ላሪ አርእግኒ ፈርኑዅ። ¹² ኣቤሴሎም ሰደቀት ሱክሳ ወክት፡ ንሽቃ እኝሸቆ ኣሒቶፌል ጊሎናዊረስ፡ ዳዊትር ኰድጚሰነስ፡ ዕርዲራ ጊሎትሪትል ሽጝዅሉ። እን ሸርናኻ ሒለቲቱዅ፣ እን ኣቤሴሎምዲ ፈሩኑ እርገው እክኻ በጀዅኑ ፈርኑዅ። ¹³ ላዅ ውሪሳዅ እንቶኻ፡ “ለበካ እክ እስራኤልዱዅ ኣቤሴሎምዲ ኣኺዅ” ዮ ዳዊትሲ ድዊዅሉ።

¹⁴ እንሲን ዳዊት እን ኒዲ እርገው ናትክ ኒኣገልገልደንቲት፡ “ጓ እግርንን፡ ኣቤሴሎምትልድ ፍዲሰና ሻኽኒ እማ፡ እሽሻዅድ እንቶ ጠዓምብጊና፡ በዳንኽር ናቕስጊና፡ እና ዕርዲረትኽር ሰፍድ ጠዓምብጊና፡ ኣሸሻ ነትድ ፈርንን!” ይዅሎም።

¹⁵ እን ኒኣገልገልደንትኻ፡ “ይናአደራ ሲም ፍሪራዅሲ ኒትክ እሲኖ ይን ኵኣገልገልደንቲ ደለምኖ ህምብነኵ” ይንዅሉ። ¹⁶ ሲም ናውክ ኒአዳምዲ ፊዅ፡ እኽን ግራ፡ ሲም ሽካ እኲን ሸሉሲ ልጝንሲ ተከውድኖ ባርዅለን።

¹⁷ እማ ሲም፡ ናትክ እክሲ ተለይዶ ፊዅ፡ ግናዪ ፈርኖ ድምቢኻ፡ ላኣካንሊ ደው ይኑዅ። ¹⁸ ናውክ ከው፡ ክረታውያንዲ ጵለታውያንዲ፡ ጋትውያንዲ፡ እን ጋትልድ ተለየውሉ ወልታ ሊኽ ከውዲ ተሪትኖ ሲም ጃብድ ዶኵኑዅ። ¹⁹ ሲምኻ ኢታይ ጋታዊረስ ንሰና ይዅሉ፡ “ውራ መታን ይነዲ እንትርዅን፧ ወንተሪ እማ ሲም ኣቤሴሎምዲ ኣኺ፣ እንቲ ኵላውድ ኵብሪልድ አስትሮ እንትራኽር ጋሻይ ግን፣ ²⁰ እንጀጚ እንትሮማ፡ ንኪ ይነዲ ኰለል ስየካ፡ ኣን ኣወት ፈረት ድኳ አርእሊ፡ እማ ወንተሪ፣ ኵሻንስኽር ወንተሲሎም፡ ብሕልተዲ እምንዲ ኵዲ ኣኺን” ይዅሉ። ²¹ ኢታይ ደአም ሲምሲ፡ “ዋነዅ ጃር ግን፡ ይአደራ ሲምኽር ዋነዅ ግን፣ ይአደራ ሲም ህምባ ኣካንሊ፡ ክረድ ወሪ ፊዅትድ፡ ኵኝጂና ኒል ዋኒሮ ግን” ይዅሉ።

²² ዳዊትኻ ኢታይቲ፡ “ፈሪ ጃቢትሮ ካሪ ” ይዅሉ። ኢታይ ጋታዊረዲ እን ኒዲድ እርገው ኒከው ናውክዲ ቆልዕዲኻ ካርኑዅ ²³ ናውክ እክ ናደሀይሲ ክብሲነ ስሩኑ እርግኑዅ ናው ደኵኑ እⶖጕሲ፣ ሲምኻ ኒት ተለዩ እርገውዲ ወራባ ቄድሮንዱዅሲ ካርኑዅ፡ ናውክኽር ላት ኣኽኖ እው ከደንሊ ኣኽታሲክ መርሕኑዅ። ²⁴ ካዳ ጻዶቅዲ ኒድኻ ታቦት ሟእኰት ጃሩዅሲ ሙዅረው ሌዋውያንዲ ኒል እርግኑዅ፣ ታቢት ሟእኰቱዅሲኻ፡ ከው ናውክ ዕርዲረት ባሮ ፍራሲክ ኣብያታር ገቢል ገምድንዅላ። ²⁵ ኒደምቢኻ ሲም ጻዶቅቲ፡ “እን ታቦት ጃሩዅሲ ዕርዲረትል አድሮ ወንተሪ፡ ጃር ጃብል ዓመል ኣረረን፡ ወንተስሮለ ግን፣ ኒዲ ኒመስከብዲትኻ ወንተሶ ቋሊስሮለ ግን፣ ²⁶ እጝከለሊካ የንለኻ፡ እናሓን ኣን፡ ኒድ ትክዮ ኣኾ ቋልስታዅሲክሉ እሲሮለ” ይዅሉ። ²⁷ ኒሰናኽር ሲም ከዳ ጻዶቅስቲ ነሰና ይዅሉ፡ “እንቲ ነቢራማ እኽላ፧ ሰላምድ ዕርዲረትል ወንተሪ፡ ኵዅራ ኣሒማዓጽዲ ዮናታን ኣብያታርዅረዲ ለጘርክ እንታቊርኽር እንተዲ ፈሪኒን ²⁸ ኣጝር፡ እን ንኝሽቃ ኣዶ እንተራዅ እንተልድ እንትራሲክለ፡ ኣን ሕዳር ኣውከደኑዅሊ ጨበሪያ ግን” ይዅሉ። ²⁹ እንሲን ጻዶቅዲ ኣብያታርዲ፡ ታቦት ጃሩዅሲ ዮርሳሌምሊ ወንተስንዅሉ፡ ንርትልኻ ኣኽኑዅ። ³⁰ ዳዊት ጊራ ወኸሪዅሲ ዓረጉእⶖጕሲ ስሪዅ፣ ኒኣዀርሲ ኵቶኻ፡ ሻምፍፍ እጝገት ፈሩ እርጉዅ። እን ተለየውሉ ናውክኽር ዓረጉኑ፡ ናኣዀርሲ ኵትኖ ስሩኑ እርግኑዅ። ³¹ ዳዊትኻ፡ ኣሒቶፌል እን ሸረውድ ነበክል ሕበርሰ ኣቤሴሎምዲ ህምባኵ፡ ይኑዅሉ። ዳዊትኻ፡ “ዎ ጃር! ኰድጛ ኣሒቶፌልዱዅሲ ዓወድናርሊ ለወቶሉ፡ ሺወኵንካ!” ዮ ጠለዩዅ። ³² ኣኾኻ፡ ዳዊት እን ጃርሲ ኣምለክዳ ኣካንሊ ገእያ ወክት፡ ሑሳይ ኣርኪዅራ ኒሰርጝሲ ቀደዶ ቍሻኻ ኒኣዀርሊ ነስነሶ ከለብርዶሉ እንቱዅ። ³³ ዳዊትኻ፡ “እንቲ ይት ተለይሮ ፈርደን፡ ደምቢራ ከብሲቶና ግን፣ ³⁴ እንቲ ይትካቢቶለ ገርሰራዅ፡ እን ዕርዲረትል ወንተርዶ ኣቤሴሎምቲ፡ ኵእኽርቲ ኣገልገልደሰና ኵትር እምንሶ ኣገልገልድየካ ግን ይሮ ድውረንሉ ግን፣ ኒሰናኽር ኣሒቶፌል እዋዅሉ ኰድጘስ ናፍዓጋዅ እስረን ግን፣ ³⁵ ከዳታት ጻዶቅዲ ኣብያታርድኽር ኒል ህምበናኵ፣ ልጝን ሕኩመቱዅሊ ወስረውሲ ናትክ ናድ ድዊሎም። ³⁶ ናድኽር ናቍር ኣሕማዓጽዲ ዮናታንዲ አረርሰናኵ፣ እን ዋስደናዅ ህድግ ኒትክሲኻ ናድ ሀብዲነ እኝሻቕትኖለ ገረስደናዅ።” ³⁷ ሑሳይ ዳዊትር እጝከለንታ ዕርዲረትል ትዉዅ፡ ኣቤሴሎምኽር ኒድ-ኒድ ዮርሳሌምሊ ገእዩዅ።