¹ ዳዊቱዅራ ኣቤሴሎምሲ ታማር ይስትረሪ ሽኻርዲ ሻኒ እርግቲሉ፣ ንርቲ ዳዊቱቍርልድ ላዅ ኣምኖን ይስታዅ እጝከልዅላ። ² ኣምኖን ኒሻኒ ታማርቲ ኒእጝከልኒልድ ጐዅ ሽዅዲል ገእይራሲክ ጨነቕሱዅ፣ ድንጝሊ ኣኽረውድ ንርቲ አርና ገረስተጋዅ ኣኾ አርዅሉ። ³ ኣምኖንኻ ዮናዳብ ይስታዅ ሺምዓ ዳዊትሲ ኒዳንድዅራ፡ እጝከላዅ እርጉዅሉ። ዮናዳብኻ ትክሰ ኣምር ግርዋ እርጉዅ። ⁴ ኣምኖንቲ፡ “ዎ ሲምዅራ፡ ግርጊልድ ግርጋ ኵፊዅት ናእኸ ዓበርትራኽር፡ ውራ ኣኽርደ ግን፡ ድዋለመለ፧” ዩ ወጝቐርዅሉ። ኣምኖንኻ፡ “ታማር ይዳን ኣቤሴሎምሲ ኒሺኒ እጝከሎ ግን” ይዅሉ። ⁵ ዮናዳብኻ፣ “ደአም ኒን ኣከን፡ ‘ሹዅሽቱዅን’ ይሮ ኵዓራትሊ ገኝጂ፣ ኵእኽር ወጝቀርዶካ እንተረን፡ ‘ይሻኒ ታማር እንትሮ ቋዅሉ ኡረንለ ባህ የኲለ፡ እን ቍስታዅስኽር ናራ ይገቢል ኣኽሮ ቋሉንሲክ ደለምድሮ ንር ናንድ ኰለስድቶለ፡ ኵዓይብ ኣጃ ይለ ይሮ ድዊሉ’” ይዅሉ። ⁶ እማ፡ ኣምኖን ሹዅሽታዅ ተኰ፡ ኒዓራትሊ ገኝጁዅ። ሲም ዳዊት ኣምኖንቲ ቋልዶሉ እንተሪት፡ “ኵዓይብ፡ ይሻኒ ታማር ናራ ይገቢል ቋሉንስክላ ለጛ ቅጨራ ሰንከትሮ ንር ናንድ ኰለስድቶለ እንትርን” ይዅሉ። ⁷ ዳዊትኻ፡ “ታማርቲ ልጝን ኣምኖን ኵዳንዱዅሊ ፈርዶ ነብራ ደለምዲሉ” ዮ ንሽቃ ፈስዅላ። ⁸ እማ ታማር ንርዳን ኣምኖንዱዅ ልጝንሊ ፈርቲ፡ ዕቝቱገ ሞኰታ አድሮ ቦኵዕድሮ ቋሉንሰነክላ ደለምድሮ ቅጨራ ሰንከቲሉ፣ ⁹ እን ሞቝሎረስ አድሮኻ ኒጃብል ገለበቲሉ። ኒ፡ ደአም ቍነስ ጒሹዅ፣ ኣምናንኻ፡ “ናውክ ከውሲ ነትድ ፍደሎም” ዩዅ፣ እን እርገው ከው ናውክኻ ባርኖሉ ፍኑዅ። ¹⁰ ኒደምቢ ኣምኖን ታማርቲ፣ “ኵናንድ ኰለስድቶለ ማታን እን ቝስታዅሲ ወደንሊ ቱሲሉ፡” ይዅላ። ታማርኻ እን ደለምድራዅ ነብረስ ሻኽሮ ወደንሊ፡ ንርዳን ኣምኖንትል ቱቲ። ¹¹ ቝሮ ሱክስረሰነሉ ተብዶ ሻዅላ እማ፣ “ይሻኒ ላዅ ይዲ ገኝጂ” ይዅሉ። ¹² ንራኻ፡ “ኵዓይብ ይዳን ባሪ ኣከላ! ቀሰብግለ! ነዋእ ያዅ ጋር በታተን እስራኤልትል እስተ አርእላ፡ እና ስማሳዅ ክድመትሲ እሲግ፣ ¹³ እና ስማሳዅሲ ሙዅሮ ኣንኻ ኣወት ፈሪያ ግን፧ እንትኽር ኣክረን፡ እን ዓወስ እስራኤልትል ህምበውሰና ኣኽቶማ ኣኽላ፧ እማ፡ኵዓይብ ሲምሲ ወጝቀሪሉ፡ ይት ገበበለካ፡ ኒት ድዊሉ” ይቲሉ። ¹⁴ ኒ፡ ደአም ንርቲ ዋስሮላ ጀረቢላ፣ ንርትልድ ሒለቲታዅ እርግነዲ፡ ሒልድ ዓመጭዅላ፡ ንርድኻ ገኝጁዅ። ¹⁵ ኒደምብኻ ኣምኖን ገሪዅድክ እንጠርዅላ፡ እን እማና እጝከላዅልድ ኣወይሲ እንጠርዅላ።እማ፡ ኣምኖን “ጕእ ፊለ!” ይዅላ። ¹⁶ ንርኻ፡ “ኒን ኣከላ! ይት ንሰና እስረ ዳገንደነለ ናን እስረዅ ዓገበልድ ጂባዅ ሓራም እሲቶ ግን!” ይቲሉ። ኣምኖን ደአም ዋስሮላ ጀረቢላ፣ ¹⁷ ኒሹር ኣገልገልደንተስ ሽጞ፡ “እና አይኢት ነትድ ይጃብልድ ፍዲላ እማ፡ ባብሲ አበዲሉ” ይዅሉ። ¹⁸ ኒኣገልገልደንታኻ፡ ንርቲ ፍዶላ መረስ አበዱዅሉ፣ እን ወክት እንድሂሲ ደናግል ኣኸው ሲምቍር ሰረውሉ ተካዅ ሺራዅ ቀሚሽ ሰርዶ እርግቲ። ¹⁹ ታማርኻ ንር ኣኾርሊ ቍሻ ነስነስቲ፡ እን ሺራዅ ንር ቐሚሺ ደቐይቲ፡ ኒደምቢ ንርናንሲ ንር ኣዀርሊ እስረ ስርዱ ፈርቲ። ²⁰ ንርዳን ኣቢሴሎምኻ፡ “ኵዳን ኣምኖን ኵድማ እርጉዅን፧ ዎ ይሻኒ፡ ናን ትምዪ፡ ኵዳን ኣኸውድ ላዅድ ድኳ ድዊግ” ይዅሉ። እማ ታማር ንርዳን ኣቤሴሎምዱዅ ልጝል ንርቱ ኣኽሮ መንደርትቲ። ²¹ ሲም ዳዊት ኒስ ኒትክ ዋሰሰና ገሪዅድክ ቀጠብሱዅ፣ ²² ኣቤሴሎም ኣምኖንቲ ትክያዅ ኣኽን በዳን ላቆልድኳ ጋቢለሉ፣ ውረድ ኣምኖን ኒሻኒ ታማርቲ ዓመጭነዲንላ እንጠሮሉ እርጉዅ። ²³ ኣኾኻ፡ ኣቤሴሎም ለጛ አመራ ደምቢ ኤፍሬም ገቢል ህምብረሪ በዓል-ሓጾርትል በግ መቐሰው እርግንዅሉ። ኣቤሴሎምኻ ናውክ ሲምቍርሲ ዓደምዅሎም። ²⁴ ኣቤሴሎም ሲምሊ እንቶ፡ “እናሓን፡ ኵኣገልገልደንታ በግ መቐሰው ህምበነኵለ እማ፣ ኵዓይብ፡ ሲምዲ ኒገኝሺንዲ ኵኣገልገልደንተዲ ፈሪኒን” ይዅሉ። ²⁵ ሲምኻ፡ “ዎ ይዅራ! ኣካል፡ ተቕግኒንካ ናውክ ፈርነሊኒክ፡” ይዅሉ። ንኻ ቀስብዅሉ፡ ኒ፡ ደአም ፈርዶ ጀረቢጋዅ ኣኽነዲን፡ ገውሮ ስብድዅሉ።

²⁶ እንሲን ኣቤሴሎም፡ “እማ ይዳን ኣምኖን ይነዲ ፈርን” ይዅሉ። ሲምኻ፡ “እንተዲ ውራ መታን ፈራዅን፧” ዮ ወጝቐርዅሉ። ²⁷ ኣቤሴሎምኻ ኵዓይብ ዮ ሺዊዅሉ፣ እንሲን፡ ኣምኖንዲ አሪው ሲምቍርዲ፡ ኒዲ ፈርድኖ ባርዅሎም።

²⁸ ኣቤሴሎምኻ ኒገኝሺንሲ ቋሎ፡“ቋላ፡ ለበካ ኣምኖንዱዅ ሚድድ ፈርሐሪት፡ እንሲን ለበካ ገምዳ፣ ኣን ኣምኖንቲ ‘ጠዓምበሉ የሪትኩምኻ ጒኢትጋ፡ ኵወሉ፡ ጓቝትጋ፡ ኣማ ኣኽሊ ኣደዳዅኩም፧ ተባ፡ ዳይዓንኻ ኣኻ” ይዅሎም። ²⁹ ገኝሺን ኣቤሴሎምሩኻ፡ እን ኣቤሴሎም ያዅሰነሎም እሲኒዅሉ። እንሲን እን ሲምቍር፡ ላዅክ ኒበኽሊል ጨዓንሶ እግርኑዅ። ³⁰ ናው ደርብል ዋኑኑ፡ “ኣቤሴሎም ናትክ ሲም ቍርሲ ኵውዅሎም፡ ላዅ ከብተዅ እላ” ያዅ ህድግ ሲም ዳዊትል ገእይዅሉ። ³¹ እንሲን ሲም ጐ፡ ኒሰረጝሲ ደቐዩዅ፡ ብሪልኽር ለቡዅ፣ ናውክ ኒገኝሺጝር ናሰረጝሲ ደቐይኖ ኒዲ ደውይኑዅ። ³² ዳዊትሲ ኒዳን ሺምዓዅራ ዮናዳብኻ ንሰና ዮ ጋቢዅ፦ “ሲምቍርሲ ናትክ ጀለፈትሎም እሰ ይአደራ ሓሰብጊን፡ ኒሻኒ ታማርቲ ቀስብድ ዓመጨንትልድላ ተርሰ፡ ኣቤሴሎምሩዅ አብድ ኰድጝስተ እርጋዅ ግን እማ፣ ኣምኖን ካያ ግን እን ክራዅ” ይዅሉ። ³³ እማ ናን ዎ ይአደራ ሲም፡ እን ክራዅ ኣምኖን ካያ ግን ግራ፡ ‘ናውክ ሲምቍር ኵውስትኑዅ’ ያዅ ህድግሲ እምንዶ ሻኽላ ይዅሉ።” ³⁴ እን ወክት እንድሂቲ ኣቤሴሎም እግሮ እርጉዅ። እን ተከዋዅ ግርዋኻ ቋለሰና፣ እናሓን፡ ኒጒርበትድ እን ጊራ ገፍድ ህምብረሪ ደርብድ ዮ ገሪው ከው እንተረው ቋሉዅ፣ ሲምሊ ሱኵሮኻ እን ኒ ቋለው ናትክ ድዊዅሉ። ³⁵ ዮናዳብ ዳዊቲ፡ “እናሓን፡ ሲምቍር እንትኑዅ፣ ኵገኝሺና ያዅሰና ኣኺዅ” ይዅሉ። ³⁶ ኒ፡ ኒሰ ጋበ ድጟሰና፡ ዳዊቱቍር ቱኖ ስረና ተርሲኒዅ፣ ዳዊትዲ ናውክ ኒገኝሺንዲኽር መረራዅ ስረና ስሪኒዅ። ³⁷ ኣቤሴሎምኻ እግሮ ታልማይ ዓሚሑር ሲም ጌሹርዱዅሪል ፈሩዅ። ዳዊት ደአም ኒዅረድ ዲማ ስሩሉ እርጉዅ። ³⁸ ኣቤሴሎምኻ እግሮ ጌሹርትል ፈሩዅ፣ ኒልኻ ሰዃ ኣመራ እሲዅ። ³⁹ ሲም ዳዊት ክራ ኣምኖንዱዅድ ደፍአሪት፡ ኒእዅራ ኣቤሴሎምቲ ሰፍለልትሮሉ ተርሲዅ።