¹ ጃር ናታንሲ ዳዊትልድ እኝሻቕዅሉ፣ ንኻ ዳዊትል እንቶ “ላዕርዲረትል መንደርተው ለጛ ግርው እርግኑዅ፡ እን ላዅ ርዱቕ፡ እን ላዅኻ ድቡር እርጉዅ። ² እን ርዱቕኻ፡ ገሪው በጝዲ ወስዲ እርግኑዅሉ፣ ³ እን ሓግልኻ ጅበሪላ ግናዪ በጋ ንኻ፡ ላርኽር እርግለሉ።ንኻ ለገድዅላ፡ ኒዲ ኒቍርዲዲ ለገቲ፡ ኒመኣድሪልድ ቝሩ፡ ኒኵባየትልድኻ ጅእሩ እርግቲ፣ ኒሕቝፍልኻ ገኝጀቲ፡ ኒድ ኒቝረሰና እርግቲ። ⁴ እን ርዱቕ ግርዋኻ፡ ደርቡዅ(ጋሻይ) እንተሪትሉኻ፡ እን እንታዅሉ ደርቡዅድ ኒበገልድር ኒወሰልድር አዶ ደልምድሮሉ ጀረቢላ እማ፡ እን ድቡሩዅ በገት አዶ እን ደርቡዅድ ደለምድዅላ። ⁵ እንሲን ቀጥብ ዳዊቱዅ እን ግርዊል ትክሰ ሓውዩዅ፣ ናታንቲ፡ “ህምባዅ ጃር ግን፡ ኒስ እሰዅ አዳምቲ ክራ አስተሀላዅሉ! ⁶ እና ጋር ኒስ እሲነዲጝር፡ ራሓምግነዲጝር፡ እን በጋ ኣካንሊ ሰጃ እሰ ፈደይሮ ሻዅ ይዅሉ።” ⁷ እንሲን ናታን ዳውትሲ “እና ግርዋ ኒን እንቲ ግን! ጃር እስራኤልዱዅ ንሰና ያኵ፦‘እስራኤልድ ኣወይሲ ሲም ኣኽቶ ኣን ቐብእዅንካ፡ ናን ሳኦልዱዅልድር ደአንድዅንካ። ⁸ ልጝን ኵአደሪዅስኽር ኡዅንካ፡ እኵን ኵአደሪውስኻ ኵሕቝፍሊ ኡዅንካ፡ ልጝን እስራኤልዱዅዲ ይሁደሩዅዲትኽር ኡዅንካ። ኒን ሹጓንካኻ፡ ኒሰና አሪዅ ኰድሪድካ ሻኽር ግን። ⁹ ውራ መታን ግን፡ እን ጃርሊ በዳን ኣኾ ቋልስታዅሲ እሲቶ፡ ኒቆልሲ ቃበብሩዅን፣ ኡርያ ሔታዊረስ ሰፍድ ኵሮ፡ ኒእዅነት ኵእዅና ኣኽቶ አድርዅሉ። ኒትኻ ሰፍ ዓሞድቍርዅድ ኵሩዅሉ። ¹⁰ ይት ቃበብርነዲንለ፡ እዅና ኡርያ ሔታዊሪቝት ኵእዅና ኣኽቶ አድርዅላ፣ እማ፡ ሰፍ ዲማ ዳይምድ ኵልጝንልድ ሲረላ። ¹¹ “ጃር ንሰና ያኵ፡ ‘እናሓን ኵልጝንልድ በዳ ጋር ጒድየልካ ግን፡ ኵእኲንሲ ኵጃብል አዶ ኵጨረድ እውየሉ ግን፣ ንኻ ኵእኲንዲ፡ እና በርህ ኳራዅ ጃብል ገኝጅሮ ግን። ¹² እንቲ ትብታንድ እስሪዅሉ፣ ኣጝኻ፡ እና ጋርኒስ ናውክ እስራኤልዱ ጃብል በርህድ እስየሉ ግን።’ ” ¹³ እንሲን ዳዊት ናትንሲ፡ “ጃርሲ ዓገብዅን” ይዅሉ። ናታንኻ ንሰና ይዅሉ፡ “ጃር ኵሓራምሲ ሺሽድዅልካ፡ እንቲ ክረላኒክ፣ ¹⁴ ኒስ ኵእስነድ፡ ኣፋይቲ ጃሩ፡ ጃርሲ ስዳውድኖ እስሪነዲን፣ እን እዃርሳዅ ቍራ ክርዶ ግን” ይዅሉ። ¹⁵ ናታን ኒልጝንሊ ፈረሪት፡ እን እዅና ኡርየትሪ ዳዊትሲ እዃርዳዅሉ ቍረስ፡ ጃር ተቓዅ(ተባዅ) ሹዅዲል ማልዅሉ። ¹⁶ እንሲን ዳዊት እን ዓለታ ሰበትድ ጃርሊ ጠለዩዅ፣ ዳዊትኻ ሹም ሹሙዅ፡ ትዎኻ ብሪል በጥዮ ኪዅ። ¹⁷ እን በህሊል ኒልጝኑኻ ብሪልድ ጒድኖሉ ኒገቢል ደውይኑዅ፣ ኒ ደአም ጒሹዅ፡ ሳንሰዓኽር ናዲ ቍላ። ¹⁸ ኣኾኻ፡ ለጘተር ኳረድ እን ዓለታ ክሩዅ፣ ዳዊትር ኒገኝሺንድኻ፡ “እናሓን፡ ርሕድ ዋኑ ድውነዅሲሉ ዳዊት ዋስለና እማ ናን እን ዓለተሩዅ ክረስ ኣዋህብነ ድዊኖሉ ገረስነኵ፧ ኒ ፊዅትሊ በዳን እሲጊን” ይኖ ጋቢድኖሉ ጒኢትኑዅ። ¹⁹ ዳዊት እን ኒገኝሺን ናሹር-ናሹ ትሕም-ትሕም ይኑ ቋለሰና፡ እን ዓለታ ከረት ፈሀሙዅ። ዳዊትኻ ኒገኝሺንሲ፡ “እን ዓለታ ክሮማ፧” ዮ ወጝቀርዅሎም። ናውኻ፡ “የዋ ክሩዅ” ይኑዅሉ። ²⁰ እንሲን ዳዊት ብሪልድ ጐ፡ እጝቃሩዅር ሸምትሱዅር፡ ኒሰረጝስኽር ለወቱዅ፡ ልጝን ጃሩዅሊ ትዎኻ ፍግም ዩዅ። ኒልጝንሊ እንቶኻ ቍስታዅ ሱኲስድኖሉ ጀረቢዅ፡ ሳንሰዓ ሱኵስኑዅሉ እማ ቍዅ። ²¹ እንሲን እን ኒገኝሺን፡ “እና እንቲ እስራዅ ጋር ውረኒ ግን፧ እን ዓለታ ርሕድ ዋኑ ኒመታን ሹምሩዅር ስርዲዅር፡ እን ዓለታ ክረሪትኻ፡ ጕሮ ነብራ ቍሩዅ” ይኖ ወጝቀርኑዅሉ።

²² ንኻ፡ “እምንድክ፡ እን ዓለታ ርሕድ ዋኑ‘ጃር ብሕል ዮለ እን ዓለታ ርሕድ መንደርትራ’ ዮ ሹምዅጝር፡ ስሪዅጝር። ²³ ናን ደአም፡ እን ዓለታ ክሩዅ፣ ውራ መታን ሹማዅን፧ ወንትሶማ ናቕስየሉ ገረሳኵን፧ ኣን ኒል ፈራዅን ግራ፣ ኒ፡ ይል ወንተረላ!” ዩዅ። ²⁴ ዳዊትኻ ኒእዅና ባትሴባት ደፍእድዅላ፡ ንርትል ትዎኻ ንርዲ ገኝጁዅ እማ፡ ቍራኻ እዃርቲ፡ ኒሱⶖስኻ ሰሎሞን ዮ ሽጝዅሉ፡ ጃርኽር እጝከልዅል። ²⁵ ጃር እን ዓለተስ እጝከልነዲንሉ የዲድያ ይስቶ ሽጝስትሮ መታን ነቢራ ናታንድ ቆል እኝሻቝዅ። ²⁶ እን ወክት እንድሂሲ ዮኣብ ራባ ይስትሮ ሽጝስትረሪ ዕርዲራ ዓሞንትሪት ሻኽሮ ተሓረቡዅ፡ እን ዕርዲራ ሲምትሪትኻ አድዅላ። ²⁷ ኒደምብኻ፡ ዮኣብ ንሰና ዮ ዳዊትል ንኝሽቃ ፈሱዅ፦“ራባቲ ታሓረብዅንላ እማ፡ እን ዕርዲራ ዓቝትሪት ሻዅንላ፣ ²⁸ እማ ናን፡ ኣን እን ዕርዲረት ሻኽጊንላ እማ፣ ይሱⶖድ ሽጝስትግሪን፡እን ከብተው ዓስከርሲ እክብሮ፡ እን ዕርዲረት ክልዊላ እማ ሸኺላ” ይዅሉ። ²⁹ ዳዊትኻ፡ ናውክ ኒዓስከርሲ እክቦ ራባትል ፈሩዅ እማ፡ ተሓረቦ ሻዅላ። ³⁰ ኣክሊል ሲሙዅሲኻ ኒኣኾርልድ አድዅሉ፡ ኒሚዛንኻ ሰዀርጝንዲ ኣⶖኳ መዘንሳዅ እርጉዅ፡ ካብራን ዑንቍታትኽር እርግዅሉ፡ ኣዀር ዳዊቱዅሊኻ እሲኒዅሉ።እን ዕርዲረትልድኻ ገሪው ሰልብስተው ፍዱዅ። ³¹ እን ንርትል እርገው ከውስኻ ፍዶ መሻርድ ቀረጨውዲ፡ ሰረገላታት ሸኺው እሰውዲ፡ ሻኽ ሸኪደውዲ እሲዅሎም፣ ጦብ ፍሩሙልኽር ደኵስዅሎም። ናትክ ዕርዲታት ዓሞንዱስኽር ኒሰንስ እሲዅለን። ኒደምቢ፡ ዳዊትዲ፡ እን ኒዲ እርገው ናውክ ከውዲ፡ ኢዮርሳሌምሊ ወንተርኑዅ።