¹ وبعدها قلت : " إسمعو ياقادة يعقوب ، يا حكام بني إسرائيل . لازم ماتدرو بالحق . ² أنتو ياللي بتكرهو الخير ، وبتحبو الشر ، وبتسلخو جلد شعبي ، وبتنتزعو لحمهم من عظامهم . ³ أنتو بتأكلو لحم شعبي ، وبتنتزعو الجلد منهم ، وبتكسرو عظامهم ، وبتقطعوهم ساع اللحم في وعا او في مقلى .. ⁴ ولهاذا حين تصرخو للمولى ، ما بيجاوبكمش . مابلا في هاذك الوقت بيحجب وجهه عليكم بسبب أعمالكم الشريرة .. " ⁵ وقال الله : هولا الأنبياء اللي بيضللو شعبي ، إن كان الواحد بيشبعهم يداعو له بالسلام ، وإن كان ما بيأكلهمش بيعلنو عليه الحرب ⁶ ولهاذا بيجي عليكم الليل وما تبسروش الرؤيا ، ويحل عليكم الظلام ولا تتنبأو ، وتغرب الشمس على الأنبياء ، ويظلم عليهم ⁷ النها فيخزى الراؤون ، ويخزى اللي بيمارسو العلم بالغيب . وكلهم بيغطو أشنابهم ، لأن الله مابيجاوبهمش " .. ⁸ أما انا فمليان بقوة روح الله وبالحق والقدرة ، علميد أحاكي بيت يعقوب على ذنبهم ، وبني إسرائيل على خطايهم .. ⁹ وأسمعو هاذا يا قادة يعقوب ، يا حكام بني إسرائيل . أنتو بتحتقرو العدل وبتحرفو الحق .. ¹⁰ أنتو بتبنو القدس على سفك الدم والظلم .. ¹¹ ياكل القادة ، أنتو بتتقاضو مقابل الرشوة ! ياكل الأحبار ، أنتو بتشتغلو مقابل أجرة ! ياكل الأنبياء ، أنتو بتتنبأو مقابل الفضة ! ومع هاذا بتتوكلو على الله وتقولو : الله معانا . ما عجيش علينا المصايب .. " ¹² لكن بسببكم بتحرث القدس ساع المزارعة ، وتوقع أنقاض ، وجبل بيت الله يوقع تل في الغابة ..