¹ والويل لمن بيدبرو السوء ، ولمن بيتأمرو بالشر في فراشهم . ولاما يطلع نور الفجر بينقذوه ، لأنهو بين أيديهم .. ² وبيشتهو المزارع وبيغتصبوها ، والبيوت وبيشلوها . ويتحايلو على واحد علميد يشلو بيته ، وعلى الثاني علميد يحرموه من ورثه .. ³ ولهاذا قال المولى : " شادبر لهاذا الشعب مصيبة ما عتقدروش تنقذو أنفسكم منها ، ولا حتى تخطو بكبرياء ، لأنهو هاذا الزمن قدو شوعة .. ⁴ وفي هاذك اليوم عيستهزي الناس عليكم ويقولو : " خربنا كلنا بالكامل ، أدى الله النصيب حق شعبي للثانين . وشله مننا ، وقسم مزارعنا والحقول لأعدائنا ! "‘ .. ⁵ فما يوقعش لأي واحد منكم نصيب بين جماعة الله .. ⁶ ويقولو لي : " لا تتنبأش ، " لا تتنبأش بهاذه الأمور لأنهو عيلحق العار فينا .." ⁷ مابلا لازم ما نسأل يا بيت يعقوب ونقول : " هل قد كمل صبر روح الله ؟ وهل هي هاذه أفعاله ؟ ،،، "وهل مشهو كلامي صالح لمن بيفعل الحق ؟ .. ⁸ ولكن قبل فترة قريبة قام شعبي ساع العدو . وبينزعو الرداء على الماشيين في الطريق بأمان ، ووقعو كأنهم سعما اللي عادهم رجعو من الحرب .. ⁹ وبتطردو نسوان شعبي من بيوتهن المريحة ، وبتحرمو عيالهن من بركتي لا يوم الدين .. ¹⁰ قومو وسيرو من هانا ! فهاذه مشهي بقعة للراحة لكم ، لأنهو تنجس وخرب ولا عتقدرو تصلحوه .. ¹¹ ولو جاء واحد كذاب مخادع وبيفتري ويقول : أتنبأ بأنكم عيوقعلكم الخمر والمسكرات وتكون متوفرة ، لا كان يوقع هو نبي هاذا الشعب ! . ¹² شاجمع شملكم يابيت يعقوب ، وأجمع اللي بقيو من بني إسرائيل ، وأضمهم سوا ساع الغنم في الحظيرة ، وساع القطيع في مراعيه ، وتمتلي البقعة بالناس .. ¹³ ويسبقهم فاتح الطريق ، فيكسرو البوابة ويخرجو ويروحولهم. ملكهم يسير قدامهم ، والمولى بيسبقهم كلهم " .