¹ . وفي اليوم الثالث، لبست أستير لبسها الملكي وريعت للملك في قاعته الخاصة ، وقدام العرش الملكي في القصر، وكان الملك جالس فوق عرشه وعرشه مقابل للمدخل .. ² ولاما أبسر الملك أستير الملكة مورعة له في القاعة، فرح فيها ومدلها العصية الذهب اللي في يده . وقربت أستير ولمست طرف العصية .. ³ وقلها الملك : مالش ي ملكة أستير ؟ ماهو طلبش وانا اديهلش حتى لو توقع نص المملكة ⁴ وقالت أستير : إذا انت عتوافق ي حضرة الملك ، أشتيك تجي انت وهامان اليوم للعزومة اللي فعلتها لك .. ⁵ . وقال الملك : ادوا لي هامان فيسع علميد نفعل ما قالت لنا أستير . وجاء الملك وهامان للعزومة اللي سبرتها أستير .. ⁶ . ولاما قدهم بيشربوا الخمر ، قال الملك لأستير : ماهو سؤالش وانا اديهلش ؟ وماهو طلبش وانا انفذه ، وحتى لو توقع نص المملكة ؟ .. ⁷ . وجاوبت أستير وقالت : هاذا هو سؤالي وطلبي ، .. ⁸ . اذا عتكون راضي عليا ي سيدي الملك ، وإذا عترضى انك عتديلي ما شسئلك وتنفذ ما عتطلبك ، فلو سمحت ي سيدي الملك، اشتيك تجي انت وهامان للعزومة اللي شفعلها لكم غطوة . وبعدها شا أجاوبك على سؤالك .. ⁹ . وخرج هامان ذياك اليوم وهو فارح وقلبه مسرور . ليكن هو لاما ابسر ¹⁰ مردخاي قدام الباب حق الملك وما قامش ولا عبره ، حقد على مردخاي من داخل قلبه .. .. ¹¹ . ليكن هامان مسك نفسه واعصابه ورجع بيته ، ورسل ناس يدوا أصحابه ومرته زرش .. ¹² . وقام يزنط قدامهم ويحاكيهم على زلطه وغناه الكبير وان عياله خيرات وكيف عامله الملك واكرمه قوي ورقاه من فوق العظماء حق الملك واعوانه .. ¹³ . وقال هامان : لدرجة أن الملكة أستير عزمتني أنا والملك للعزومة اللي سبرتها لوحدنا . ! وزد عزمتني لعزومة ثانية مع الملك غطوة ! .. ¹⁴ . لكن كل هاذا ماعجبنيش ، مادام وعادنا بين ابسر هاذك اليهودي مردخاي بيشتغل عند باب الملك ! .. . وقالت له مرته زرش وكل اصحابه : افعلوا مشنقه من الخشب ارتفاعها ٢٥متر . والصبح شاطلب من الملك يشنق مردخاي فيها . وبعدها ادخل انت والملك للعزومة وانت فارح . وأعجبت هامان الفكرة ، وأمرهم يسبروا المشنقة ..