² وقالوا له رجاله اللي بيخدموه : أسمح لنا ي ملك ، ندور لك بنات عادهن بكر وحاليات .. . ¹ ٢. وبعد فترة من الوقت ، هدي الملك حشوير من ضيقه وهمه . وعادو الملكة وشتي إلا ذكرت مافعلت وما حكموا فيه عليها .. . ³ وتختار موكلين من كل الولاية في مملكتك، ويجوا ويدوا كل البنات البكر والحاليات لا داخل جناح النسوان في قلعة شوشن . ويجلسين هناك ويشرف عليهن هيجاي مرافق الملك والمسؤل على النسوان ، ويديلهن كل مايلزمهن من أدوات التجميل .. . ⁴ والبنت اللي عتعجب الملك ، عتوقع ملكة بدل الملكة وشتي . وأبسر الملك بأن الفكرة حالية وناسبته واعجبته وعيفعل سعما قالوا له .. ⁵ وكان به في قلعة شوشن رجال يهودي من قبيلة بنيمين ، واسمه مردخاي أبن يائر أبن شمعي أبن قيس .. . ⁶ اللي كان مئسور عندهم من القدس مع باقي المجموعة المئسورين اللي شلهم 《 نبوخذ 》 نصر ملك بابل ، مع يوياكين ملك يهوذا .. . ⁷ وكان مردخاي بيربي بنت عمه 《 هدسة 》اللي هي أستير ، لانهو ماعدبش معاها لا أب ولا أم يتيمة . وكانت البنت حالية وجميلة بأقوى قوة ، وحين ماتوا أبوها وأمها تبناها مردخاي .. ⁸ وانتشر قرار الملك وأوامره ، وجمعوا بنات خيرات لا قلعة شوشن وبأشراف هيجاي المسئول على البنات والنسوان .. . ⁹ وأعجبت البنت هيجاي وكسبت رضاه ، واسرع ودالها ماتشتي من أدوات تجميل، وأكلها خاص ، وأختار لها ٧ خادمات من قصر الملك ، ونقلها هي والخادمات حقها لا أحلى وأحسن بقعه في جناح النسوان ، وماقد تحاكتش أستير عن أصلها وفصلها ، لأن مردخاي وصاها وقلها لاتحاكيش احد . ¹⁰ وكان مردخاي بيلوي كل يوم قدام الساحة اللي فيها جناح النسوان ، ويستعلم عن حال أستير ويطمن على سلامتها وأيش بيوقع معاها .. . ¹¹ وكانوا بيخلوا كل بنت تجلس سنة علميد يجهزوها ويجملوها بحسب النظام والقوانين اللي بيخطين بعدها النسوان : ٦ أشهر يفعلوا لهن زيت المر ، و٦ أشهر بالعطور والأدوات حق التجميل الباقية . وبعدها يجي دورها علميد يدخلوها لعند الملك حشوير .. ¹² ولاما تدخل لا عند الملك ، تقدر تشل معاها كل اللي تطلبه من الجناح حق النسوان لا قصر الملك .. . ¹³ وكانوا يدخلوها باليل لا عند الملك ، وبعدها بالصبح يرجعوها ويشلوها لا بقعه ثانية من جناح النسوان، وبيشرف عليهن 《 شعشز 》خادم الملك والمسئول على الجاريات ، وماعد تدخلش لا عند الملك مرة ثانية إلا لو أعجبته يدعيها باسمها .. . ¹⁴ وبعدها جا دور أ أستير علميد تدخل عند الملك . وهاذي هي البنت اللي تبناها مردخاي وهي بنت عمه أبيحائل . ولا طلبت أي شي ألا مدالها وما قلها هيجاي خادم الملك المسئول على النسوان . وكانت أستير يعجب فيها أي واحد يبسرها .. ¹⁵ وشلوها لا عند الملك حشوير لا قصره في الشهر العاشر اللي هو شهر طيبيت ، من السنة السابعة من حكمه في ملكه .. . ¹⁶ وحب الملك أستير أكثر من كل البنات اللي قد أبسرهن ، وكسبت رضاه وكان معجب فيها بقوة أكثر من باقي البنات البكر اللي قد أبسرهن من قبلها . وطرح التاج الملكي فوق راسها ، وخلاها ملكة في بقعه وشتي .. ¹⁷ وفعل الملك عزومة أكل عظيمة لكل عظمائه وأصحابه تكريم لأستير . وأعلن عن يوم راحة لكل البلاد، وادلهم هدايا بقدر كرمه كملك ... . ¹⁸ ولاما جمعوا النسوان البكر مرة ثانية ، وكان مردخاي قد أدوله عمل عند باب الملك .. . ¹⁹ وماقد كانتش أستير قد كشفت لهم على أصلها وجنسيتها ، سعما وصاها وقال لها مردخاي. ²⁰ وكانت بتنفذ كلام مردخاي مثلما وعاد هي كانت في رعايته وفي ذمته .. . ²¹ وفي ذياك الوقت ، ضبح اثنين من أعيان الملك وهم بغثانا وترش حراس الباب حق الملك ، وتأمروا علميد يقتلوا الملك حشوير . وكان مردخاي بيفعل عمله عند الباب حق الملك ²² وأكتشف ودري مردخاي بالمؤامره وحاكى الملكة أستير مايشتوا يفعلوا . وأستير حاكت الملك وقالت له أن مردخاي هو اللي حاكها وقلها .. . ²³ ولاما ساروا يتأكدوا من الموضوع ، دريوا انو صدق الخبر. واعدموا اللي تأمروا فوق الخشبة ، وسجلوا الواقعة هاذي قدام الملك في كتاب اخبار المملكة ..