¹ هاذا ماوقع في عهد حشوير . وحشوير هو اللي أمتد ملكه من الهند للحبشة وكان بيحكم ١٢٧ ولاية .. . ² وكان بيجلس في عرش المملكة اللي في قلعة شوشن وهي كانت العاصمة .. . ³ وفي السنة الثالثة من ملكه ، فعل عزومة أكل لكل العظماء واللي كانوا بيعاونوه والقادة حق جيش فارس ومادي والأمراء واللي بيحكموا الولايات .. . ⁴ وجلست العزومة مطولة لفتره ، ١٨٠ يوم ، ورواهم الملك كرمه وغنى مملكته ومجدها ، ورواهم مدى قوته وثروته وعظمته .. . ⁵ وحين خطيت هاذي الايام ، فعل لكل ضيوفه عزومة حنانة طنانة ، وطولت لمدة ٧ أيام في الساحة حق حديقة القصر ، لكل الناس الحاضرين والموجودين من صغيرهم لا كبيرهم ، في قلعة شوشن .. . ⁶ وكانت الساحة مزينة بستاير بيض وزرق من الكتان ، وعلقوها بحبال بنفسجي وحلق من فضه ، وبالاعمدة من رخام . وكانت المجالس من ذهب وفضه ، والارضية رصفوها برخام أبيض ومرمر ودر ورخام أسود .. . ⁷ وكانوا بيوزعوا ويسكبوا الخمور ويقدموها بوفرة وبكثرة حسب كرم ونشامة الملك ، واقلاص من ذهب وكل قلص أحلى من الثاني .. . ⁸ ويأمر الملك المسئولين في القصر، يخلوا الضيوف براحتهم ويشربوا المعزومين سعما يشتوا وبرضاهم ومايغصبوا أي أحد .. ⁹ وفعلت الملكة وشتي هي والكل عزومة أكل للنسوان اللي كانين متواجدات في القصر .. .

¹⁰ وفي اليوم السابع لاما أمتلا قلب الملك من الخمر وقدو طيطه وسالي ، أمر هومان وبزتا وحربونا وبغتا وأبغتا وأبغتا وزيتار وكركس وهم الخدم ال٧ اللي بيخدموه في وقت حضوره .. . ¹¹ وأمرهم يدوا لعنده الملكة وشتي وتلبس التاج الملكي فوق راسها ، علميد يبسر كل العظماء جمالها ، لانهو كانت حالية وجميلة بأقوى قوتها .. . ¹² وحاكى الخدم الملكة وشتي انو هاذا أمر من الملك، ليكن الملكة رفضت ومارضيتش تجي . أستفزت الملك وضبح منها قوي .. ¹³ وكان من عادة الملك انهو بيستشير المختبرين حقه في القانون والقضاء . وسأل الحكيمين اللي داريين ماعيفعلوا وكيف عيتصرفوا .. . ¹⁴ وهم ٧ من العظماء حق فارس ومادي : كرشنا وشيتار وأدمتا وترشيش ومرس ومرسنا ومموكان . هولاء هم اللي كانوا المقربين للملك ، ولهم الحق في المثول قدام الملك ، وبيملكوا أعلى المناصب القيادية في المملكة .. . ¹⁵ وقلهم الملك : بحسب القانون ، أيش نفعل بالملكة وشتي ؟ ، اللي رفضت ومارضيتش تطيع أمر الملك حشوير بالمجبر اللي قلها به الخدم ؟ .. ¹⁶ وجاوب مموكان قدام الملك والعظماء : بأن الملكة وشتي غلطت ، ومش في حق الملك بس ، مابلا غلطت في حق كل العظماء والموجودين وكل الشعوب والقبايل اللي في بلاد الملك حشوير .. . ¹⁷ لانهو ضروري أن اللي فعلته الملكة عيوصل لكل النسوان، ويرجعين يحتقرين أزواجهن ويقولين : الملك حشوير امرهم بأن يدوا الملكة وشتي لعنده ومارضيتش ورفضت .. . ¹⁸ وزد في مثل هاذا اليوم ، نسوان العظماء لفارس ومادي اللي سمعين بهاذا المجبر وأيش فعلت الملكة ، وعيرجعين يقولين ويفعلين سعما هي لكل العظماء حق الملك ، وعينتشر الاحتقار والضبح .. . ¹⁹ وانك راضي ي سيدي الملك ، وعتصدر حكم ملكي وتمنع الملكة وشتي وماعد تدخلش في وجود وحضور الملك حشوير . ونسجل هاذا الأمر في قانون فارس ومادي وماعد تلتغيش . وبعدها نريح على الملك وندي له أحسن واحده واحلى وأجمل من الملكة وشتي وتوقع هي الملكة الجديدة .. . ²⁰ ولاما يوصل أمر الملك ويصدره للكل وجميع أركان المملكة الواسعة ، وقتها عيحترمين كل النسوان أزواجهن من الكبير للصغير .. ²¹ وأبسر الملك والعظماء بأن الفكرة سابرة وحالية قوي ، وفعل الملك سعما قال له مموكان .. . ²² وفعل رسايل لكل الموجودين في المملكة ، وكل ولاية يحاكوها ويبلغوها بالقرار ذيه ، وكل شعب بلغوه بلهجته ولغته ، وكل من يدرى أو يسمع بلغوه ، بأنهو عيوقع كل رجال سيد في بيته ..