¹ Paulu, mwa apositolo waka Kilisito Jeso kwiita mu luzando lwaka Leza, u Timoti musazhinokwesu, ku chikombelo chaka Leza checho chili mu Kolinto, alimwi uku bantu basalala baka Leza moonse mubusena bwa Akaya. ² Luse alube kwenu u luumuno lwaka Leza Ushesu u Mwami wesu Jeso Kilisito. ³ A tumulumbe Leza Ushi Mwami wesu Jeso Kilisito. Walo ngu Tatesu shi luse alimwi ngu Leza shikuumbulizha. ⁴ Leza u latuumbulizha mu mapenzhi esu woonse, kwaamba ati aswe tulozhe kuumbulizha babo bali mu mapenzhi ali buti u buti. Tulaumbulizha bamwi u kuumbulizha nkukona aze Leza nkwaakasebezha a kutuumbulizha aswe. ⁵ Mbubona ukoya kupenga kwaka Kilisito kulizhimine aali uswe, mbubona kuumbulizhiwa kwesu kulizhimine kwiita mwa Kilisito. ⁶ Pele naakuti twapenzhewa, ati nkuumbulizhiwa kwenu u lufwutuko; alimwi naakuti uswe twaumbulizhiwa, ati nkuumbulizhiwa kwenu. Kuumbulizhiwa kwenu kulasebeza kabotu mukulindila kwenu ku mapenzhi ngoona aswe azo ngu twakapenga. ⁷ Bulangizhi bwesu kuli umwe tabuzungaana, tulizhi kwaamba ati mbubona mbumwaabana mapenzhi, amwe mbubona mulakakwaabana kuumbulizhiwa kwesu. ⁸ Tatuzanda kwaamba ati amwe mukozhane aswe, nu bakwesu, mapenzhi azo ngutwakapenga aswe ku Ezha. Twakaakulemenwe chini chini kubaala insana shesu, chakuti twakaakwiina linji insana shakupona. ⁹ Mubwini twakaakukwete lufwu aali uswe. Pele chechi kachili chakutuchita chakutashoma muli uswe tubeni, pele bulyo mwa Leza, walo u busha bafwu. ¹⁰ Wakatuhuna uswe kuhwa ku lufwu, alimwi u lakatuhuna aswe. Aali nguwe twakabika bulangizhi bwakuti ulakatuhuna aswe. ¹¹ Ulakachichita chechi mbubona amwe mbumutuyohwa aswe kwiita mukukomba kwenu.Banji banji balakapa kulumba kuzhiminina uswe kwiita mukukomba kwa banji banji. ¹² Kulyeenshensha kwesu nkukoku: mizeezo yesu ilapa bumboni kwaamba ati kulibamba kwesu mu luundu ku bumi mbutupona ubu leza bwini bwini, kutali kuzaama ku busongo bwa mubili pele a luse lwaka Leza. ¹³ Tulalemba kwenu shesho shitalozha kumukakila kubala naaba kuteelelesha, alimwi Ume ndashoma kwaamba ati mulachiteelelesha ¹⁴ mbubona mbumwakateelela a shoonto, kwaamba ati mulakalyeenshensha ali uswe mubuzuba bwa Mwami wesu Jeso, mbubona aswe mbutukakalyeenshensha ali umwe. ¹⁵ Kaambo Ume ndakaakukwete lushomo kuli chechi, Ume ndakaakuzanda kwiza kwenu kutaanguna, kwaamba ati mutambule alimwi luse lwabili. ¹⁶ Ume ndakaakutelaika kumuswaya ndakaakuya ku Masedoniya. Alimwi ndaakuzanda kumuswaya mumushinzo wangu kuhwa ku Masedoniya, amana kwaamba ati mukantume ndakaakuya ku Judeya. ¹⁷ Awo Ume indakaakutelaika munzhila yezhi, ndakaakushinshanya shinshanya? Saa Ume ndatantika shintu kwiingayina u mubili, kwaamba Ume ng'ambe ati "Eeye, eeye" naaba Pe,pe" a chiindi chomwi nchichona? ¹⁸ Pele mbubona Leza mbwaashomeka, izwi lyesu kwenu talili ati "Eeye" naaba "Pe pe." ¹⁹ Kaambo Mwanakwe Leza, Jeso Kilisito, wezo Siluvanasi, Timoti alimwi Ame ngutwakakambauka akati kwenu "Eeye"naaba "Pe." Nikuba bobo, walo lyoonse ngu "Eeye" ²⁰ Kushishomezho shoonse shaka Leza nsha "Eeye" mwakwe. Lyoonse kwiita mwakwe tulaamba ati "Ameni" ku bulemu bwaka Leza. ²¹ Inzho ngu Leza walo nguuchita uswe amwe mwa Kilisito, amana wakatutuma, ²² wakabika chaando aali uswe amane wakatupa Moza mu myonzo yesu chakaba chishomezho kuli checho chizhiza. ²³ Pele Ume ndabanda Leza kuba kamboni ku moza wangu kwaamba nchindatakazhila Ume ku Kolinto kachili chakuti Ume muhune ku bukali. ²⁴ Chechi takuli kuti kaambo tulazanda kuba Ba leza a lushomo lwenu pe. Pele, tuli basebezhinokwenu ku kubotelwa kwenu, nimuchizhimine nchi mulushomo lwenu.