¹ Pawumalilo, yanji, tukuwakomya nukuwadandawila muli mwene Yesu. Ndivino mwapochelile imikozololo ukufuma kuli sweswe iyakuyana namuno mufwile mupitile nukumusechelesya Leza, namunzila yikwene pitini, ukuti muwombe vii nukuchilapo. ² Pakuti mumanyile imikozololo yino twawapile ukupitila muli Mwene Yesu. ³ Pakuti kuu ukulonda kwakwe Leza, ukuswepa kwinu, ukuti muyitalule kuwuchende, ⁴ ukuti wensi muli mwemwe amanya vino angayilema umwili wakwe muwutele nu muchinzi, ⁵ mukulonda kwa lunkhumba pole (ngati ayakunzi yano yatamanya Leza). ⁶ Pataya nanthi wumwi uwakuchila paa mukumuyifya umunyina muli chii. Pakuti Mwene aliwino akawezezya muvinthu vyonsi vii, ukuyana na muno twawasochile nukusimichila. ⁷ Pakuti Leza atatwamile kuwupopo, kweni kuwutele. ⁸ Achino, wino akukana chii atakukana ayanthu, kweni Leza, wino akapa umupasi uwutiswe kuli mwemwe. ⁹ Ukuyana nulukundo lwa pawina munthu mutakulondekwa ukuti wumwi awalembele, pakuti mwemwe kwene mweyenecho mwanenwa na Leza pakukundana wenga nu muze. ¹⁰ Ichumi, mukachita chii kuyakundwe wonsi yano yali muli Makidoniya wensi. Kwene tukuwadandawulila, yanji, pakuwomba vii napano ukuchila. ¹¹ Nakupya tukuwalimbichisya pakwikala uwumi uwakutonthela, muyileme muvyakuchitika vinu, nupya womba namakasa yako, ngati muno twawasundile. ¹² Ukuti mungapita ningo pamanso yayanthu yakunzi nukunthaya mweyakusowelwa. ¹³ Tutakulonda ukuti muye mweyawula ukumanya, yanji, vyako yano yalala, ukuti mutalila ngati ayamwi, yano yataya ni suwilo. ¹⁴ Pakuti nditwasuwila ukuti Yesu wafwile nukuzyuka nupya, ichilichimwi Leza alawaleta na Yesu yano yalala utulo twakufwa muli weliwe. ¹⁵ Pakuti chii tukuvwanga kuli mwemwe ukupitila mwizwi lyakwe Mwene, ukuti sweswe sweyano sweyawumi, sweyano twasyala pakwiza kwakwe Mwene, tutalichila ukupita pano yano yalala utwamfwa yachili. ¹⁶ Pakuti Mwene weliwe alika ukufuma kwiyulu. Aliza nukuwuluma, nizwi lyamukalamba wayangelo, nupya ni penga lyakwe Leza, nayafwe muli Kilisitu yalatalichila ukuzyuka. ¹⁷ Apano sweswe sweyawumi, sweyano twasyala tulaya ponga nawo tulamyulilwa mupela mumawingo pakuya komenkhana na Mwene mulwelele. Munzila yii tulaya na Mwene insita zyonsi. ¹⁸ Achino, komyananji wenga nu muze na mazwi yaa.