¹ बे दिनमें फिर एक भारी भीड़ जम्मा हुईगव, तव उनके ठिन खानबारो चीज कुछ न रहए। तव येशु चेलनके अपने ठिन बुलाएके कही, ² "जा भीड़के मोए डहा लागत हए, काहेकि जे मीर सँग रहत् तीन दिन हुईगव, और यिनकेसँग खानबारो चीज कुछ न हए।" ³ और अगर इनके भूखे घर पठाएहएँ, तव जे डगरमें बेहोस हुईजए हएँ । इन्मैसे कुई-कुई दुरसे अएहएँ।" ⁴ बाके चेला बासे कहिं, “जा सुनसान ठाउँमे यिनके कहाँ से रोटी खबामएँ ?” ⁵ "बा उनसे कहि, “तुमरे ठिन कय रोटी हएँ, ?” बे कहि, “सात हयँ।" ⁶ बा भिणके भिमे बैठन हुकुम दै, सात रोटी हातमे लै और धन्यबाद दैके रोटी तोरी और आदमीन अग्गु धरनके चेलनके दै, और बे आदमीक अग्गु धरदैं। ⁷ बिनके ठिन कुछ छोटी छोटी मछरी फिर रहएँ, और बा आशीर्बाद दईके बहु फिर उनके अग्गु धरन लगाई। ⁸ और आदमी खाएके अघाए गए। और उबरो खुदरा बे सात डालैय बटोरीं। ⁹ बहुवाँ लगभग चार हजार आदमी रहएँ। ¹⁰ बा उनके बिदा करके पठाई, और बा फिर अपन चेलन सँग तुरन्त नैयाँमे चढ्के दलमनुथाके क्षेत्रमे गव। ¹¹ फरिसी बाके ठिन आएके बासे बहस करन लगे, और बाके परीक्षा करन ताहिं स्वर्गसे एक चिन्ह मागीं। ¹² अपन आत्मामें लम्मो सास लैके बा कहि, “जा पुस्ता काहे चिन्‍ह ढुणत है ? पक्कय, मए तुमसे कहत हौं जा पुस्ताके कुई चिन्‍ह न मिलेहय।" ¹³ और उनके छोडके बा फिर नैयाँमें चढ्के बोपार गव। ¹⁴ चेला अपन सँगमे रोटी लैजान भूलगए, और नैयाँमे बिनके सँग एकय रोटी रहय। ¹⁵ "येशू चेलन के अईसे करके चेताबनी दै, “तुम फरिसीनको खमीर और हेरोदके खमीरसे होशियार रहिओ।" ¹⁶ तव बे सँगमे रोटी न हए बहेमारे येशु कही हए, करके बे आपसमे बहस करन लगे। ¹⁷ येशु जा पता पाए के बिनसे कहि, “तुमर सँग रोटी न हए, तव काहे तुम बहस करत हौ ? का तुम हबाए फिर देख्त न हौ और जानतउ न हौ ? का तुमरो मन कठोर हुईगव हए ? ¹⁸ आँखी हए तहूँ फिर देखत न हओ ? कान हए तहूँ फिर सुनत न हओ ? का तुमए याद न हए। ¹⁹ "जब मै पाँच रोटी बे पाँच हजारके बीचमे तोरो रहौं, तव कित्तो डलैया खुदरा खुदरी तुम बटोरे रहौ ?” बे बासे कहिं, "बाहृ।” ²⁰ और जब मै सात रोटी चार हजारके बीचमे तोरो रहौं, तव कित्तो डलैया बटोरे रहौ ?” बे बासे कहिं, "सात डलैया।" ²¹ बा उनसे कहि, “का तुम हबए भी न समझत हओ ? ²² तव पीछु बा बेथसेदामे आओ, और आदमी एक अन्धरा आदमीके बाके ठिन लाईं, और बाके छुइदे करके बासे बिन्ती करीं। ²³ बो, बा अन्धरा आदमीक हात पकड के, बाके गाउँसे बाहिर ल्याई, और बाके आँखीमे थुकके, बक उपर अपन हात धरी, बासे पूँछी, “क तए कुछ देखत हए ?” ²⁴ और उपर देखके बा कहि, “मए आदमीनके रुखा कता नेगत देखत हौ।" ²⁵ तव बा फिर बक आँखीमे हात धरी, और एक टक लागएके देखी बा अपन दृष्टि पाईगव और सब चीज सफा देखन लागो। ²⁶ तव बा बाके गाउँ हुईके न जानके हुकुम करके बाके घर पठाई। ²⁷ येशू और बाके चेला कैसरिया फिलिप्पीक गाउँमे गए। डगरमें जातैजात बा अपन चेलनसे अइसे करके पूँछी, “आदमी का कहत् हएँ, मए कौन हौ ?" ²⁸ बे बासे कहिं, “कोई कहत हए 'बप्तिस्मा-देनबारो युहन्ना।” और कोई 'एलिया, और कित्तो कहत हएँ, अगमवक्ता मैसे एक जनी।” ²⁹ तव बा उनसे पूँछी, “पर तुम का कहत हौ, “मए कौन हौं ?” पत्रुस उत्तर दैके बासे कहि, “ तुम ख्रीष्ट हौ।" ³⁰ बा उनसे कहि बाके बारेमे कोईके मत कहिओ करके आज्ञा दै। ³¹ "आदमीक लौणा बहुत दुःख भोगन, और धर्म-गुरुसे, मुख्य पुजारीसे और शास्त्रीसे इन्कार करनो और मरनो और तीन दिन पीछु जिन्दा हुईके उठ्नो आबश्यक हए " करके बा उनके सिकान लागो।" ³² अइसे बा जा बात साफ साफ कहन लागो। तव जा सुनके पत्रुस बाके एकघेन लैजाएके झड्कन लागो। ³³ तव घूमके अपन चेलनके देख्के पत्रुसके बा अइसे करके डाँटी, “शैतान मिर ठीनसे हटीजा, काहेकी तेरो मन परमेश्‍वर घेन न हय, आदमी घेन हय।" ³⁴ तव बा अपन चेलनके सँगमे भीण के अपने ठिन बुलाएके उनसे कही, “कुई आदमी मिर पीछु लागन इच्छा करत हए, तव अपनएके इन्कार करए, और अपनो क्रूस उठाएके मेरे पिछु लागए। ³⁵ काहेकि जौन अपन प्राण बचानके इच्छा करत हए, बा बाके खोबईगो, पर मेरे और सुसामाचारके ताहिं अपन प्राण गुमएहए बा बाके बचाबैगो। ³⁶ काहेकि आदमी सबय संसार पाएके अपनो प्राण गुमाएके बाके का फाईदा हुईहै ? ³⁷ और आदमी अपनो प्राणके बदलामे का देन सिकैगो ? ³⁸ और जा व्यभिचारी और पापी पुस्ता जो मोए देखके और मिर वचनसे शर्माए हए, आदमीको पुत्र फिर अपन पिताके महिमामे पवित्र दूतके सँग आत बासे शर्माबैगो।”