¹ यरूशलेमसे आए भए फरिसी और शास्त्री येशूके चारओ तरफ जम्मा हुईगए। ² येशूके कित्तो चेला अशुध्द हात और न धोएके हातसे खात बे देखिं। ³ फरिसी और सब यहूदीनके पुर्खान दओ परम्परा अनुसार हात न धोए के खानु खात न रहएँ। ⁴ बजारसे आएके हँदाएके शुध्द न भय तक बे खानु न खात रहएँ । इतकय इकल्लो नायकि, बे आईसे बहुत परम्परा मानत रहएँ। कटोरा, भाणा और काँसोक वर्तन धोनक परम्परा। ⁵ तव फरिसी और शास्त्री बासे पूछीं, “तुमर चेला पिता-पुर्खाको धरो परम्परामे काहेना चलतहएँ, और अशुध्द हातसे खातहएँ ?” ⁶ तव बा उनसे कही, “यशैया तुमय कपटीनके बारेमे ठिक अइसे अगमवाणी करी, अइसो लिखो हए, “जा जाति मोके ओठसे इकल्लो आदर करत् हए, और उनको हृदय मोसे दूर हय। ⁷ बे व्यर्थमें मेरो उपासना करत् हएँ, और उनको शिक्षा आदमीक सिकाओ बिधी इकल्लो हए।” ⁸ तुम परमेश्‍वरको आज्ञाके छोडके आदमीनको परम्परा मानत् हौ।" ⁹ बा उनसे कहि, “तुम अपन परम्परा मानन् ताहिं कित्तो अच्छेसे परमेश्‍वरको आज्ञाके टारदेत हौ।" ¹⁰ काहेकि मोसा कहि हए, “अपन आईया-दौवाके आदर करओ, और जो अईया-दौवाके बिरुध्दमे खराब बोलैगो बा मरनए पडैगो।” ¹¹ "यदि कुई आदमी दौवा औ अईया "मोसे जो-जीत्तो मदृत तुमाए मिलन पणैगो बा कुर्बान हए, { औ परमेश्‍वरके चढऔ } कहात हएँ," ¹² और तुम उनके अपन अईया-दौवाके ताहिं फिर कुछ करन न देत हौ। ¹³ अइसे तुम अपनो चलिअव परम्पराके कायम रखके परमेश्‍वरको वचन के रद्ध करत् हौ। और आइसे अनेक काम तुम करत् हौ।” ¹⁴ बा आदमिनके फिर अपन ठीन बुलाएके उनसे कहि, “तुम सब मेरी बात सुनओ और समझओ। ¹⁵ अइसी कोई बात न हय जो बाहिरसे आदमिनके भीतर घुसके अशुध्द करपए हय, पर आदमीसे बाहिर निकरत हय बेहि बात आदमीके अशुध्द करत हय। ¹⁶ जौनको सुनन कान हय बा सुनय।” ¹⁷ आदमीन छोडके घर भीतर घुसके पीछू बाके चेला बासे कहानीके बारेमे पूछीं । ¹⁸ बा उनसे कहि, “क तुम हबाए और न सम्झे हौ ? जो बाहिरसे आदमीके भीतर घुसत् हय बा बाके अशुध्द न करत् हय करके तुम न जानत् हौ ? ¹⁹ काहेकि बा बाके हृदयमे न, पर पेटभितर घुसत, और बाहिर निकरत हय। आइसे बा सब खानु शुध्द हए करके बताएदै। ²⁰ बा कहि, “आदमीसे जो बाहिर निकरत हय बा आदमीनके अशुध्द करत हय। ²¹ काहेकि भीतरसे औ आदमीक हृदयसे खराब बिचार, व्यभिचार, चोरी, हत्या, परस्त्रीगमन, ²² लोभ, दुष्टता, छल, छाडापन, ईष्या, निन्दा, घमण्ड, मुर्खता निकरत हय। ²³ जे सब दुष्ट बात भीतरसे निकरत हयँ, और आदमीके अशुध्द करत हयँ। ²⁴ हुवाँ से उठके बा टुरोस और सिदोनके सीमा घेन जाएके एक घरके भीतर घुसो। जा बात कुई पता न पामए करके बा चाँहत रहय, तव बा लुकाय न पाई। ²⁵ बहे बेरा एक बैयर बाके बारेमे सुनी और आएके बाके पाउमे पडी। बा बैयरकी लौणिया के अशुध्द आत्मा लगो रहय। ²⁶ बा सिरिया फोनिकेमे जन्मी एक ग्रीक बैयर रहय। बा बैयर अपन लौणियाक भुत निकारदे करके बासे बिन्ति करी। ²⁷ बा बासे कहि, “पहिले लौणा-लौणियान के खान देओ, काहेकी लौडालौंडीयक रोटी लैके कुत्तनके अग्गु फेक्नो ठीक न हय।" ²⁸ तव बा बासे कहि, “हे प्रभु , तव कुत्तओ ता फिर लौणालौंणियाक टेबुल तरेके डुठो बिनके खातहएँ।” ²⁹ बा बासे कहि, “तय अइसो कहोके कारन तय घरे जा । तिर लौणियासे भुत निकर गवहय। ³⁰ तव बा अपन घर लौटके गई और लौणियाक खटीयामे सोत पाई और भुत बासे निकरगव रहय। ³¹ टुरोसको इलाका से निकरके बा सिदोन हुईके डेकापोलिसको सिमानाके बिच हुईके गालील-समुन्द्रमे गओ। ³² हुवाँ आदमी एक बहिरा और लाटा आदमीके बाके ठीन लियाईं, और बाके ऊपर हात धरदे करके बासे बिन्ती करीं । ³³ बाके भिडसे अलग एकन्तमे लैगओ येशू अपन उङ्गरी बाके कानमें लगाई। तव पीछु थुक्के बाकी जीबमें छुई। ³⁴ "और स्वर्ग घेन देखके लम्मी सास लैके बासे कहि, “ईफ्फाता,”औ "खुलिजा।” ³⁵ उतियखिन बक कान खुलिगव, और बाकि जीबको बन्धन खुलीगव, और बा सफासे बोलन लगो। ³⁶ "जा कोईसे मत कहिओ,” करके बा उनके आज्ञा दै। तव जित्तो-जित्तो बा आदमिनके आज्ञा देतरहय, और जद्धा उत्साहसाथ बे जाको प्रचार करत रहयँ |" ³⁷ आदमी अचम्मो मानके छक्क पडत रहयँ, और कहन लागे, “बा सब चीज अच्छो करीहय। बा बहिरन सुनन और लाटन मसकन बारो फिर बनाई।”