¹ Vikabombwa mukaya ka Ikoniya bo u Pabulo nu Balanaba binjila poka mu sinagogi ya bayuda nukunena ivi ukuti ichilundilo ichikulu icha ba Yuda na ba Giliki bakasubila. ² Loli aba Yuda batakasubila munyinong'ono zya bakunzi nu kubapangisya ukubaba aba wamwabo. ³ Po bakikala pamalo ghala akabalilo akatali, ukunena umwakufwasa na maka gha Chala, pakubikila ubumboni ukuyana na mazyu mu chisa chache. Akapanga ivi ukubikila ubukamboni ni vya kuswighisya mu nyobe zya Pabulo nu Balanaba. ⁴ Loli abanthu aba mukaya bakagabinkana; bamo bakaba kumbali ya ba Yuda, abanji ku bamanyili. ⁵ Bonsi aba kunzi sona na ba Yuda (poka na abatanjilila) bakapangana ukubanyazya sona nu kubasumba na mabwe, ⁶ loli bo bamanya ivi, bakafumako nukuya ku Lycaonian akaya ka Lystra nu Debe sona na kaya ka kuzyungulila, ⁷ ko bakapitilizya pakunena amazyu. ⁸ Pa Lystra pakikhala umunthu yumo, yo atakaba na maka mu matamba ghache, atakendapo lumo, mo akafumila mu lwanda lwa mama wache. ⁹ U munthu uyu akivwa u Pabulo akunena. U Pabulo akamutontomela po akalinga ukuti mu mwache muli ulwitiko ulwakuti angapola. ¹⁰ Po akanena kukwache umwa kukolomoka, ''Imilila.'' Po umunthu yula akanyela nukwanda ukwenda umwakuzyungulila pamalo pala. ¹¹ Bo ichilundilo chalinga vyo u Pabulo abomba, bakakwezya amazyu ghabo, ukunena muneno ya ku Lycaonia, ''Aba chala biza kukwitu mu chifwani cha banthu.'' ¹² Bakitizya u Balanaba ukuba ''Zeus,'' sona u Pabulo ukuba ''Hermes,'' chifukwa chakuti weyo akaba muneni. ¹³ Umuputi wa Zeus, yo itempeli lyache likaba papipi na kaya, akiza na bakambako ni vinjivinji pa mulyango, umwene ni bumba bakalondanga ukuti babike ngati vyabupi. ¹⁴ Loli bo abatumwa, u Balanaba nu Pabulo, bivwa ivi, bakazepula imvwalo zyabo, mwalubilo nukufumamo mwi bumba, bakulila, '' ¹⁵ mwe Banthumwe, ka choni cho mukubomba vinonyene? Nuswe swe banthu, mukabele ngati mwemwe. Tukufumusya amazyu ku kwinu, ukuti mufumeko ku vinthu ivibibi muye kwa Chala uwabumi, yo akapela kumwanya, na pansi,ni nyanja na vyonsi vyo vili mumwache. ¹⁶ Kwisinda nkhani, akitikizya insi yonsi ukwenda mo bighanile. ¹⁷ Loli nulu, atakabaleka bene ukusita ubumboni, akabomba iviza nukubapa imvula ukufuma kumwanya sona ni vikomwa iviza mukabalilo kalanyene, ukwikutisya imyoyo yinu ni chakulya nubuhobosu.''' ¹⁸ Napo na mazyu ghano, u Pabulo nu Balanaba batakalondanga ukuti ichilundilo chibike ivyabupi kukwabo. ¹⁹ Loli aba Yuda bamo ukufuma ku Antiyoki ku Ikoniamu bakiza nukususya ibumba. Bakamuma u Pabulo na mabwe nukumusumbila kunzi kwa kaya kala, bakinong'onanga ukuti afwa. ²⁰ Bo abamanyili bimilile pakumuzyungulila, akanyamuka nu kwinjila mu kaya kala. Isiku ilinji, akabuka ku Derebe nu Balanabasi. ²¹ Bo balumbilila kale amazyu mu kaya kala bakaba na bamanyili abinji, bakanyokela ku Lystra, ku Ikoniamu, sona ku Antyoki. ²² Bakapitilizya pa kughomya imyoyo ya bamanyili nukubaghomya pakuba nu lwitiko, nukuti, ''Tubaghile twinjile mu bumwene bwa Chala ukwizila mu nthamyo izinji.'' ²³ Bp babasalila abasongo aba chalichi, bakiputa pakusita ukulya, bakabasubila mwa Mwene, mwa yo bakumwivwila. ²⁴ Po bakabuka ukwenda mu Pisidya nukwuka ku Pamphylia. ²⁵ Bo banena amazyu mu Perga, bakapitilila ukuya ku Attalia. ²⁶ Ukufuma kula bakabuka ku Antiyoki, ko bakapeghiwa mu chisa cha Chala pa mbombo yiyo bamalizya. ²⁷ Bo bafika ku Antyoki bakabunganika ivyalichi vyonsi poka, nukubabuzya ivinthu vyonsi vyo u Chala ababombela, sona namo abighulila umulyango mu lwitiko lwa bakunzi. ²⁸ Bakikala akabalilo akatali na bamanyili.