¹ Despois destas cousas veu a palabra de Iahveh a Abram por medio dunha visión, dicindo: Non temas Abram! Eu son o teu escudo e o teu galardón será grande. ² E respondeu Abram: Iahveh o Señor, que me darás se non teño fillos e o maiordomo da miña casa é ese damasceno Eliezer? ³ E dixo tamén Abram: Mira que non me diches descendencia e velaquí un servo nacido na miña casa será o meu herdeiro. ⁴ Velaquí veu a palabra de Iahveh a el dicindo: Non será este o teu herdeiro, senón un fillo exendrado por ti ha ser o teu herdeiro. ⁵ E levouno fóra e díxolle: Mira agora os ceos e conta as estrelas, se as podes contar. E díxolle: Así será a túa descendencia. ⁶ E creu en Iahveh e foille contado por xustiza. ⁷ E díxolle: Eu son Iahveh, o que te sacou de Ur dos caldeos, para darche esta terra en posesión. ⁸ E el respondeulle: Señor Iahveh, como saberei que a hei de herdar? ⁹ E díxolle: Traeme unha xata de tres anos, unha cabra de tres anos, e un carneiro de tres anos, e unha rula, e un pombiño. ¹⁰ E tróuxoulle todo isto e partiunos en dous, e puxo cada metade unha enfronte da outra, pero non partiu as aves. ¹¹ E descendían aves de rapina sobre os cadáveres, mais Abram escorrentábaas. ¹² E poñéndose o Sol entroulle un profundo sono a Abram, e velaquí o temor dunha gran escuridade caeu sobre el. ¹³ Entón Iahveh dixo a Abram: Ten por seguro que a túa descendencia morará en terra que non é súa, e converteranse nos seus escravos e serán oprimidos por catrocentos anos. ¹⁴ Mais tamén Eu xulgarei á nación a cal servirán, e despois disto sairán con moita riqueza. ¹⁵ E ti irás a teus pais en paz, en boa vellez serás sepultado. ¹⁶ E a cuarta xeración tornará acó, porque aínda a maldade dos amorreos non chegou ao seu límite. ¹⁷ E sucedeu que posto o Sol, e xa escurecido, víase un forno con fumareda e un facho de lume que pasou por entre as metades dos animais. ¹⁸ Naquel día fixo Iahveh un pacto con Abram dicindo: Hei dar esta terra á túa descendencia, dende o río de Exipto ata o gran río do Eufrates, ¹⁹ a terra dos ceneos, dos cenezeos, dos cadmoneos, ²⁰ dos heteos, dos ferexeos, dos refaíns, ²¹ dos amorreos, dos cananeos, dos xergaseos e dos xebuseos.